فوتو: akorda.kz
باسقوسۋعا قۇزىرلى ورگانداردىڭ وكىلدەرى, يۋنەسكو-نىڭ ورتالىقتارى مەن كافەدرالارىنىڭ جەتەكشىلەرى, كوميسسيا جانىنداعى ۇلتتىق كوميتەتتەردىڭ باسشىلارى, سونداي-اق يۋنەسكو-نىڭ الماتى قالاسىنداعى ايماقتىق كەڭسەسىنىڭ وكىلدەرى قاتىستى.
جيىندا بۇكىلالەمدىك گۋمانيتارلىق ۇيىممەن ءوزارا ىقپالداستىقتى دامىتۋ ماسەلەلەرى تالقىلاندى. ەرلان قارين اتىراۋدا وتكەن ۇلتتىق قۇرىلتايدىڭ ءۇشىنشى وتىرىسىندا مەملەكەت باسشىسى ەلىمىزدىڭ يۋنەسكو-مەن اراداعى ىنتىماقتاستىعىنىڭ باسىمدىقتارىن ايقىنداپ بەرگەنىن ايتتى. پرەزيدەنت قۇرىلتايدا قازاقستاننىڭ بۇكىلالەمدىك مۇرا كوميتەتىنە مۇشە بولعانىن اتاپ ءوتىپ, ەلىمىزدىڭ مادەني جانە تابيعي مۇرالارىن يۋنەسكو-نىڭ دۇنيەجۇزىلىك مۇرا تىزىمىنە ەنگىزۋگە قاتىستى ناقتى تاپسىرمالار بەردى.
مەملەكەت باسشىسى عىلىم جانە تەحنولوگيالار جونىندەگى ۇلتتىق كەڭەستىڭ ءساۋىر ايىنداعى وتىرىسىندا كليماتتىڭ وزگەرۋىنە بايلانىستى يۋنەسكو اياسىندا الماتىداعى وڭىرلىك گلياتسيولوگيالىق ورتالىقتىڭ جۇيەلى تۇردە جۇرگىزىپ وتىرعان زەرتتەۋلەرىنىڭ ماڭىزدىلىعىنا ايرىقشا نازار اۋداردى.
وسى ورايدا مەملەكەتتىك كەڭەسشى ۋاكىلەتتى ورگاندارعا قازاقستان رەسپۋبليكاسى مەن يۋنەسكو اراسىنداعى ورتالىققا قاتىستى كەلىسىمنىڭ مەرزىمىن ۇزارتۋ ماسەلەسىن پىسىقتاۋدى تاپسىردى.
باسقوسۋدا يۋنەسكو-نىڭ ايماقتىق كەڭسەسى باسشىسىنىڭ مىندەتىن اتقارۋشى ايگۇل حالافوۆا يۋنەسكو جانە يسەسكو ىستەرى جونىندەگى ۇلتتىق كوميسسياسىنىڭ توراعاسى ەرلان قارينگە «تۇراننىڭ قىسقى سۋىق شولدەرى» كوپۇلتتىق اتالىمىنىڭ قۇرامداس بولىگى رەتىندە «التىن ەمەل» ۇلتتىق پاركى مەن بارساكەلمەس قورىعى يۋنەسكو-نىڭ دۇنيەجۇزىلىك مۇرا تىزىمىنە 2023 جىلى ەنگىزىلگەنىن راستايتىن سەرتيفيكاتتىڭ تۇپنۇسقاسىن تاپسىردى.
