ەۆەرەستى باعىندىرۋعا شەشىم قابىلداعان كەز كەلگەن ادام سول جولدا نەبىر قاۋىپكە تاپ بولادى. قاتتى جەلدىڭ ەكپىنى, وتتەگىنىڭ جەتىسپەۋى, بوران نەمەسە قار كوشكىنى. بىراق شون ءۇشىن ەشقانداي كەدەرگى جوق. ول – ءوز ۋاقىتىندا قاتەرلى ىسىكتەن ايىعىپ قانا قويماي, حودجكين اۋرۋى مەن اسكين ىسىگى دياگنوزىنان امان قالعان الەمدەگى جالعىز ادام. ون ءۇش جاسىندا دارىگەرلەر ونى ومىرمەن قوش ايتىسۋعا دايىنداعان ەدى. بولجام بويىنشا ول ءۇش اي دا ءومىر سۇرمەۋى كەرەك-تۇعىن. دەگەنمەن شون ءوزىنىڭ اۋرۋىن عاجايىپ تۇردە جەڭىپ, ايىقتى. بىراق كوپ ۇزاماي دارىگەرلەر ونىڭ وڭ وكپەسىنەن گولف دوبىنىڭ كولەمىندەي ىسىك تاپقاندا اۋرۋحاناعا ورالدى. ىسىكتى جويۋعا ارنالعان ەكىنشى وپەراتسيادان كەيىن دارىگەرلەر شون ەكى اپتادان اسپايدى دەپ شەشتى...ال ون جىلدان كەيىن شون (وكپەسى جارتىلاي عانا جۇمىس ىستەيدى) بۇكىل الەمگە «ەۆەرەست تاۋىنا كوتەرىلگەن, قاتەرلى ىسىكتەن امان قالعان العاشقى ادام» رەتىندە تانىمال بولدى.
قولى جوق ۇشقىش
دجەسسيكا كوكس سيرەك كەزدەسەتىن دەرتكە شالدىققان. دۇنيەگە قولسىز كەلگەن. تاعدىردىڭ تالكەگىنە ەش مويىماعان بۇل قىزدىڭ ەرىك-جىگەرى زور.
بۇگىندە دجەسسيكا جازا الادى, كولىك جۇرگىزە الادى, شاشىن تارايدى, تەلەفونمەن سويلەسەدى. تىرشىلىككە قاجەتتىنىڭ كوبىن يگەرگەن. ول ءىس-قيمىلدىڭ ءبارىن اياقتارىنىڭ كومەگىمەن جاسايدى. ءتىپتى پسيحولوگيا فاكۋلتەتىن ءبىتىرىپ, بيمەن دە اينالىستى. تاەكۆوندودان قوس قارا بەلبەۋدىڭ يەگەرى. ەڭ قىزىعى, دجەسسيكانىڭ ۇشاق جۇرگىزەتىن كۋالىگى بار. كادىمگى جارتىجىلدىقتىڭ ورنىنا ءۇش جىلدىق ۇشاق جۇرگىزۋ كۋرستارىنان ءوتتى. ول باسقاراتىن ۇشاق «Encoupe» دەپ اتالادى. پەدالى جوق ۇشاق. قازىر قايسار قىز 89 ساعاتتان استام ۇشۋ تاجىريبەسىنە يە ءارى الەم تاريحىنداعى العاشقى قولسىز ۇشقىش اتاندى.
ارمانى اسقاق اۆرورا
اۆرورا سكاي ءومىر ەسىگىن تۇرمەدە اشقان. جارىق دۇنيەگە تۇرمە ەسىگى ارقىلى وتكەن. ول اباقتىداعى انادان تۋىپ, جالعىزباستى اكەنىڭ تاربيەسىندە بولدى. ال قازىر ارمانى بيىك قىز گارۆارد ۋنيۆەرسيتەتىندە وقيدى.
اۆرورا اناسىمەن 14 جاسىندا ءبىر رەت قانا سويلەسكەن. قىز ءوز بەتىمەن ءبىلىم الىپ, اكادەميالىق قابىلەتتەرىن دامىتقان. ول گارۆاردقا تاپسىرعان ەسسەسىن «مەن تۇرمەدە دۇنيەگە كەلدىم» دەپ باستادى. ەسسە ءساتتى جازىلعان دەپ باعالانىپ, ءبىرشاما سىناقتان كەيىن زاڭگەر ماماندىعىنا وقۋعا ءتۇستى. ومىردە ءوز ورنىمدى تابۋعا, ءۇمىت پەن سەنىم كومەكتەستى دەيدى اۆرورا. ونىڭ ايتۋىنشا, اتا-اناسى تۇرمەدە وتىرعان بالالاردىڭ ءومىرى ناشار باستالىپ, ناشار اياقتالادى. بىراق تاعدىردىڭ توسقاۋىلىن ءتوزىم عانا جەڭبەك. جىل سايىن تۇرمەدە 2000-عا جۋىق بالا دۇنيە كەلەدى ەكەن. ولاردىڭ ءبارى اۆرورا بولا الا ما ەكەن؟..
