تاۋەلسىزدىك – ءبىز ءۇشىن ۇلى ۇعىمداردىڭ ءبىرى. ونىڭ قۇنىن دا, پايداسىن دا, قاسيەتىن دە بىلەمىز. تاۋەلسىزدىككە قول جەتكىزگەننەن گورى, ونى ماڭگى ۇستاپ قالۋ ودان الدەقايدا قيىن. بۇل – الەم كەڭىستىگىندە عۇمىر كەشكەن تالاي حالىقتىڭ باسىنان وتكەرگەن تاريحي شىندىق. ءوزارا الاۋىزدىق پەن جان-جاققا ءجونسىز تارتقان بەرەكەسىزدىك تالاي ەلدىڭ تاعدىرىن قۇردىمعا جىبەرگەن. سوندىقتان ەلىمىزدە تۇرىپ جاتقان ەتنوستاردىڭ ىشكى تاتۋلىعىن كوزدىڭ قاراشىعىنداي ساقتاي ءبىلۋ كەرەك.
تاۋەلسىزدىككە قول جەتكىزگەن تۇستا قازاقستاندا تۇرىپ جاتقان ەتنوستاردىڭ ۇلتتىق قۇندىلىقتارى مەن سالت-داستۇرلەرىن قايتا جاڭعىرتۋعا مۇمكىندىك تۋدى.
قازاقستانداعى ۇلتارالىق جاراستىقتىڭ نەگىزگى ۇيىتقىسى بولۋ مىندەتىن الدىمەن وسى اتامەكەننىڭ يەسى – قازاق حالقى ءوز موينىنا الۋ كەرەك. ادىلەتتى قازاقستاندى قۇرۋ ءۇشىن ءبىز كەلىسىم ساياساتى مەن پاراساتتى ۇلتتىق ستراتەگيامىزدى ىسكە اسىرۋىمىز قاجەت. بۇل جۇمىستىڭ باسىندا قازاقستان حالقى اسسامبلەياسى تۇر. كەيىنگى كەزدە قازاقستان حالقى اسسامبلەياسىنا قاتىستى قوعامدا ءتۇرلى سىني پىكىر ءجيى كورىنىس بەرىپ ءجۇر. ەلىمىزدە قوعامدىق كەلىسىم مەن جالپىۇلتتىق بىرلىك يدەياسىنىڭ جول باستاۋشىسىنا اينالعان اسسامبلەيا ارقىلى ءاربىر ەتنوستىڭ مۇددەسى قورعالادى. اسسامبلەيا – تاۋەلسىزدىگىمىزدىڭ قۇندىلىقتارىنىڭ ءبىرى, ەلدىڭ قۋاتتى بىرلىگى. ارينە, ۋاقىت تالابىنا ساي, قحا جۇمىس فورماتىن وزگەرتكەنى ءجون. ەلىمىزدىڭ ساياسي جۇيەسى جەتىلدىرىلىپ جاتقان كەزدە اسسامبلەيانىڭ جۇمىسىن ۇيىمداستىرۋ جولدارىن قايتا قاراۋ قاجەت. ەڭ الدىمەن, ەتنوپوپۋليزمگە جول بەرمەۋ كەرەك. حالىقتىڭ اراسىندا ىرىتكى سالاتىن وتە قاۋىپتى بۇل دەرت بار جەردە ەشقاشان دا ۇلتتىق يدەيالار جۇزەگە اسقان ەمەس. بۇل – وتىرىك ۋادە بەرەتىن, داڭعازا ۇرانداردى ناسيحاتتايتىن, تەك جەكە امبيتسيالارىمەن ءومىر سۇرەتىن ادامداردىڭ بويىنداعى كەساپات. ارينە, ءار زاماننىڭ ەرەكشەلىكتەرىنە ساي ەتنوپوپۋليزم جاعدايعا بايلانىستى تەز وزگەرىپ تۇرادى. قازاقستاننىڭ ەتنودەموگرافيالىق جاعدايىندا ەتنوپوپۋليزمگە جول بەرمەۋ وتە ماڭىزدى.
قازاقستان قۇقىقتىق جانە دەموكراتيالىق مەملەكەت رەتىندە قالىپتاسۋ جولىندا ناتيجەلى قادامدار جاساپ كەلەدى. سول ءۇشىن دە كونستيتۋتسياعا وزگەرىستەر ەنگىزىلدى. كونستيتۋتسيالىق سوت جۇمىسىن باستادى. ەڭ باستىسى, زاڭداردىڭ ورىندالۋى. ەلىمىزدە «زاڭ مەن ءتارتىپ» قاعيداتى ورنىعۋى قاجەت. ءار وتانداسىمىز قۇقىقتىق جانە دەموكراتيالىق مەملەكەتتىڭ ازاماتىنا لايىق, پرەزيدەنت ايتقانداي, «وتانشىل, ءبىلىمپاز, ەڭبەكقور, ءتارتىپتى, ادال, ءادىل, ۇنەمشىل ءارى جاناشىر» بولۋى كەرەك. وسى قاسيەتتەردى ەڭ الدىمەن بۇگىنگى جاستاردىڭ بويىنا ءسىڭىرۋ ماڭىزدى. ادىلەتتى قازاقستاندى قۇرۋ ءۇشىن قوعامدىق سانامىز بەن ازاماتتىق نيەتىمىزدى وزگەرتۋ قاجەت.
ۇلتتىق يدەولوگيانىڭ ءتۇپ-تامىرى – ءبىلىمدى قوعام ارقىلى قازاقستانعا رۋحاني سەرپىلىس جاساۋ. بىلىمپازدىق پەن جاڭاشىلدىق ءبىرىنشى ورىندا تۇرۋى كەرەك. ۇلتتىق يدەولوگيانىڭ دامۋ جولىندا جالعاندىققا جول بەرۋگە بولمايدى. جاستارىمىز ءوسىپ-وركەندەسىن دەسەك, ولاردى جاقسىدان ۇيرەنىپ, جاماننان جيرەنە بىلۋگە تاربيەلەۋ قاجەت.
قازىر الەم كۇن سايىن وزگەرۋدە: جاڭا تەحنولوگيالار, ماماندىقتار جانە سالالار پايدا بولىپ جاتىر. وسىنداي جاعدايدا جاستارىمىز جاڭا كاسىبي داعدىلاردى مەڭگەرىپ, وزىق ءبىلىمىن ءتيىمدى پايدالانۋعا دايىن بولۋ كەرەك. ويتكەنى رۋحاني سەرپىلىس جاڭا ساپالى ءبىلىم الۋدان باستالادى. سانانىڭ وزگەرۋى ۇلتتىق يدەولوگيانىڭ دامۋىنا تىكەلەي بايلانىستى. بىزگە حالقىمىزدىڭ قۋاتىن ارتتىراتىن, تولاعاي تابىستارعا جەتەلەيتىن, جالپىۇلتتىق قۇندىلىقتارىن دامىتاتىن يدەولوگيا كەرەك. بۇل باعىتتا زيالى قاۋىم وكىلدەرى ءوز ۇلەسىن قوسۋعا ءتيىس.
ماحمەتعالي سارىبەكوۆ,
قازاقستاننىڭ ەڭبەك سىڭىرگەن قايراتكەرى
تاراز
