قر قارۋلى كۇشتەرى ارنايى وپەراتسيالار كۇشتەرىنىڭ اسكەري قىزمەتشىلەرى قازاقستان قۇراماسىنىڭ ساپىندا سايىسقا شىقتى. بۇل ءدۇبىرلى دوداعا 27 ەلدەن كەلگەن قويان-قولتىق ۇرىسىنىڭ شەبەرلەرى ەكى ەرەجە بويىنشا باعىن سىنادى.
اسكەري قىزمەتشىلەردىڭ جاۋىنگەرلىك دايارلىعىنداعى قويان-قولتىق ۇرىستىڭ ءرولىن اتاپ وتكەن گەنەرال-پولكوۆنيك رۋسلان جاقسىلىقوۆ سپورتشىلاردى بەدەلدى جارىستا ابىرويلى ونەر كورسەتۋىمەن قۇتتىقتادى.
«اسكەري ادام ءۇشىن سپورت كاسىبي دايىندىق تۇرعىسىنان وتە ماڭىزدى, ال جەكپە-جەك ارنايى كۇشتەردىڭ جاۋىنگەرىن باتىلدىققا, تاباندىلىققا, توزىمدىلىككە تاربيەلەيدى», دەدى قورعانىس ءمينيسترى.
ەستەرىڭىزگە سالا كەتسەك, تاتاميدەگى ءۇش كۇندىك جەكپە-جەكتىڭ قورىتىندىسى بويىنشا «سايىس» ەرەجەسىندە (اۋىر جانە تۇنشىقتىرۋ ادىسىمەن تولىق جاناساتىن جەكپە-جەك) ءوز سالماق دارەجەسىندە 20850 اسكەري ءبولىمىنىڭ اسكەري قىزمەتشىلەرى سەرجانت جاندوس ءماديحيانوۆ (57 كەلى) جانە اعا سەرجانت ارنات نامەتوۆ (62 كەلى) چەمپيون اتاندى.
قاتىسۋشىلار ء«وزىن-ءوزى قورعاۋ» تەحنيكاسىندا ءارتۇرلى شابۋىل تۇرلەرىن كورسەتىپ, سونىڭ ىشىندە پىشاق پەن تاپانشادان قورعاۋ ادىستەرىن قولدانعان 32039 اسكەري ءبولىمىنىڭ اسكەري قىزمەتشىسى مايور نۇرداۋلەت ەرجىگىتوۆ 90 كەلى سالماقتا قولا جۇلدەگەر اتاندى.
رەسەي استاناسى ماسكەۋدە قازاقستان قارۋلى كۇشتەرىنىڭ ابىرويىن اسقاقتاتقان قويان-قولتىق ۇرىس شەبەرلەرى قورعانىس ۆەدومستۆوسى باسشىسىنىڭ قولىنان باعالى سىيلىقتار الدى.
