ۋنيۆەرسيتەت باسشىلىعى جاقىندا گونكونگقا بارىپ ينستيتۋتسيونالدىق سەرىكتەستىكتى نىعايتۋ ءۇشىن اكادەميالىق ۇتقىرلىق نەگىزىندە ستۋدەنت الماسۋ, باكالاۆر, ماگيستر جانە PhD دايارلاۋعا قاتىستى مەموراندۋمعا قول قويىپ قايتتى. ناتيجەسىندە, ينجەنەرلىك ءبىلىم بەرۋ مەن عىلىمدى دامىتۋ, جاڭا تەحنولوگيالار عىلىمي-زەرتتەۋ ورتالىعىن قۇرۋ, ساتباەۆ ۋنيۆەرسيتەتىنىڭ ستۋدەنتتەرىنە ارنالعان كۆوتالار, ىرىكتەۋ شارتتارىنىڭ بارىسىنا قاتىستى مامىلە جاسالدى.
الەمدىك ۋنيۆەرسيتەتتەردىڭ QS رەيتينگى بويىنشا 70-ورىندا تۇرعان CityU ۋنيۆەرسيتەتى – ەلىمىزدە بيىل ءوز وكىلدىگىن اشۋدى جوسپارلاپ وتىرعان العاشقى گونكونگ ۋنيۆەرسيتەتى. CityU ۋنيۆەرسيتەتى فيليالىنىڭ اشىلۋى قازاقستان ستۋدەنتتەرى ءۇشىن جاڭا كوكجيەكتەر اشىپ, ءبىلىم الۋ تاجىريبەسىن بايىتۋعا جانە ەلىمىزدە جاساندى ينتەللەكتى قولدانۋدىڭ اۋقىمىن كەڭەيتۋگە مۇمكىندىكتەر اشاتىنى انىق.
گونكونگتاعى كەزدەسۋدە CityU باسقارماسى توراعاسى لەستەر حۋان «قازاقستانداعى ەڭ كونە تەحنيكالىق ۋنيۆەرسيتەتپەن ىنتىماقتاستىعىمىز, ياعني CityU جانە ساتباەۆ ۋنيۆەرسيتەتتەرى اراسىنداعى كەلىسىم ءبىلىمدى, بىلىكتى جاستاردى دايارلاۋدىڭ زاماناۋي مۇمكىندىكتەرىنە جول اشىپ, عىلىم مەن ءبىلىم بەرۋدىڭ شەكاراسىن مۇنان دا كەڭەيتە تۇسەدى» دەپ اتاپ وتسە, CityU HK پرەزيدەنتى, پروفەسسور فرەددي بويدىڭ ايتۋىنشا, بۇل ىنتىماقتاستىق اياسىندا ستۋدەنتتەر, ماگيسترانتتار مەن دوكتورانتتار بىرلەسىپ جاساعان جۇمىستارىمەن عانا ەمەس, مادەني سالادا دا ءبىلىم الماساتىن بولادى.
ق.ساتباەۆ اتىنداعى قازۇتزۋ رەكتورى مەيرام بەگەنتاەۆ ءوز سوزىندە اتاپ وتكەندەي, پوليتەحتىڭ دامۋىندا وسى ساتتەن باستالعان جاڭا كەزەڭ – الەمدەگى ەڭ ۇزدىك ۋنيۆەرسيتەتتەردىڭ بىرىمەن سەرىكتەستىك كەلىسىمى ينجەنەرلىك تەحنولوگيالار سالاسىنداعى ءبىلىم مەن عىلىمي-زەرتتەۋ جۇمىستارىنىڭ دامۋىنا ىقپال ەتەدى.
– ەكى ۋنيۆەرسيتەت اراسىنداعى ىنتىماقتاستىق اياسىندا ماتەريالتانۋ جانە جاساندى ينتەللەكت بويىنشا بىرلەسكەن ءبىلىم بەرۋ باعدارلامالارىن جاساۋ جوسپارلانىپ وتىر. سونداي-اق ساتباەۆ ۋنيۆەرسيتەتىنىڭ عالىمدارى CityU-ءدىڭ كەلەسى جىلى ىسكە قوسىلاتىن جاڭا عىلىمي باعدارلامالارىنا قاتىسۋ مۇمكىندىگى قاراستىرىلۋدا. ەڭبەك نارىعىنىڭ قازىرگى جاعدايىنا بەيىمدەلگەن جوعارى ءبىلىمدى مامانداردى قىسقا مەرزىم ىشىندە دايارلاۋ جۇيەسى عىلىم مەن يننوۆاتسيانى دامىتۋ ارقىلى جوعارى ناتيجەگە جەتۋگە بولاتىنىن CityU ۋنيۆەرسيتەتىمەن كەلىسىمدەردىڭ بولاشاعىنان كورەمىز, – دەدى رەكتور.
Satbayev ۋنيۆەرسيتەتىنىڭ زەرتحانا جەتەكشىسى سەيىتحان ازات ۇلىنىڭ ايتۋىنشا, ستۋدەنتتەر 2 ديپلوم الىپ شىعا الادى. ەلىمىز ستۋدەنتتەرى CityU زەرتحانالارىن تەگىن پايدالانا وتىرىپ, زەرتتەۋ جۇمىستارىن جۇرگىزۋگە, الەمدىك دەڭگەيدەگى عالىمدارمەن بىرگە ديسسەرتاتسيالىق جۇمىستارىن جازۋعا, سونداي اق كادر الماسۋعا مۇمكىندىك بەرەدى.
بيىل ساتباەۆ ۋنيۆەرسيتەتىنىڭ 200-گە جۋىق ستۋدەنتى مەن وقىتۋشىلارى CityU-مەن قاتار الەمنىڭ جەتەكشى ۋنيۆەرسيتەتتەرىندە ءبىلىم الىپ, جۇمىس ىستەيدى. ۋنيۆەرسيتەت بۇگىندە پەنسيلۆانيا مەملەكەتتىك, اقش, سونگيۋنگۆان ۋنيۆەرسيتەتى, وڭتۇستىك كورەيا, گلازگو ۋنيۆەرسيتەتى, ۇلىبريتانيا, سونداي-اق كورشىلەس شەتەلدەردىڭ جەتەكشى جوعارى وقۋ ورىندارىمەن ىنتىماقتاستىقتى نىعايتىپ وتىر.
الماتى
