يتاليادا جۇمىسسىزدىق دەڭگەيى رەكوردتىق كورسەتكىشكە جەتتى

استانا. 9 قاڭتار. يتاليادا جۇمىسسىزدىق دەڭگەيى بۇرىن-سوڭدى بولماعان رەكوردتىق كورسەتكىشكە جەتتى. بۇل تۋرالى ras.kz حابارلادى. قازىر مۇندا ەڭبەككە جارامدى جۇرتتىڭ 13,4 پايىزى جۇمىسسىز وتىر. اپپەنين تۇبەگىندەگى يستات ۇلتتىق ستاتيستيكا ينستيتۋتى سارسەنبى كۇنى مۇنىڭ 1977 جىلدان بەرگى ارالىقتاعى ءابسوليۋتتى جوعارى ناتيجە ەكەنىن جاريالاپ ۇلگەردى. مىنە, جاڭا جىلدىڭ باسىندا بۇل ەلدە وسىلايشا بۇدان 38 جىل بۇرىن تىركەلگەن رەكوردقا وزگەرىس ەنگىزىلىپ وتىر. ال مۇنىڭ العى شارتى وتكەن جىلدىڭ قاراشا ايىندا بايقالا باستاعان بولاتىن. سول كەزدە ەلدەگى جۇمىسسىز ادامدار سانى 3,45 ملن. ادامعا جەتىپ, كورسەتكىش سونىڭ الدىنداعى قازان ايىنان 1,2 پايىزعا اسىپ تۇسكەن ەدى. وسى كۇندەرى جۇمىسسىز جۇرگەن جاستار قاتارى تاريحي تۇرعىداعى ەڭ جوعارى مولشەرگە كوتەرىلىپ كەتتى. ولاردىڭ 43,9 پايىزى جۇمىسسىزدىقتىڭ قامىتىن كيۋگە ءماجبۇر بولعان. وسىنداي تەندەنتسيانىڭ كۇشەيىپ كەلە جاتقانىنا قاتتى الاڭداۋشىلىق بىلدىرگەن يتاليان پارلامەنتى وتكەن جىلدىڭ سوڭىندا ەڭبەك رىنوگىنا مەيلىنشە قولايلى جاعداي تۋدىرۋعا باعىتتالعان زاڭدى ماقۇلدادى. سوعان قاراماستان, بۇل قۇجات ۇلتتىق كاسىپوداقتار تاراپىنان ىمىراسىز نارازىلىق تۋعىزدى. وسىنىڭ الدىندا عانا ەۋروپا پارلامەنتى گرەكيا, يتاليا, پولشا جانە فرانتسيا ەلدەرىنە جۇمىسسىزدىقپەن كۇرەسكە كومەك رەتىندە 35,5 ملن. ەۋرو قارجى ءبولۋ جونىندە شەشىم قابىلدادى. شەشىمگە ستراسبۋرگتە وتكەن پلەنارلىق سەسسيادا قول جەتتى. ال قاراجات پارلامەنت شەشىمىن ەۋروپا كەڭەسى ماقۇلداعاننان كەيىن بارىپ, ەۋروپانىڭ جاھاندانۋعا بەيىمدەلۋ قورىنان بولىنەتىن بولادى. پارلامەنت دەپۋتاتتارىنىڭ ايتۋلارىنشا, وسىنىڭ ارقاسىندا اتالعان مەملەكەتتەر بيلىكتەرى ەۋروپاداعى جاھاندانۋ ۇدەرىسى مەن ەكونوميكالىق كەرەعارلىقتاردىڭ زارداپتارىنان جۇمىسسىز قالعان 6 مىڭنان استام ادامعا ءناپاحا تاۋىپ بەرە الادى. مۇنداعى اڭگىمە نەگىزىنەن پارسى شىعاناعى ەلدەرى اۆياتاسىمالداۋشىلارى تاراپىنان باسەكەلەستىكتىڭ كۇشەيە تۇسۋىنە جانە وتىن باعاسىنىڭ كۇرت قىمباتتاپ كەتۋىنە بايلانىستى جۇمىستان شىعىپ قالعان فرانتسۋزدىڭ Air France