كۇن تارتىبىندە مەملەكەت باسشىسى قاسىم-جومارت توقاەۆ پەن قاتار مەملەكەتىنىڭ ءامىرى شەيح ءتاميم بەن حاماد ءال ءتاني اراسىندا بيىلعى اقپان ايىندا قول جەتكىزىلگەن ۋاعدالاستىقتاردىڭ ورىندالۋىن باقىلاۋ ماسەلەسى قارالدى.
«QazaqGaz» ۇك» اق باسقارما توراعاسى سانجار جاركەشوۆ بىرلەسكەن گاز جوبالارىن ىسكە اسىرۋ بارىسى تۋرالى باياندادى. قاتاردىڭ «UCC Holding» كومپانياسىمەن بىرگە قۋاتتىلىعى جىلىنا 1 ملرد م3 جانە 2,5 ملرد م3 بولاتىن ەكى گاز وڭدەۋ زاۋىتى, جاڭا كس-14 كومپرەسسورلىق ستانساسى جانە «كس-14-قوستاناي-اقتوبە» ماگيسترالدى گاز قۇبىرى, سونداي-اق «بەينەۋ-بوزوي-شىمكەنت» مگق ەكىنشى جەلىسى سالىنادى.
گوز قۇرىلىسى وڭدەۋ قۋاتىن ارتتىرۋ ارقىلى شيكى گازدى ءتيىمدى پايدالانۋعا باعىتتالعان. «بەينەۋ-بوزوي-شىمكەنت» ماگيسترالدى گاز قۇبىرىنىڭ ەكىنشى جەلىسىن سالۋ وڭتۇستىك, ورتالىق جانە سولتۇستىك وڭىرلەردى گازبەن جابدىقتاۋدىڭ, سونداي-اق ەكسپورت كولەمىن ساقتاۋدىڭ ارقاسىندا ەلىمىزدىڭ ەنەرگەتيكالىق قاۋىپسىزدىگىن قامتاماسىز ەتەدى.
جاڭا كومپرەسسورلىق ستانسا مەن «اقتوبە-قوستاناي» ماگيسترالدى گاز قۇبىرىن ىسكە قوسۋ قوستاناي وبلىسىنىڭ حالقى مەن ءوڭىردىڭ ونەركاسىپ كاسىپورىندارىن كوگىلدىر وتىنمەن قامتاماسىز ەتۋگە مۇمكىندىك بەرەدى.
جيىنعا قاتىسۋشىلار مامىلەنىڭ نەگىزگى شارتتارىن بەكىتتى. «QazaqGaz» جانە «UCC Holding» جالپى ماڭىزدى ءتورت جوبا بويىنشا ورتاق كەلىسىمگە كەلگەنى اتاپ ءوتىلدى. الداعى ۋاقىتتا ولاردى بىرلەسىپ جۇزەگە اسىرۋ جۇمىستارى باستالادى.
پرەمەر-مينيستر جوبالاردى ىسكە اسىرۋ كەزىندە «QazaqGaz» ۇلتتىق كومپانياسى توبىنىڭ ىشكى قۇزىرەتتەرىن جانە وتاندىق وندىرۋشىلەردىڭ ونىمدەرىن بارىنشا پايدالانۋدى تاپسىردى. سونىمەن قاتار ەنەرگەتيكا مينيسترلىگىنە گاز سالاسىنىڭ تابىستىلىعىن ءارى قاراي ارتتىرۋ جونىندە تاپسىرمالار بەرىلدى.
«قازاقستان پرەزيدەنتى مەن قاتار ءامىرى اراسىنداعى ۋاعدالاستىقتار ەلىمىزدىڭ ەكونوميكاسى ءۇشىن اسا ماڭىزى بار بىرقاتار مەگا-جوبانى بىرلەسىپ ىسكە اسىرۋعا مۇمكىندىك بەرەدى. ءبىز ەلىمىزدە زاماناۋي قۋاتتى گاز ونەركاسىبىن قۇرۋ جولىندا ورنىقتى تۇردە العا جىلجىپ كەلەمىز. جوبالاردى ىسكە اسىرۋدا ەشقانداي ىركىلىستەر بولماۋى كەرەك. بارلىق ماسەلە مەنىڭ جەكە باقىلاۋىمدا», دەپ اتاپ ءوتتى ولجاس بەكتەنوۆ.
ەنەرگەتيكا مينيسترلىگى مەن «QazaqGaz» مالىمەتتەرىنە سايكەس, 2024 جىلى قازاقستاندا گاز ءوندىرۋ كولەمى 60,456 ملرد م3 دەيىن وسەدى دەپ كۇتىلۋدە. ءوندىرىستىڭ 85%-دان استامىن تەڭىز (27%), قاراشىعاناق (38%) جانە قاشاعان (20%) جوبالارى قامتاماسىز ەتىپ وتىر. گاز سالاسىنىڭ دامۋ قارقىنىن ەلىمىزدە كەيىنگى جىلدارى گاز ءوندىرۋدىڭ تۇراقتى ءوسىپ كەلە جاتقانىنان بايقاۋعا بولادى. 2024 جىلى تاۋارلىق گاز ءوندىرىسى 28,054 ملرد م3 كولەمىندە جوسپارلانىپ وتىر. گازدىڭ بولجامدى بالانسىنا سايكەس 2024 جىلى اعىمداعى ىشكى تۇتىنۋ 20,9 ملرد م3 قۇرايدى.
