تەلەمارافون بارىسىندا «Qazaqstan», «حابار», «Jibek Joly», «ەۋرازيا», «كتك», «31 ارنا», «Atameken Business», «Astana TV», «7 ارنا» جانە «Almaty TV» تەلەارنالارىنىڭ ەفيرىندە ورتالىق جانە جەرگىلىكتى بيلىك وكىلدەرى, دەپۋتاتتار تاسقىننىڭ سالدارى مەن مەملەكەت تاراپىنان قابىلدانىپ جاتقان شارالار تۋرالى جان-جاقتى اڭگىمەلەدى.
تەلامارافونعا تاسقىننىڭ زاردابىن جويۋعا جاۋاپتى بىرقاتار ۆەدومستۆو جەتەكشىلەرى: توتەنشە جاعدايلار ءمينيسترى شىڭعىس ءارىنوۆ, دەنساۋلىق ساقتاۋ ءمينيسترى اقمارال ءالنازاروۆا, قارجى ءمينيسترى ءمادي تاكيەۆ, ونەركاسىپ جانە قۇرىلىس ءمينيسترى قانات شارلاپاەۆ, قورعانىس مينيسترلىگىنىڭ رەسمي وكىلى رۋسلان جانگۋلين, سۋ رەسۋرستارى جانە يرريگاتسيا ءمينيسترىنىڭ ءبىرىنشى ورىنباسارى بولات بەكنياز, وقۋ-اعارتۋ ۆيتسە-ءمينيسترى ەدىل وسپانوۆ, پارلامەنت دەپۋتاتتارى, قازاقستان حالقى اسسامبلەياسىنىڭ وكىلدەرى مەن ەرىكتىلەر قاتىستى.
توتەنشە جاعدايلار ءمينيسترى ش.ءارىنوۆتىڭ ايتۋىنشا, بۇگىنگە دەيىن سۋ تاسقىنى بولعان ايماقتاردان 119 مىڭ ادام تولىق ەۆاكۋاتسيالاندى. ونىڭ 45 مىڭعا جۋىعى – بالا. توتەنشە وقيعا باستالعالى تاسقىن بولعان ايماقتارعا كومەككە قارۋلى كۇشتەردەن 5 400-دەن اسا جاۋىنگەر, 230 تەحنيكا, 12 تىكۇشاق, 5 اسكەري ۇشاق جۇمىلدىرىلدى.
تەلەمارافون بارىسىندا ونەركاسىپ جانە قۇرىلىس مينيسترلىگىنىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى قانات مىڭباەۆ: «جەر ۇيلەرى سۋعا كەتكەن ازاماتتاردىڭ باسپانا قۇرىلىسى 1 ماۋسىمدا باستالىپ, كەلەسى جىلىتۋ ماۋسىمىنا دەيىن جالعاسادى نەمەسە زارداپ شەككەندەرگە باعاسى 22 ملن-نان اسپايتىن دايىن پاتەرلەر ۇسىنىلادى», دەپ مالىمدەدى.
بۇگىنگە دەيىن تاسقىن زارداپتارىن جويۋعا مەتسەناتتار مەن ءىرى كومپانيالاردان 200 ميلليارد تەڭگەگە جۋىق قاراجات جينالعان. بۇل قاراجات مەكتەپتەر مەن ۇيلەر, بالاباقشالار مەن جول سالۋعا جۇمسالادى.
ء«بىز بىرگەمىز!» تەلەمارافونى بارىسىندا سۋ تاسقىنىنىڭ الدىن الۋ بويىنشا سۋ رەسۋرستارى جانە يرريگاتسيا ءمينيسترىنىڭ ءبىرىنشى ورىنباسارى بولات بەكنياز سۇحبات بەردى: «قازىر ەلىمىزدەگى بارلىق سۋ قويماسى تولىپ تۇر. جالپى, 2030 جىلعا دەيىن باتىس قازاقستان (2), اقتوبە (4), قىزىلوردا (1), تۇركىستان (3), جامبىل (3), الماتى (1), شىعىس قازاقستان (2), اباي (1), قاراعاندى (2), اقمولا (1) وبلىستارىندا جالپى سانى 20 كولەمدى سۋ قويماسىن سالۋ جوسپارلاندى», دەدى مينيسترلىك وكىلى.
تەلەمارافوندا تاسقىن سۋدىڭ الدىن الۋعا جانە زاردابىن جويۋعا جۇمىلعان كۇشتىك قۇرىلىمدارىنىڭ جۇمىسى مەن قيىن ساتتە ءبىر-بىرىنە قولۇشىن سوزا بىلگەن قاراپايىم ەل تۇرعىندارىنىڭ قايىرىمدى ارەكەتتەرى تۋرالى جان-جاقتى كورسەتىلدى. قولايسىز اۋا رايىنا قاراماستان 280 ادامدى ۇشاقپەن ەۆاكۋاتسيالاعان اسكەري ۇشقىش بيبارىس يبراەۆتىڭ, قايىقپەن 200 ادامدى قۇتقارعان اقتوبەلىك قۇتقارۋشى ەرسايىن نۇرجانوۆتىڭ, پەتروپاۆلداعى تاسقىن سۋدان زارداپ شەككەن تۇرعىنداردى تەگىن تاسىعان جۇرگىزۋشىلەر, ورال قالاسىنىڭ شەتىندەگى ساياجايلارعا سۋ جايىلىپ, ۇيلەرىندە قالىپ قويعان تۇرعىنداردى قۇتقارعان سەرجانتتار, مەكتەپ مۇلكىن سۋدان امان الىپ قالۋ ءۇشىن كۇرەسكەن قوستاناي وبلىسىنا قاراستى التىنسارين اۋىلىنىڭ مۇعالىمدەرى, مىڭنان اسا ۆولونتەردىڭ باسىن قوسقان «جۇرەكتەن – جۇرەككە!» ۆولونتەرلىك كلۋبىنىڭ مۇشەسى الىشەر سادىقتىڭ وقيعالارى باياندالدى.
