دەپۋتاتتاردىڭ تالقىلاۋىنا ەسىرتكى, پسيحوتروپتىق زاتتاردىڭ جانە ولاردىڭ پرەكۋرسورلارىنىڭ زاڭسىز اينالىمىنا قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسى ءبىرىنشى وقىلىمدا ۇسىنىلادى.
زاڭ جوباسىندا قىلمىستىق, قىلمىستىق-پروتسەستىك كودەكستەرگە جانە «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسكە, سونداي-اق بىرقاتار زاڭعا وزگەرىستەر ەنگىزىلەدى. اتاپ ايتقاندا, پرەكۋرسورلارمەن جانە كۇشتى اسەر ەتەتىن زاتتارمەن جۇمىس ىستەۋ قاعيدالارىن ساقتاۋ مىندەتىنە كىرەتىن ادامدار ءۇشىن وسىنداي قاعيدالاردى بۇزعانى ءۇشىن قىلمىستىق جاۋاپكەرشىلىك ەنگىزىلەدى. سونىمەن قاتار مەملەكەت باسشىسىنىڭ 2024 جىلعى 15 ناۋرىزداعى ۇلتتىق قۇرىلتايدىڭ ءۇشىنشى وتىرىسىندا بەرگەن تاپسىرماسىن ورىنداۋ ماقساتىمەن دەپۋتاتتار ەسىرتكى زاتتارىن زاڭسىز ءوندىرۋ ءۇشىن جاۋاپكەرشىلىكتى قاتايتۋعا باعىتتالعان تۇزەتۋلەردى ەنگىزدى.
جالپى وتىرىستىڭ كۇن ءتارتىبىنىڭ جوباسىنا ءبىرىنشى وقىلىمدا مەملەكەتتىك ستاتيستيكا جانە دەرەكتەردى باسقارۋ ماسەلەلەرى جونىندەگى زاڭ جوباسى دا ەنگىزىلدى.
پارلامەنت دەپۋتاتتارى ازىرلەگەن زاڭ جوبا ۇلتتىق ستاتيستيكا بيۋروسى مەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ دەرەكتەردى باسقارۋ ساياساتى سالاسىنداعى وكىلەتتىكتەرى مەن قۇزىرەتتەرىن ءبولۋ, بيۋرو قىزمەتىن تسيفرلاندىرۋعا جانە ونى مەملەكەتتىك ورگاندار بازالارىمەن ينتەگراتسيالاۋعا, سونداي-اق اكىمشىلىك جانە بالامالى كوزدەردەن دەرەكتەردى جيناۋ ادىستەرىن جەتىلدىرۋگە باعىتتالعان.
ءماجىلىس قىتاي حالىق رەسپۋبليكاسىمەن حالىقارالىق اۆتوموبيل تاسىمالدارى تۋرالى كەلىسىمدى راتيفيكاتسيالاۋ تۋرالى جانە ىشكى ىستەر ورگاندارىنىڭ قىزمەتى سالاسىنداعى نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوبالارىن جۇمىسقا الادى.
