تالابى تاۋداي بالانىڭ سۋرەتشى بولۋ ءۇشىن ءوزىن ەش اياماي, بىرنەشە رەت قاتەرلى قادامدارعا قورىقپاستان ەرىكتى تۇردە بارعانىن جاقسى بىلەمىز. ونىڭ بىرنەشە رەت ءولىمشى ەتىپ سابالعانى دا ءمالىم. ول وسى جۋان تاياقتاردان نەگە قورقىپ جاسقانبادى دەگەن سۇراق تۇرادى كوكەيدە. تالىپ جاتقان ءابىلحاندى اناسى قاليپان بىرنەشە رەت كوتەرىپ اكەلىپ ەمدەپ, زورعا جازىپ العانى بەلگىلى. قىستىڭ كۇنى ىلەدەن شەجىنگە جول تارتىپ, اجال اۋزىنان ازەر امان قالعانى تاعى بار. تورعاي وڭىرىندە قاتتى ءۇسىپ قالعانى دا ۇمىتىلعان جوق. وسىنداي قيىنشىلىقتىڭ, اۋىرتپالىقتىڭ بارلىعىنا كىشكەنتاي سارى بالا قىلقالام ونەرىنە دەگەن قۇشتارلىعىنىڭ, وسى ونەرگە دەگەن سۇيىسپەنشىلىگىنىڭ, سۋرەتشى بولسام دەگەن اسقاق ارمانىنىڭ ارقاسىندا قارسى تۇرا ءبىلدى.
قانداي ءىستى دە جۇرەك قالاۋىمەن ىستەيتىن بالعىن سۋرەتشى ۇلكەن ومىردە دە وسى قاسيەتىنەن تانعان جوق. ءوزىنىڭ اسقان تالانتىمەن قوسا, ەل-جۇرتىنا دەگەن ەرەكشە سۇيىسپەنشىلىگىنىڭ ناتيجەسىندە ارتىنا وشپەستەي مول مۇرا قالدىردى. قازاقستان سۋرەتشىلەر وداعىنىڭ توراعاسى ومىربەك جۇبانيازوۆ اعامىز ءوز ەستەلىگىندە: «سۋرەتتەرى قازاقتىڭ بەينە ەنتسيكلوپەدياسى سەكىلدى» دەپ جازسا, بۇل ءا.قاستەەۆتىڭ بۇرىن-سوڭدى بولىپ كورمەگەن «قازاق بەينەلەۋ ونەرىنىڭ» مەكتەبىن قالىپتاستىرعان قايتالانباس تۇلعا, بوياۋدى قىلقالاممەن سويلەتۋدىڭ حاس شەبەرى ەكەنىن تاعى ءبىر مارتە ايعاقتاسا كەرەك.
ۇلى تۇلعانى ۇلىقتاۋ بارىسىندا «ارمانىنا اسىققان ءابىلحان» اتتى تاعىلىمدىق وقۋلىق (قۇرال) جازۋدى ءتاڭىرىم مەنىڭ ەنشىمە بۇيىرتقان ەكەن. وندا دۇنيەجۇزى مويىنداعان قىلقالام شەبەرىنىڭ ونەگەلى بالالىق شاعى تياناقتى زەرتتەلدى. ال ونىڭ قانشالىقتى كوركەم, مازمۇندى جازىلعانى جايىندا وڭ پىكىر نە سىن-ەسكەرتپە ايتۋ وقىرمان قاۋىمنىڭ قۇزىرىندا دەپ بىلەمىن. دەگەنمەن جەتكىنشەكتەردىڭ ورەلى, زەردەلى بولىپ وسۋلەرىنە وقۋلىقتىڭ نۇرلى ءدانى ءوز اسەرىن تيگىزەدى عوي دەپ ۇمىتتەنەمىن. ورەسى بيىك سۋرەتكەردىڭ عيبراتتى ىستەرى ۇرپاعىمىزعا جۇعىستى بولسىن.
مامەت يمانباي,
سۋرەتشى-ۇستاز
