ۇلتتىق ستاتيستيكا بيۋروسىنىڭ دەرەگىنشە, ەلىمىزدە ورىس (15,1%) ەتنوسىنان كەيىن كوپ قونىستانعاندار – وزبەكتەر (3,2%). ءار ەتنوس وكىلدەرىنىڭ اراسىندا ۇلتىمىزدىڭ ۇلتتىق قۇندىلىقتارىنا اسا قىزىعۋشىلىقپەن قاراپ, قۇرمەت تۇتاتىندار وراسان. ءبىزدىڭ بۇگىنگى كەيىپكەرىمىز ديلنوزاتادجيمەتوۆا دا وسى قاتاردا. تۇركىستان وبلىسى, ساۋران اۋدانىنىڭ تۇرعىنى ءبۇلدىرشىن كەزىنەن قازاقتىڭ ءداستۇر-جورالعىسىن جەتىك بىلۋگە ىنتىق بولعان. قازاق حالىقىنىڭ قۇندىلىقتارىنا قۇمارتىپ وسكەن بۇرىمدى دومبىرا شەرتۋدى 15 كۇندە ۇيرەنىپ العان.
«جۇمابەك تاشەنوۆ اتىنداعى مەكتەبىمىزدە اقىلى دومبىرا ۇيىرمەسىنە بارىپ جۇرگەنىمە ءساۋىر ايىندا ءبىر جىل تولدى. دومبىرانى قولعا الۋىما ۇستازىم ۇلجالعاس ءابىلداحان اسەر ەتتى. ۇستاز العاش رەت دومبىراسىن ۇستاپ كىرىپ كەلگەندە كەرەمەت اسەرگە بولەندىم. اپايىمنىڭ سول كەزدەگى بەينەسى تاريحتاعى ونەرلى تۇلعالاردى كوز الدىما كەلتىردى. كوزدىڭ جاۋىن الاتىن بۇرمەلى كويلەك, ويۋمەن ورنەكتەلىپ, مونشاقتارمەن ادىپتەلگەن قازاقتىڭ ۇلتتىق كيىمىندە, ۇلتتىق اسپاپ دومبىرامەن ءداستۇرلى ءاندى شىرقاي بىلگەنىم, ءبىر جىل بۇرىن وسىنىڭ ءبارىن ۇيرەنۋگە بەل بايلاعانىم مەن ءۇشىن ماڭىزدى مارتەبە», دەيدى ديلنوزا زاريفقىزى.
(ديلنوزا تادجيمەتوۆا ۇستازى ۇلجالعاس ابىلداحانمەن)
ديلنوزا دومبىرا ۇيىرمەسىنە ءۇيىر بولعان ءبىر جىلدا التى ءداستۇرلى قازاق ءانىن ۇيرەنىپ العان. ول قازاقتىڭ سازى, ءانى كەڭ دالاسىنداي, دارحان كوڭىلىندەي تەرەڭ ەكەنىن تولعايدى.
«دومبىرا قۇندى, كيەلى - اسپاپ. ۇكىلى دومبىرا ۇيگە ءسان بەرىپ قانا قويماي, بەرەكە كىرگىزەدى», دەپ سيپاتتاعاندا ءسۇيسىنىپ قالدىق.
كەيىپكەرىمىز ءتۇرلى ءداستۇرلى ءان بايقاۋلارىندا باق سىناپ, شەبەرلىگىن شىڭداپ ءجۇر. وتكەن جىلى مادەنيەت جانە اقپارات مينيسترلىگى ۇيىتقى بولعان «مىڭ بالا» جوباسىندا ديلنوزا بارلىق كەزەڭدى ارتقا قالدىرىپ, رەسپۋبليكالىق مارەدە دە ءبىرىنشى بولدى. وسى سايىستا «سۇگىردىڭ تەرمەسىن» شىرقاعان ديلنوزا كوپشىلىكتىڭ دە كوڭىلىنەن شىقتى.
- «مىڭ بالا» جوباسىنىڭ قورىتىندى ساتىسىندا ۆوكال, دومبىرا, قوبىزداعى ورىنداۋشىلار «ونەرلى ورگە جۇزەر» اتالىمىندا سىنعا تۇستىك. 35 وڭىرلىك جەڭىمپازدار ماراپاتتالدى. باس قالادا وتكەن وسى تارتىستى باسەكەدەن كەيىن مەن جوعارى وقۋدى مۋزىكا باعىتىندا جالعاستىرامىن دەپ شەشتىم. بولاشاقتا ءداستۇرلى ءان ۇيرەتەتىن ۇستاز بولعىم كەلەدى. اسەم قالا ءبىزدى شابىتتاندىردى», دەدى ديلنوزاتادجيمەتوۆا.
سونداي-اق ديلنوزانى ۇستازدارى ايتىس ونەرىنە دە باۋلىپ ءجۇر ەكەن. قازاقتى ونەر ارقىلى سۇيگەن ول سۋىرىپ سالىپ ايتۋدى تەرەڭ مەڭگەرگەن حالىقتىڭ ورتاسىندا وتىرىپ, ونى مەڭگەرمەي, ۋاقىتتى بوس وتكىزۋگە بولمايتىنىن ايتتى.