اۆياكومپانياسىنىڭ 3,8 مىڭنان اسا قىزمەتكەرى تۋرالى بولىپ وتىر. وسى ءۇشىن فرانتسيا ۇكىمەتى اتالعان قوردان 26 ملن. ەۋروعا جۋىق اقشا الادى. بۇل ەۋروپارلامەنتتىڭ قۇرىلعالى بەرى وسىنداي ماقساتتى تىرلىككە بەرىپ وتىرعان ەڭ كوپ سوماسى بولعالى تۇر. الەم ەكونوميكاسىنداعى قيىندىقتار سونداي-اق تۇتىنىم سۇرانىسىنىڭ ءتۇسىپ كەتۋىنە دە اپارىپ سوقتىردى. وسىنىڭ سالدارىنان گرەكتىڭ Odyssefs Fokas اتتى بولشەك ساۋدا جۇيەسى ساۋدا كولەمىن كۇرت كەمىتىپ الىپ, 600 ادامدى جۇمىستان شىعارىپ جىبەرۋگە ءماجبۇر بولدى. كومپانيا سونداي-اق گرەك بانك جۇيەسىندەگى پروبلەمالاردىڭ سالدارىنان ايتارلىقتاي اۋقىمدا قارجىلاي شىعىنعا باتتى. ناتيجەسىندە افينا ەۋروپا وداق قورىنان 6,44 ملن. ەۋرو مولشەرىندە كومەك الاتىن بولدى. دەپۋتاتتار سول سياقتى يتاليانىڭ تەرىستىگىندەگى ترەنتو اۆتونوميالى پروۆينتسياسىندا ورنالاسقان تۇرمىستىق تەحنيكالار شىعاراتىن Whirlpool زاۋىتىنا 1,89 ملن. ەۋرو شاماسىندا قارجىلاي جاردەم بەرۋگە ۇيعارىم جاسادى. مۇندا دا سۇرانىستىڭ ءتۇسىپ كەتۋىنە بايلانىستى 600 ادام جۇمىستان شىعىپ قالعان. ءبىر جاعى وسىنىڭ دا اسەر ەتۋى سالدارىنان ايماقتا 2013 جىلى جۇمىسسىزدىق دەڭگەيى 6,1 پايىزعا دەيىن كوتەرىلىپ كەتتى. مۇنداي قيىندىقتاردى پولشا كاسىپورىندارى دا تارتىپ جاتىر. سونىڭ ءبارى – يتالياننىڭ Fiat اۆتوموبيلدەرىن شىعاراتىن زاۋىت تا سۇرانىستان قاعىلىپ, 1 مىڭ ادامدى جۇمىسسىز قالدىردى. ەۋروپارلامەنت سوندىقتان زاۋىتتان كەتكەن 770 ادامدى قايتارىپ اكەلۋ ءۇشىن 1,26 ملن. ەۋرو بولۋگە ارەكەت جاساۋدا. جالپى, ەۋروپانىڭ جاھاندانۋعا بەيىمدەلۋ قورىنىڭ اقشالاي جيىنتىعىنىڭ كولەمى 150 ملن. ەۋرونى قۇرايدى. ول جىل سايىن تولىعىپ تۇرادى. 2006 جىلى قۇرىلعان قور باسەكەلەستىكپەن كۇرەستە جەڭىلىس تاپقان ترانسۇلتتىق كومپانيالار مەن جەكەلەگەن وندىرۋشىلەرگە كومەك كورسەتۋمەن اينالىسادى. ادەتتە قوعامداستىق ەلدەرى جۇرتتى جۇمىسقا ورنالاستىرۋ ماسەلەسىن ءوز بەتتەرىنشە تەز شەشىپ وتىرۋعا ۇمتىلادى. سودان كەيىن ەۋروپا وداعىنىڭ كومەگىنە جۇگىنەدى. ايتكەنمەن, بۇل جولى باستالعان جۇمىسسىزدىق تولقىنىنىڭ جۋىر ماڭدا قايتا قالاتىن ءتۇرى كورىنبەيدى. ايدار ورىسباەۆ. دەرەك: ras.kz. سۋرەت: euromag.ru.