سۋرەتتى تۇسىرگەن – اۆتور
قازىردە وبلىس كولەمىندە كوگالداندىرۋ جۇمىسى قارقىن الىپ كەلەدى. جالپى, بيىلدىڭ وزىندە 123 مىڭعا جۋىق كوشەت وتىرعىزۋ جوسپارلانعان. البەتتە كوشەتتى وتىرعىزىپ قانا قويماي, ونى كۇتىپ-باپتاۋ جۇمىستارى دا جوسپاردان تىس قالعان جوق.
قازاقستان تاۋى – جازدىڭ كۇنى كوپشىلىكتىڭ سەرۋەندەيتىن بىردەن-ءبىر جەرى. مۇندا ەل جاياۋلاتىپ شىعىپ, تاۋ بيىگىنەن قالانى تاماشالايدى. ۇشار باسىندا جەلبىرەپ تۇرعان كوك تۋىمىز جانە بار. ءيا, بۇل بيىكتەن قالانىڭ بارلىق بولىگى كورىنەدى. وسىنداي كورىكتى جەردى كوگالداندىرۋ ماقساتىندا كوشەت ەگىلگەنى وتە قۇپتارلىق ءىس بولعان. ايتا كەتەرلىگى, كوشەت ەكپەس بۇرىن تاۋدىڭ ماڭايىنا سەنبىلىك جۇمىستارى جۇرگىزىلگەن. ءسويتىپ, «تازا قازاقستان» اكتسياسى اياسىندا يگى شارۋا اتقارىلدى. وعان وبلىس اكىمى ەرمەك كوشەرباەۆ تا اتسالىسىپ, شىرشا مەن قايىڭ وتىرعىزدى.
– وتانعا, ەلىنە دەگەن ماحاببات تازالىقتان جانە ەڭبەكقورلىقتان باستالۋى قاجەت. سوندىقتان بۇگىنگى بىرەگەي شارا جاستار اراسىندا داستۇرگە اينالىپ قانا قويماي, وسكەلەڭ ۇرپاققا جاقسى ۇلگى بولادى دەگەن سەنىمدەمىن, – دەدى وبلىس اكىمى ەرمەك بەدەلباي ۇلى.
بۇگىنگى شارادا ۇلكەن جۇمىس اتقارعان ەرىكتىلەر مەن وسكەمەن ورمان شارۋاشىلىعى قىزمەتكەرلەرى ەكەنىن دە اتاپ ايتقان ءجون. ءتىپتى مەكتەپ وقۋشىلارىنا دەيىن كەلىپ, ەرىكتى تۇردە تال ەككەن.
– تابيعاتتى ايالاۋعا باعىتتالعان شاراعا ءبارىمىز ءبىر كىسىدەي قاتىستىق. شىرشا ەگىلدى. بۇل كەيىنگى ۇرپاققا ۇلكەن ونەگە دەپ بىلەمىن. جىل سايىن تال ەگۋدى داستۇرگە اينالدىرساق, اينالامىز جاسىل جەلەككە ورانىپ تۇرادى. بالالارىمىزبەن, نەمەرەلەرىمىزبەن كەلىپ دەمالامىز, – دەيدى ورمانشى مۇرات رايسوۆ.
شىعىسقازاقستاندىقتار «تازا قازاقستان» اكتسياسىنا قاتىسۋدا بەلسەندىلىك تانىتتى. مۇنداي شارا وبلىستىڭ ءار اۋدانىندا ءوتىپ جاتتى. اكتسيانىڭ ءبىرىنشى اپتالىعى «تازا ولكە» اياسىندا 21,4 مىڭ اۋلا تازالانىپ, 6 مىڭ توننادان اسا قوقىس شىعارىلدى.
«كيەلى مەكەن» اپتالىعىندا 161 قوعامدىق ورىن, سكۆەر جانە 136 ەسكەرتكىش تازالاندى. ال «ونەگەلى ۇرپاق» اپتاسىندا وبلىستاعى ارداگەرلەر مەن قارتتاردىڭ اۋلاسى تازالانىپ, سەنبىلىكتەر ءوتتى. ەندىگى كەزەكتە ء«مولدىر بۇلاق» اپتالىعىندا ارىقتار مەن بۇلاق كوزدەرى تازالاۋدان وتپەك.
وسكەمەن
