كوللاجدى جاساعان – زاۋرەش سماعۇل ,«EQ»
بيىل 29 ناۋرىزدان باستاپ وبلىس ورتالىعىنداعى دوستىق ءۇيىنىڭ جانىنان «جومارت جان» ورتالىعى جۇمىس ىستەي باستاعان ەدى. ورتالىق كۇنى بۇگىنگە دەيىن 210 مۇقتاج وتباسىنا كومەك قولىن سوزدى. سۋ تاسقىنىنان زارداپ شەككەندەرگە جالپى قۇنى 800 مىڭ تەڭگە بولاتىن ازىق-ت ۇلىك, توسەك ورىن جابدىقتارىن جەتكىزدى. «سانگي-كابۋد» تاجىك ۇلتتىق مادەني ورتالىعى وبلىس ورتالىعىنىڭ قىزىل سۋ باسقان كوشەلەرىن تازالاۋ ءۇشىن بەس تەحنيكا ءبولدى. قالا ىرگەسىندەگى توپان سۋدان تاقسىرەت تارتقان قىزىل جۇلدىز اۋلىنا ازىق-ت ۇلىك, ءدارى-دارمەگىن جەتكىزىپ بەرىپ, العىس ارقالاپ قايتتى. ەتنومادەني ورتالىق قىلشاقتى وزەنىنىڭ جاعالاۋىن بيىكتەتەتىن قۇم سالعان قاپتاردى دايىندادى. لىقسىعان سۋمەن الىسىپ جۇرگەن قۇتقارۋشىلار مەن ەرىكتىلەردى سۋ وتكىزبەيتىن كيىمدەرمەن قامتاماسىز ەتىپ, ىستىق استان ءدام تاتىردى. كوكتەمگى سۋ تاسقىنىنان زارداپ شەككەن اۋداندارعا قۇنى 400 مىڭ تەڭگە بولاتىن تۇرمىستىق حيميا زاتتارىن جونەلتتى. تۇگەل ەسەپتەسەڭىز, جاردەم كولەمى 6,4 ملن تەڭگەنى قۇرايدى.
«ماناس» قىرعىز ەتنومادەني بىرلەستىگى 1,5 ملن تەڭگەنىڭ توسەك ورنى مەن بالالارعا قاجەتتى زاتتاردى ۇسىندى. «باري» ارميان ەتنومادەني بىرلەستىگى 3 اۋىر جۇك كولىگى مەن 2 ەكسكاۆاتورىن بەرىپ, كومەك قولىن سوزدى. ولار دا 3,1 ملن تەڭگەنىڭ جاردەمىن جاسادى. چۋۆاش, وزبەك ەتنومادەني ورتالىقتارى زارداپ شەككەندەر مەن قۇتقارۋشىلارعا 800 مىڭ تەڭگەنىڭ ازىق-ت ۇلىگىن جەتكىزىپ, ىستىق تاماقپەن قامتاماسىز ەتتى. وبلىستىق ءماسليحاتتىڭ دەپۋتاتتارى, قازاقستان حالقى اسسامبلەياسى اقمولا فيليالىنىڭ مۇشەلەرى جالپى قۇنى 2,5 ملن تەڭگە بولاتىن 1840 كگ ازىق-ت ۇلىك جەتكىزسە, «امانات» پارتياسىنىڭ مۇشەلەرى تۇرمىستىق بۇيىمدارىن ۇسىندى.
جاقسى ىستەن جالپى جۇرت تا شەت قالعان جوق. كوكشەتاۋ قالاسىنىڭ قاراپايىم تۇرعىندارى حال-قادەرىنشە قاراجات جيناپ, كۇندەلىكتى اسا قاجەتتى تاۋارلارمەن قامتاماسىز ەتتى.
حالىق كوڭىلى كول ەمەس پە؟ ەڭ باستىسى – ىستىق جۇرەكتىڭ شاراپاتى. قورعا جينالعان قىرۋار دۇنيە كوبىرەك زارداپ شەككەن اتباسار اۋدانىنا جونەلتىلدى. الماتى قالاسىنان «Atasu» قايىرىمدىلىق قورى جىبەرگەن 5 ملن تەڭگەنىڭ 11 توننالىق جۇگى جەتكەندە, كوڭىل ءبىر دەمدەلىپ قالدى. گۋمانيتارلىق كومەكتىڭ ءبىر پاراسى جاقسى اۋدانىنا جولداندى. ءدال وسىنداي كومەك اتباسار, استراحان, ەسىل جانە جارقايىڭ اۋداندارىنا جونەلتىلدى. جالپى قۇنى 4 ملن تەڭگەنىڭ شاماسىندا.
تابيعاتتىڭ تارپاڭ مىنەزى سالدارىنان قيىندىققا ۇشىراعان كوكشە جۇرتشىلىعى جالعىز ەمەس ەكەن. دەمەگەندەر دە, جەبەگەندەر دە كوپ. پاۆلودار وبلىسىنىڭ جاستار رەسۋرستىق ورتالىعىنان ەكى «گازەلگە» تيەلگەن گۋمانيتارلىق جۇك كەلدى. بارلىعى 5,8 ملن تەڭگە شاماسىنداعى زاتتار. جامبىل وبلىسىنان ءتورت كاماز-عا تيەلگەن كوكونىس پەن جەمىس, قۇرال-جابدىقتار ەلدىڭ ىستىق ىقىلاسى ءتارىزدى بولىپ جەتتى. بىردەن اتباسار قالاسىنا اتتاندىرىلدى.
قازىرگى كۇنى بۋراباي باۋرايىنداعى «بالداۋرەن» ساۋىقتىرۋ ورتالىعىندا سۋ باسقان وڭىرلەردەن كەلگەن 100 بالا الاڭسىز دەم الىپ جاتىر. قاجەتتى كيىم-كەشەكپەن قامتاماسىز ەتىلگەن. ەڭ باستىسى – ەل بىرلىگى بەكەم. ىنتىماق بار جەردە قانداي قيىندىق بولسا دا, ەلدىڭ جەڭىپ شىعارىنا سەنىم مول.
اقمولا وبلىسى
