ناۋرىز ايىندا ونداعى جۇرتتان بەينەبايان جەتكەن. قىزىلسايادا وسكەن الەكساندر بوكك, پولينا بوكك, پاۆەل گەرتەلدەر وتباسىمەن اق داستارقان باسىنا جينالىپتى. قايدان تاپقانىن كىم ءبىلسىن, سارى قىمىز ساپىرۋلى. داستارقاننىڭ ۇستىندە نارتتاي قىزىل باۋىرساق. سالدەن سوڭ پاۆەل استاۋعا سالىنعان ەت اكەلدى. تۋىرىلىپ تۇسكەن قازى, قىرتىسى قالىڭ تۇتاس جامباس, ۇزىن ومىرتقا, جال مەن جايا. سودان سوڭ ءسوز سويلەگەن. وزدەرى اتاجۇرت سانايتىن قالىڭ ەلدى جىل باسىمەن قۇتتىقتادى. كۇنى كەشە كىر جۋىپ, كىندىك كەسكەن توپىراعىنا, ارتىندا قالعان ەلىنە بەرەكە, باقىت تىلەگەن. تەبىرەنىپ تۇردى, تولعانا ايتتى. ءسوزىنىڭ سوڭىندا گەرمانيادا قۇستىڭ سۇتىنەن باسقانىڭ ءبارى بار ەكەنىن, شارشىسىنا تولىپ تۇرسا دا, قيانداعى قىزىلسايانىڭ قوتانىنداعى تاسقۇدىقتىڭ تاستاي سۋىن ساعىناتىنىن جەتكىزگەن. ءدال سول ساتتە اق سارى ءوڭى الاۋلاپ, كىرپىگىنە تاسقۇدىقتىڭ ءمولدىر سۋىنداي قوس تامشىنىڭ ءىلىنىپ قالعانىن كوردىك.
تاسقۇدىعىن ءبىز دە كورگەنبىز. قىرىق كۇن شىلدەدە سۋى سارقىلمايتىن, ەتەك-جەڭى كەڭ پىشىلگەن قىزىلسايا اۋلىنىڭ جانى تۇرماق, مالىن دا مەلتەكتەتىپ ءشولىن قاندىراتىن قۇدىق. تابيعي تاستارمەن شەگەندەلگەن, جوعارى جاعى جۋان اعاشتارمەن كوتەرىلگەن كونە قۇدىقتىڭ سۋىن ەشبىر زەرتحانا تەكسەرىپ كورمەگەن. ايتسە دە, نەشەمە جىلدان بەرى شولىركەگەن جاننىڭ ءشولىن قاندىرىپ كەلە جاتىر. ءۇرىپ ءىشىپ, شايقاپ توگىپ وتىرعان گەرمانياداعى نەمىس اعايىن وسى قۇدىقتىڭ سۋىن اڭسايدى.
بىلتىر ءبىر قاۋىم جۇرت, الدەنەشە وتباسى بىرلەسە ساپارلاپ, ىستىق ۇيالارىنا كەلىپ كەتكەن. تۋعان جەردىڭ توپىراعىنا تاباندارى تيىسىمەن مۇنداعى جۇرتتىڭ قىزىعىنا قايىرلى بولسىن, قايعىسىنا قايىرىن بەرسىن دەپ كوڭىل بىلدىرگەن. بۇرىنعىنىڭ جولىمەن باتا جاساپتى. اۋىلداعى مولدا اتانى الدىرىپ, قۇران باعىشتاتىپتى. وبلىس ورتالىعىنداعى مەشىتتىڭ اسحاناسىندا وزدەرى جاقسىلىعىن كوپ كورگەن, قۇددى ەت جاقىن تۋىستارىنداي بولىپ كەتكەن جەرلەستەرىنىڭ ارۋاعىنا باعىشتاپ اس بەرىپتى.
– جامان اۋرۋدان جاسقانىپ, بىرەر جىل ەل بەتىن كورە الماي كەتتىك, – دەپتى الەكساندر بوكك, – قايعىلارىڭىزعا ورتاقپىز. ءبىر ءۇيدىڭ بالاسىنداي بولىپ ءوسىپ ەدىك. قيان شەتتە جۇرسەك تە, سىزدەردى ويلاپ جۇرەمىز. جالعىز قىزىلسايانىڭ عانا ەمەس, تۇتاس قازاقستاننىڭ جەتىستىگىن, جاقسىلىعىن ەستىسەك, توبەمىز كوككە ءبىر ەلى جەتپەي قالادى.
ءدام قايتارىپ تۇرعان سوڭ, الەكساندردى قاۋمالاعان مۇنداعى جۇرت ۇدەرە كوشكەن ەلدىڭ اماندىق-ساۋلىعىن سۇراعان.
– سەن مۇسىلمان ەمەسسىڭ عوي, – دەپ قالجىڭداپتى قۇرداسى دۋمان, – مەشىتكە نەگە كىرەسىڭ؟
– نيەتىمىز تازا, – دەگەن الەكساندر بوكك, – كەشە مونشاعا تۇستىك, عۇسىل دارەت الدىق, ءتانىمىز تازاردى. ال جانىمىز ەجەلدەن تازا عوي.
قالاي تاماشا ايتقان. قارا ءسوزدىڭ قايماعىن قالقيتىن ءبىزدىڭ شەشەندەر ءدال وسىلاي ايتا الار ما ەدى؟
كوكشەتاۋ قالاسى
