جۇرەكجۇتقان

فارحات بازارعاليەۆتىڭ پوليتسيا قاتارىندا قىزمەت ەتە باستاعانىنا كوپ بولا قويعان جوق. قوعامدىق ءتارتىپتىڭ كۇزەتشىسى رەتىندە باستاعان جۇمىسى ەندى جول قوزعالىسىنىڭ ساقتالۋىنا دا جاۋاپتى بولۋىمەن جالعاسىن تابۋدا. كۇندەلىكتى جۇمىسىن تىندىرىمدى اتقاراتىن پوليتسيا سەرجانتى بالا كەزدەن قوعامدىق ءتارتىپ ساقشىسى بولۋدى ارمانداپتى. قازىر اتىراۋ قالالىق ىشكى ىستەر باسقارماسىنداعى ارىپتەستەرى اراسىندا ونىڭ ەسىمى قۇرمەتپەن اتالادى. ويتكەنى, فارحات – تەك ارىپتەستەرىنىڭ عانا ەمەس, جۇرتشىلىقتىڭ دا شىنايى قۇرمەتىنە بولەنگەن قاھارمان پوليتسەي. ونىڭ ەسىنەن وتكەن جىلدىڭ 18 ماۋسىمىندا بولعان وقىس وقيعا كەتپەيدى. ءدال سول كۇنى ەرتەڭگىلىك «112» جەدەل قىزمەت كەزەكشىسىنە «جايىق وزەنىندە قايىق اۋدارىلدى» دەگەن تەلەفون حابارلاماسى ءتۇستى. ارتى وكىنىشكە ۇرىندىرار شۇعىل حابار راتسيا ارقىلى «باتىس-1» جىلجىمالى جول-پاترۋلدىك ەكيپاجىنا حابارلانادى. ەكيپاج قۇرامىنداعى پوليتسەيلەر – اعا سەرجانت ەربولات دوسجانوۆ, سەرجانت فارحات بازارعاليەۆ جانە كىشى سەرجانت رۋسلان تاناشەۆ ساناۋلى مينوتتەردەن كەيىن وقيعا ورنىنا جەدەل جەتتى. سويتسە, جايىق وزەنىنىڭ جاعالاۋىندا دىردەك قاققان ءۇش جىگىت وتىر. ولار وزەن ورتاسىندا اۋدارىلعان موتورلى «كازانكا» قايىعىندا بولعاندار ەكەن. جاعاعا دەيىن وزدەرى ارەڭ جەتكەن. ال وزەن ورتاسىندا جارتىلاي سۋعا باتقان قايىق جانىندا ءبىر ادامنىڭ باسى قىلتيادى. قايىقتا بىرگە بولعان جىگىتتەردىڭ ايتقانىنداي, سۋعا ءبىر باتىپ, ءبىر شىعىپ, الاسۇرعان بويجەتكەن ەكەن. ونىڭ باسى قىلت-قىلت ەتىپ ارەڭ كورىنەدى. شۇعىل كومەك قولىن سوزباسا, باياۋ بولسا دا اعىسى بار وزەن سۋىنىڭ تۇڭعيىعىنا باتىپ بارادى. نە ىستەۋ كەرەك؟ جىگىتتەردىڭ اراسىنان فارحات بازارعاليەۆ ويلانباستان وزەنگە قاراي «اتىلدى». ءتىپتى, كيىمىن شەشۋگە مۇرشاسى بولمادى. ويى – قىزدى قۇتقارۋ. كيىممەن قۇلاشتاي ءجۇزۋ قيىندىق تۋدىرعانىمەن, ايتىپ كەلمەيتىن اجال اپانىنداعى قىزعا جاقىنداپ كەلەدى. سۋدى مولشەردەن تىس كوپ جۇتىپ قويعان قورعانسىز قىزعا قولى جەتىسىمەن جاعاعا قاراي سۇيرەي جونەلدى. مۇندايدا جاعا دا جەتكىزىپ بولمايدى ەكەن. قۇددى الىستاپ كەتكەن سەكىلدى. ابىروي بولعاندا, ولاردى جاعادا «جەدەل جاردەم» دارىگەرلەرى دە كۇتىپ تۇردى. سول جەردە ەس-ءتۇسسىز جاتقان قىزعا العاشقى مەديتسينالىق كومەك كورسەتىلدى. كەيىن ءبىراز كۇن اۋرۋحانادا ەمدەلىپ, ورتاعا قايتا ورالدى. تۇرىمتايدان