مەملەكەت باسشىسى ۇلتتىق قاۋىپسىزدىك كوميتەتىنىڭ توراعاسىن قابىلدادى

پرەزيدەنتكە ۇلتتىق قاۋىپسىزدىك كوميتەتىنىڭ جىل باسىنان بەرى اتقارعان جۇمىسىنىڭ ناتيجەلەرى, ۆەدومستۆونى رەفورمالاۋ بارىسى جانە الداعى كەزەڭگە ارنالعان مىندەتتەر تۋرالى ەسەپ بەرىلدى.

قاسىم-جومارت توقاەۆقا ۇلتتىق قاۋىپسىزدىككە تونەتىن قازىرگى سىن-قاتەرلەر مەن قاۋىپتەرگە بايلانىستى ۇقك قىزمەتىن جەتىلدىرۋ شارالارى, سونىڭ ىشىندە نورماتيۆتىك-قۇقىقتىق بازانى دامىتۋ, كادرلىق الەۋەتتى نىعايتۋ, وزىق اقپاراتتىق تەحنولوگيالاردى ەنگىزۋ جانە قىزمەتتىك پروتسەستەردى بيۋروكراتيادان ارىلتۋ جايىندا باياندالدى.

ەرمەك ساعىمباەۆ ەلىمىزدە تەرروريستىك جانە ەكسترەميستىك ارەكەتتەرگە جول بەرمەۋ جۇمىستارىنىڭ كۇشەيتىلگەنى جونىندە ايتتى. جىل باسىنان بەرى ۇقك ماتەريالدارى بويىنشا تەرروريزم مەن ەكسترەميزمگە قاتىسى بولعانى ءۇشىن 25 ادام سوتتالدى, سوتقا دەيىنگى تەرگەۋ امالدارى اياسىندا تاعى 13 ادام ۇستالدى.

مەملەكەت باسشىسىنا كريمينوگەندىك احۋالدى ساۋىقتىرۋ شارالارى تۋرالى اقپارات بەرىلدى. ىشكى ىستەر مينيسترلىگىمەن بىرلەسىپ, 6 قىلمىستىق توپتىڭ ارەكەتىنە توسقاۋىل قويىلدى جانە 35 ادام تۇتقىندالدى. زاڭسىز اينالىمنان 148 قارۋ, قولدان جاسالعان 5 جارىلعىش قۇرال, 32 گراناتا جانە 4431 وق-ءدارى تاركىلەندى.

ەسىرتكى بيزنەسىنە قارسى كۇرەس اياسىندا 16 وپەراتسيا جۇرگىزىلدى. ەسىرتكى تاسىمالدايتىن 18 حالىقارالىق جانە 9 وڭىرلىك ارنا, سونداي-اق 10 ەسىرتكى زەرتحاناسى جويىلدى. 800 كەلىدەن استام ەسىرتكى جانە پسيحوتروپتىق زاتتار, 14 توننا حيميالىق رەاگەنتتەر مەن كوكنار شيكىزاتى تاركىلەندى.

ەكونوميكالىق قاۋىپسىزدىكتى قامتاماسىز ەتۋ جانە سىبايلاس جەمقورلىققا قارسى ءىس-قيمىل شەڭبەرىندە مەملەكەتكە 707 ميلليارد تەڭگەدەن استام سوما زالال كەلتىرۋگە جول بەرىلمەدى جانە  بيۋدجەتكە 1,2 ميلليارد تەڭگە قايتارىلدى.

مەملەكەتتىك شەكارانى بۇزعان 7 مىڭنان استام ادام ۇستالدى. شەكارا ارقىلى قارۋ-جاراق پەن وق-ءدارى, ەسىرتكى جانە باسقا دا تىيىم سالىنعان زاتتاردى تاسىمالداۋعا قاتىستى 395 ارەكەتتىڭ جولى كەسىلدى. سونداي-اق 3,2 ميلليارد تەڭگە كولەمىندەگى ۆاليۋتانى جانە قۇنى 7,6 ميلليارد تەڭگە بولاتىن تاۋارلاردى زاڭسىز وتكىزۋگە توسقاۋىل قويىلدى.

بۇدان بولەك, قاسىم-جومارت توقاەۆقا مەملەكەتتىك ورگانداردىڭ اقپاراتتىق جۇيەلەرىنە جاسالعان 50,3 ميلليون كيبەر جانە 819 DDoS-شابۋىلعا تويتارىس بەرىلگەنى تۋرالى باياندالدى.

كەزدەسۋ سوڭىندا پرەزيدەنت ۇلتتىق قاۋىپسىزدىك ورگاندارىنىڭ قىزمەت باعىتتارىنا قاتىستى بىرقاتار تاپسىرما بەردى.