سۋرەتتە: مەرەكەلىك ءىس-شارا كورىنىستەرى
سالتاناتتى انت قابىلداۋ راسىمىنەن كەيىن باسقارما باستىعى, پودپولكوۆنيك رۋستام سايديماروۆ مەرەيلى مەرەكە قارساڭىندا بورىشىن ادال ورىنداۋعا انت قابىلداعان اسكەري قىزمەتشىلەردى قۇتتىقتادى. ول ءوز سوزىندە بۇل ءراسىمنىڭ الار ورنى ايرىقشا ەكەنىن اتاي كەلە, اسكەري مىندەت قانشالىقتى قيىن بولعانىمەن, جارعىدا كورسەتىلگەن تالاپتى ورىنداۋ باستى مىندەت ەكەنىنە ەرەكشە توقتالدى. جاس ساربازداردى الداعى ۋاقىتتا انتىنا ادال بولىپ, قىزمەتتەرىن ءمىنسىز اتقارۋعا شاقىرعان باسقارما باستىعى قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆتىڭ قۇتتىقتاۋ حاتىن وقىپ بەردى.
مەرەكەلىك شارا بارىسىندا قىزمەتتىك يتتەردىڭ ءتاجىريبەسى مەن دايارلىعى سارالانعان جارىس ۇيىمداستىرىلدى. جارىس قورىتىندىسىندا مەملەكەتتىك شەكارانىڭ سەنىمدى كۇزەتىلۋىن قامتاماسىز ەتۋ ىسىنە قوسقان ۇلەسى مەن قىزمەتتىك مىندەتىن ادال اتقارعانى ءۇشىن ءبىرقاتار كينولوگيا ماماندارى ماراپاتتالدى.
سالتاناتتى شارادان كەيىن كينولوگيا باسقارماسى باستىعىنىڭ ورىنباسارى, پولكوۆنيك نۇرعالي نۇرمانوۆ قىزمەتتىك يتتەردىڭ ەمحاناسىن, اسحاناسىن, جاسىنا قاراي باعىلاتىن جانە ءتۇرلى باعىتتار بويىنشا ۇيرەتىلەتىن ورىندارىمەن تانىستىردى. ولاردى باعىپ, باۋلۋمەن قاتار, باسقارمانىڭ تاريحىنا دا كەڭىنەن توقتالدى.
قىزمەتتىك يتتەرىنءىڭ پيتومنيگى 1976 جىلى ف.دزەرجينسكي اتىنداعى جوعارى كوماندالىق شەكارا ۋچيليششەسىنىڭ بولىمشەسى بولىپ قۇرىلعان. 1982 جىلى قىزىل تۋلى شىعىس شەكارا وكرۋگىنە بەرىلىپ, وكرۋگ اسكەرلەرىنە قىزمەتتىك يتتەردى ءوسىرۋ, نۇسقاۋشىلار دايىنداۋ بويىنشا ءبولىم ۇيىمداستىرىلعان. 1985 جىلى قۇرىلىسى اياقتالعان پيتومنيك نىسانى پايدالانۋعا بەرىلىپ, 2125 اسكەري ءبولىمى دەگەن شارتتى اتاۋمەن اتالعان. 1997 جىلدان قر ۇلتتىق قاۋىپسىزدىك كوميتەتى توراعاسىنىڭ بۇيرىعىمەن قىزمەتتىك يتتەر ورتالىق پيتومنيگى بولەك اسكەري ءبولىم بولىپ قىزمەت ىستەي باستاعان. 
«ءبىزدىڭ قىزمەتتىك كينولوگيا باسقارماسى ەلىمىزدەگى شەكارا اسكەرلەرىنە جىلىنا 300-گە جۋىق قىزمەتتىك يت دايىندايدى. الدىمەن يتتەردىڭ اتا-تەگى زەردەلەنەدى. تۇقىم قۋالايتىن اۋرۋىنىڭ بار-جوعى انىقتالادى. بەس تۋ بولىمشەسىندە تازا تۇقىمنان دۇنيەگە كەلگەن كۇشىكتەر ارنايى ورىندا ەكى اي باعىلادى. ول جەرگە بوگدە ادام كىرمەيدى. ءتورت ايدان كەيىن ەسىرتكى, جارىلعىش زاتتار, ۆاليۋتا, قۇستاردى, اڭ تەرىسى مەن ءمۇيىزىن جانە ادام ىزدەۋ, تاعى باسقا كەرەكتى باعىتتار بويىنشا ۇيرەتىلەدى. ءتورتايلىق كەزىنەن قارۋ نەمەسە جارىلعىش زاتتاردىڭ دىبىسىنان قورىقپايدى. التى اي بولعاندارىن ەلىمىزدىڭ ءار وڭىرىندەگى شەكارا قىزمەتىنەن كەلگەن اسكەريلەرمەن بىرگە ۇيرەتىپ, جاتتىقتىرىپ, ولاردى ءبىر-بىرىنە بەيىمدەيمىز. يتتەرىمىز تمد مەن ورتالىق ازيادا وتكەن سايىستاردا جۇلدەلى ورىنداردى يەلەنىپ ءجۇر. بيىل ناۋرىز ايىندا ءبىزدىڭ ءبىر يت ەۋروپا چەمپيونى اتاندى», دەيءدى پودپولكوۆنيك رۋستام رۋسلان ۇلى.
قىزمەتتىك كينولوگيا باسقارماسىندا نەگىزىنەن بەلگيالىق, نەمىس, گوللانديالىق يت تۇقىمدارى وسىرىلەتىن بولسا, پرەزيدەنت تاپسىرماسى اياسىندا وتكەن جىلدان باستاپ تازى مەن توبەتءتى ءوسىرىپ, باۋلۋ ەكسپەريمەنتى باستالعان.
مەملەكەتتىك شەكارانىڭ تىنىشتىعىن قورعاۋدا تاباندىلىق تانىتىپ جۇرگەن شەكاراشىلاردىڭ سەنىمدى سەرىگىنە اينالعان قىزمەتتىك يتتەردىڭ كومەگى وراسان زور. ستاتيستيكاعا سۇيەنسەك, شەكاراداعى قۇقىقبۇزۋشىلىقتىڭ 80 پايىزى يتتەردىڭ كومەگىمەن توقتاتىلاتىن كورىنەدى. بۇل ورايدا قر ۇقك شەكارا قىزمەتىنىڭ قىزمەتتىك كينولوگيا باسقارماسى ەلىمىز بويىنشا قىزمەتتىك يتتەردى ۇيرەتۋ مەن ولاردىڭ نۇسقاۋشىلارىن دايىنداۋعا سۇبەلى ۇلەس قوسىپ كەلەدى.
الماتى وبلىسى