زورلىق كورگەن بوزتورعايداي ءارى قورقىپ, ءارى ابدىراپ قالعان بويجەتكەندى قۇتقارعان فارحات بازارعاليەۆ ارىپتەستەرىمەن بىرگە كەزەكشىلىگىن اتقارۋعا اتتانىپ كەتتى. وعان ءدال سول ساتتە دەمالۋعا بولمايتىن ەدى. ويتكەنى, پوليتسەيلەر كەزەكشىلىگى بىتكەنگە دەيىن قىزمەتىن اتقارۋ مىندەتى جۇكتەلگەن. دەگەنمەن, پوليتسيا سەرجانتى فارحات بازار­عاليەۆتىڭ باتىرعا ءتان باتىلدىق تانىتىپ, سۋعا بات­قان بويجەتكەندى قۇتقارعان قاھارماندىق ءىسى اۋەلى قالالىق باسقارماعا, كەيىن وبلىستىق ىشكى ىستەر دەپار­تامەنتىنە لەزدە تارادى. باسشىلار وعان جەكە قۇرام الدىندا العىس جاريالادى. جەرگىلىكتى باسىلىمدار ارقىلى پوليتسيا سەرجانتىنىڭ اتى جۇرتشىلىققا جاريا ەتىلدى. بىراق, فارحات بازارعاليەۆتىڭ ءوزى مۇنى «قاھارماندىق ءىس اتقارعان جوقپىن. مەنىڭ ورنىمدا بولعان ءار پوليتسيا قىزمەتكەرى ءدال سولاي ارەكەت ەتكەن بولار ەدى» دەپ قانا جىميادى. «قيىن ساتتە كومەك سۇراعان جانعا قولۇشىن سوزۋ – ازاماتتىق پارىزىم» دەگەندى دە قوسىپ قويدى. ءيا, پوليتسيا سەرجانتى فارحات بازارعاليەۆ تەك ازاماتتىق پارىزىن اتقارىپ قانا قويعان جوق, ءبىر ادامدى اجال اپانىنان سۋىرىپ الىپ, ءومىرىن ساقتاپ قالدى. سويتسە دە ماقتانۋدى بىلمەيتىن فارحاتتىڭ قاراپايىمدىلىعى اتا-اناسىنان دارىعان قاسيەت ەكەنىنە ءشۇبا جوق. ويتكەنى, ونىڭ اكەسى –جەتكىنشەك پەن اناسى –گۇلسوفيا دا وتە قاراپايىم جاندار. تەك زەينەت جاسىنا جەتپەسە دە ولاردىڭ جۇمىسسىز جۇرگەنى فارحاتتىڭ جانىنا باتادى. وتباسىنداعى جالعىز تابىس تابۋشى فارحات بازارعاليەۆتىڭ بەيبىت كۇندەگى باتىل ءىسى اتاۋسىز قالعان جوق. بىلتىرعى قاراشادا ىشكى ىستەر مينيسترلىگى ۇيىمداستىرعان «قازىرگى زامان قاھارماندارى» اتتى رەسپۋبليكالىق اكتسياعا اتىراۋلىق پوليتسەيلەر اتىنان قاتىسىپ, مينيستر ق. قاسىموۆتىڭ العىس حاتىنا يە بولدى. ال تاۋەلسىزدىك كۇنى مەرەكەسى قارساڭىندا پرەزيدەنت جارلىعىمەن «ەرلىگى ءۇشىن» مەدالىمەن ماراپاتتالدى. قاھارمان سەرجانتقا مەملەكەتتىك ماراپاتتى جەكە قۇرام الدىندا وبلىستىق ىشكى ىستەر دەپارتامەنتى باسشىسىنىڭ مىندەتىن اتقارۋشى ايان دۇيسەنباەۆ تابىس ەتكەن ساتتە فارحات بازارعاليەۆتىڭ: «قازاقستان رەسپۋبليكاسىنا قىزمەت ەتەمىن!» دەگەن داۋىسى ساڭق ەتتى. ءيا, شىندىعىندا بەيبىت كۇننىڭ باتىرى اتانعان قاھارمان سەرجانت ماراپاتتى الىسىمەن ەل تىنىشتىعى ءۇشىن قىزمەتىن اتقارۋعا اتتانىپ بارا جاتتى. جولداسبەك شوپەعۇل, «ەگەمەن قازاقستان». اتىراۋ.