فوتو: ا.بايجۇمانوۆ
كوميتەت توراعاسى ءالي بەكتاەۆ ەلىمىزدىڭ پرەزيدەنتى فەرمەرلەردى جان-جاقتى قولداۋعا ەرەكشە نازار اۋدارىپ وتىراتىنىن جانە «اۋىل اماناتى» باعدارلاماسى ءوزىنىڭ تيىمدىلىگى مەن قاجەتتىگىن كورسەتىپ كەلە جاتقانىن اتاپ وتكەنىن جەتكىزدى.
«اۋىل اماناتى» جوباسى بويىنشا اۋىل تۇرعىندارى ءوز بيزنەسىن دامىتا الادى نەمەسە كووپەراتيۆ اياسىندا جەڭىلدىكپەن نەسيە الا الادى, ماتەريالدىق جاعدايدى جاقسارتۋ ءۇشىن ءوز ءىسىن اشا الادى. جوبا بويىنشا قارىز الۋ شارتتارى دا وتە ءتيىمدى, ويتكەنى پايىزدىق مولشەرى ايتارلىقتاي تومەن. مىسالى, بۇگىندە بىردە-ءبىر كوممەرتسيالىق بانكتىڭ اۋىل تۇرعىندارىنا وسىنداي شارتتارمەن نەسيە بەرۋگە مۇمكىندىگى جوق. الەمدىك ينفلياتسيانى ەسكەرە وتىرىپ, 2,5% نەسيە الۋ وتە ءتيىمدى. سوندىقتان بۇل ءوندىرىس اشۋعا جانە ونى دامىتۋعا تاماشا مۇمكىندىك بولىپ وتىر. بۇل جوبا ىسكە اسقاننان بەرى بەلگىلى ءبىر ۋاقىت ءوتتى. وسى باعدارلامانىڭ ورىندالۋ بارىسىن تالقىلايتىن كەز كەلدى», دەدى سەناتور.
دەپۋتاتتار كەزدەسۋ بارىسىندا وڭىرلەر اراسىنداعى قارجىلىق تەڭسىزدىك پروبلەماسىنا قاتىستى ماسەلەلەردى كوتەردى. سەناتور ەرنۇر ايتكەنوۆتىڭ ايتۋىنشا, بۇل ماسەلەنى اۋىلداردا جاڭا جۇمىس ورىندارى مەن شاعىن بيزنەس اشۋ, قۇس پەن مال باسىن كوبەيتۋ ارقىلى شەشۋگە بولادى.
دەپۋتاتتار سونىمەن قاتار سۋ تاسقىنىنان كەيىنگى كەزەڭدە «اۋىل اماناتى» جوباسىن ىسكە اسىرۋ مەن اۋىل تۇرعىندارىن قولداۋ ماسەلەسى ەرەكشە ماڭىزدى ەكەنىن اتاپ ءوتتى. «اۋىل اماناتى» باعدارلاماسى وسى تۇرعىدا ولاردىڭ ماتەريالدىق جاعدايىن جاقسارتۋعا جانە حالىقتىڭ, ونىڭ ىشىندە سۋ تاسقىنىنان زارداپ شەككەندەردىڭ تابىسىن ارتتىرۋعا ىقپال ەتۋى ىقتيمال.
