وقۋشىلاردىڭ جازعى دەمالىسىنا دايىندىق

وقۋ-اعارتۋ مينيسترلىگىنىڭ دەرەگىنشە, 1-10 سىنىپ ارالىعىنداعى وقۋشىلار سانى 3,1 ملن-نان اسادى. سالا ولاردىڭ 88%-ىن بەلسەندى جازعى دەمالىسپەن قامتۋدى جوسپارلاپ وتىر. وڭىرلەردە بالالاردىڭ ءتىزىمى تۇگەندەلىپ, لاگەرلەردەگى ورىندار ازىرلەنىپ جاتىر. ءبىرىنشى كەزەكتە ون­داعى سانيتار­لىق تالاپتاردىڭ ساقتالۋىنا ءمان بەرىلمەك. جالپى, بالالار ءۇشىن جىل بويى قىزمەت ەتەتىن, ماۋسىمدىق جانە مەكتەپ جانىنداعى لاگەرلەر جۇمىس ىستەيدى.

سونىمەن قاتار بيىل اي­ماق­تاردا قاناتقاقتى رەجىمدە بىرنەشە جاڭا جوبا جۇزەگە اسىرىلماق. ماسەلەن, قاراعاندى وبلىسىندا IT-لاگەر اشۋ جوس­پارلانىپ وتىر. ءوڭىر اكىمىنىڭ ورىنباسارى ەرلان قۇسايىننىڭ سوزىنشە, تەمىرتاۋداعى جوعارى پوليتەحنيكالىق كوللەدج بازاسىندا 100 بالا دەمالىستان بولەك, ءىت ماماندىقتىڭ قىر-سىرىمەن تانىسپاق. الداعى ۋاقىتتا بۇل تاجىريبەنى كەڭەيتۋ جاعى دا قاراستىرىلىپ جاتىر.

ال شىعىس قازاقستان وبلىسىندا «قوناقجاي وتباسى» جوباسى قولعا الىنعان. جوبا اياسىندا 120 بالا ءۇشىن كاتون-قاراعاي, گلۋبوكوە اۋداندارى مەن ريددەر قالاسىندا تانىمدىق ءىس-شارالار ۇيىمداستىرۋ كوزدەلگەن.

«بالالار اۋىلدىق جەر­دەگى وتباسىلاردا ۋاقىتشا قو­نىستانادى. ونداعى اتا-انا­لاردىڭ ءبىرى پەداگوگ بولۋى كەرەك. سونداي-اق بالالارعا قاجەت­تى بولەك بولمەسى, سانيتارلىق تالاپتاردىڭ ساقتالۋى ءجىتى قاداعالانادى. جوباعا قاتى­ساتىن وتباسىلارعا ارنايى اقى قاراستىرىلعان. وتباسىلىق لاگەردە بالالارعا اۋىلدىڭ تۇرمىسى, سالت-ءداستۇرىمىز بەن مادەني مۇرالارىمىز تانىس­تىرىلىپ, تاريحي ورىندار كورسەتىلەدى»,  دەدى وبلىس اكىمىنىڭ ورىنباسارى دارحان ساپانوۆ.

ۇلتتىق ءداستۇردى دارىپتەۋدى پاۆلودار وبلىسىندا ەتنولاگەرلەر ۇيىمداستىرۋ ارقىلى قولعا الۋدى ماقسات ەتىپ وتىر.

«وڭىرلەردەگى ۇزدىك تاجى­ريبەلەردى كەڭىنەن تاراتۋ جاعىن قاراستىرۋ كەرەك. ءبىز ءۇشىن ەڭ ماڭىزدىسى – لاگەرگە باراتىن بالالاردىڭ قاۋىپسىزدىگى. سوندىقتان مۇددەلى مەملەكەتتىك ورگاندار مەن جەرگىلىكتى اكىمدىكتەر بۇل ىستە بىرىگىپ جۇمىس ىستەۋى كەرەك. دەمالىستان, ساۋىقتىرۋدان بولەك, بالالاردىڭ جان-جاقتى دامۋىنا قاتىستى شارالاردىڭ مازمۇنىنا باسا ءمان بەرگەن ءجون. وقۋ-اعارتۋ مينيسترلىگى بۇل جۇمىستى تۇراقتى باقىلاۋىندا ۇستاۋى قاجەت. اتا-انالارعا ۇسىنىلاتىن جازعى دەمالىس تۇرلەرى بويىنشا اقپاراتتىق-ناسيحات جۇمىستارىن جۇرگىزگەن ءجون», دەپ اتاپ ءوتتى ت.دۇيسەنوۆا.

ايتا كەتەيىك, ەلدەگى سۋ تاس­قىنىنا بايلانىستى بىرقاتار ءوڭىردىڭ وقۋشىلارى ۋاقىتشا وقۋ-ساۋىقتىرۋ ورتالىقتارى مەن بالالار لاگەرلەرىنە ورنالاستىرىلدى. قازىرگى تاڭدا 651 بالاعا دەمالىس ورىندارىندا تۇرۋعا, تاماقتانۋعا, وقۋعا بارلىق جاعداي جاسالعان.