قوعامدىق شتاب وكىلى اسكەر پيريەۆ تاسقىن كەزىندە قازاقستان حالقى اسسامبلەياسى اتىنان 12 مىڭعا جۋىق ەرىكتى قىزمەت ەتكەنى, «جۇرەكتەن – جۇرەككە!» اكتسياسى اياسىندا 800 ميلليون تەڭگەگە گۋمانيتارلىق كومەك كورسەتىلگەنى جونىندە اڭگىمەلەدى.
دەنساۋلىق ساقتاۋ ءمينيسترى اقمارال ءالنازاروۆا تەلەمارافوندا: «سۋ تاسقىنى ۇيلەرمەن قوسا مايىتتەردى, جانۋارلار كومىلگەن شۇڭقىرلاردى شايىپ كەتىپ, قاۋىپتى ىندەت تارالىپ كەتۋ قاۋپى بولدى. سوعان وراي ءبىز باس سانيتارلىق دارىگەردىڭ قاۋلىسىنا سايكەس ءتيىستى جۇمىس جۇرگىزىپ, سۋدىڭ سىناماسىن الىپ وتىرمىز. بۇگىنگە دەيىن 6 مىڭ نىسان دەزينفەكتسيالاندى. بارلىق ايماقتا دەزينفەكتسيالاۋ شاراسى ءالى دە ءجۇرىپ جاتىر. ماسكالىق رەجىم ەنگىزىلمەيدى», دەپ اتاپ ءوتتى.
تەلەمارافون بارىسىندا 10 ارنانىڭ تىكەلەي ەفيرىندە 48 سپيكەر تىكەلەي ەفيرگە شىقتى. تەلەمارافوندى 10 ارنادان 21 تەلەجۇرگىزۋشى جۇرگىزدى. تەلەمارافوننىڭ نەگىزگى ۇيىمداستىرۋشىسى – «Qazaqstan» تەلەراديوكورپوراتسياسى.
كورپوراتسيا باسشىسى ءلاززات تانىسباي: «قيىن كەزەڭدە بارىمىزگە كۇردەلى شەشىمدەر قابىلداۋعا تۋرا كەلەدى. وتاندىق تەلەۆيزيا تاريحىندا فورماتى مەن اۋقىمى جاعىنان مۇنداي مارافون تۇڭعىش رەت ءوتىپ وتىر. جەكەمەنشىك جانە مەملەكەتتىك ارنالار بىرىگىپ 5 ساعاتتىق ەفير ۇيىمداستىردى. بۇل جەردە حالىقتىڭ اۋىزبىرلىگىمەن قوسا, ەلىمىزدەگى تەلەارنا ماماندارىنىڭ ىنتىماعى دا ايقىن كورىندى», دەپ اتاپ ءوتتى.
«تەحنيكالىق مۇمكىندىكتەرىمىزدىڭ ءارتۇرلى بولۋىنا قاراماستان ءبىرتۇتاس ەفير شىعاردىق. تەلەمارافونعا سالالىق ارنا رەتىندە اتسالىسىپ, كورەرمەنگە بيزنەس سەكتورلارىنىڭ قيىن ساتتەگى قولداۋى تۋرالى جەتكىزدىك», دەدى «Atameken Business» تەلەارناسىنىڭ باس ديرەكتورى قانات ساحاريا.
«تەلەمارافون تەلەيندۋستريانىڭ اسا ىقپالدى بىرىكتىرۋشى كۇشىن تاعى ءبىر مارتە پاش ەتتى. وتاندىق تەلەارنالاردىڭ شىعارماشىلىق توبى تەلەۆيزيانىڭ يندۋستريا رەتىندە حالىقتى جۇمىلدىرا, قيىن ساتتەردە بىرىكتىرە الاتىن زور الەۋەتىن كورسەتتى. بىرلىگىمىز كۇشتى بولعاندا عانا مەملەكەت, قوعام بولىپ كەز كەلگەن قيىندىقتى ەڭسەرەمىز. تەلەمارافون اۋديتورياعا وسى بىرلىك پەن تۇتاستىقتى سەزىنۋگە مۇمكىندىك بەردى», دەدى «كتك» تەلەارناسىنىڭ باس ديرەكتورى ەلميرا دجاميلوۆا.
«سۋ تاسقىنىنىڭ زارداپتارىن جويۋعا بارلىق وتانداسىمىز ۇلەس قوستى. ونىڭ ىشىندە بۇقارالىق اقپارات قۇرالدارى دا شەت قالعان جوق. توتەنشە جاعداي باستالعالى بەرىلىپ جاتقان ۇزدىكسىز تىكەلەي ەفيرلەر بىرلىك كۇنى قارساڭىندا اۋقىمدى تەلەمارافونمەن قورىتىندىلاندى», دەدى «Almaty TV»تەلەارناسى باس ديرەكتورى تيمۋر بازارباەۆ.
ءىس-شارانىڭ ونلاين ترانسلياتسياسى 10 تەلەارنانىڭ ەفيرىندە, رەسمي سايتتارىندا, Facebook جانە YouTube جەلىلەرىندە, سونداي-اق http://t.me/bizbirgemiz_marathon telegram-ارناسىندا جۇرگىزىلدى.
