بۇل سەرىكتەستىك ون جىلدان استام ۋاقىت جەمىس-جيدەكتى قايتا وڭدەۋ ونەركاسىبىندە تابىستى جۇمىس ىستەپ جاتىر. تابيعي ءارى ءدامى ءتىل ۇيىرەر شىرىن مەن ءتۇرلى جەمىس ەزبەسىن دايىنداۋعا قاجەت جەمىستەردى الۋ ءۇشىن كومپانيا ءوزىنىڭ الما باعىن جايقالتىپ وسىرگەن.
«2019 جىلدان باستاپ الما وسىرۋمەن اينالىسامىز. 70 گەكتار جەردى تامشىلاتىپ سۋارۋ تەحنولوگياسىمەن باپتايمىز. سودان بەرى باق ءوسىرۋدىڭ تيىمدىلىگى ارتتى. باعىمىزدا المانىڭ گالا, گولدەن, رەد دەليشەس, رەد دجوناپرينتس, فۋدجي سورتتارى وسىرىلەدى. ەرەكشە كۇتىمنىڭ ناتيجەسىندە جىلدان-جىلعا ءونىم كولەمى ارتىپ كەلەدى», دەيدى «Unifruit» جشس ديرەكتورى ولجاس شارافيەۆ.
الما باقتى قاجەتتى قۇرىلعىلارمەن قامتاماسىز ەتۋ ءۇشىن كومپانيا ۇلكەن تاۋەكەلدەرگە بارىپ, ەلىمىزدە ەڭ العاشقى بولىپ شپالەرلى باعانالار شىعارۋعا بەل بۋعان.
وسى كۇنى ينتەنسيۆتى باق وسىرەتىن شارۋاشىلىقتاردىڭ القاپتارى ارنايى تورمەن قاپتالعانىن كورەمىز. بۇل تور اعاشتاردىڭ جەمىستەرىن قۇستاردان, بۇرشاقتان, جەلدەن ساقتايدى. ال تور مەن ونى ورنالاستىراتىن باعانالاردى كومپانيا ءوزى ءوندىرىپ, وتاندىق ونەركاسىپكە تىڭ جاڭالىق ەنگىزدى. كاسىپورىن ەڭبەكشىقازاق اۋدانى ەسىك قالاسىندا ورنالاسقان.
«Unifruit Production» – ەلىمىزدە قارقىندى باقتار مەن جۇزىمدىكتەرگە ارنالعان تورلى جۇيەلەردى سالۋ بويىنشا كەشەندى شەشىمدەردى ۇسىناتىن وندىرىستىك كومپانيا. يتاليالىق تەحنولوگيا بويىنشا ورتالىق ازيا نارىعىنداعى تەمىربەتون باقشا تورىنىڭ جالعىز ءوندىرۋشىسىمىز. توردىڭ جوعارى ساپاسىنا قول جەتكىزۋ ءۇشىن يتاليانىڭ ەڭ وزىق تەحنولوگياسىن تاڭدادىق. ول 1968 جىلدان باستاپ الدىن الا كەرنەلگەن تەمىربەتون كونسترۋكتسيالارىن جاساۋعا ارنالعان جابدىقتى ءوندىرۋدىڭ شەبەرى سانالادى. كليەنتتەر تىزىمىندە «Valente Spinazze» كومپانياسى جانە تاعى باسقالار بار. ءبىزدىڭ كومپانيا ورتالىق ازياداعى وسى ءوندىرىس تەحنولوگياسىنىڭ ەكسكليۋزيۆتى قۇقىق يەسى بولىپ ەسەپتەلەدى. سونداي-اق «Unifruit» كومپانياسى الماتى وبلىسىندا 100 گەكتاردان استام اۋماقتا قارقىندى باقتار سالۋ بويىنشا ءوز جوبالارىن ىسكە اسىردى», دەيدى سەرىكتەستىكتىڭ ينجەنەر-تەحنولوگى جانە تسەح باسشىسى داۋرەنبەك قورازوۆ.
جوعارى ساپالى ماتەريالداردى پايدالانا وتىرىپ, قارقىندى باقتار مەن جۇزىمدىكتەرگە ارنالعان قورعانىس قۇرىلىستارى بولىگىندە كەشەندى شەشىمدەردى ىسكە اسىرۋدى ماقسات ەتكەن كومپانيا الدىن الا كەرنەلگەن بەتون تورلارىن, بۇرشاققا قارسى توردى جانە باسقا ماتەريالداردى ءوندىرۋ جانە جەتكىزۋمەن اينالىسىپ كەلەدى. سونىمەن قاتار كوگالداندىرۋدى قولجەتىمدى ەتۋ جانە ەۋروپالىق تەحنولوگيالاردى ازىرلەۋ مەن ونى ەنگىزۋ ارقىلى باعبانداردىڭ مول ءونىم الۋىن قامتاماسىز ەتۋ كومپانيانىڭ باستى ماقساتىنا كىرەدى.
«ۋاقىت تالابىنا ساي يتاليالىق وندىرىسكە نەگىزدەلگەن ينتەنسيۆتى باۋ-باقشا ءوسىرۋ تەحنولوگياسى بويىنشا شپالەرلى باعانالار كەرەك بولدى. بۇل باعانالار قازاقستان نارىعىندا جوق, شەتەلدە, ياعني يتاليادا عانا بولعاندىقتان كومپانيا جەتەكشىلەرى وسى ءوندىرىستى الىپ كەلىپ, ىسكە قوسۋعا شەشىم قابىلدادى», دەيدى كومپانيا وكىلى.
الدىن الا كەرنەلگەن باعانالاردىڭ ولشەمى ءارتۇرلى, ۇزىندىعى 5 مەتردەن تومەن قاراي كەز كەلگەن ولشەمدە شىعارىلادى. ال اۆتوماتتاندىرىلعان جەلى تۇتاستاي العاندا 65 مەتر ۇزىندىقتا ءونىم شىعارادى. دايىن بولعان ءونىمدى قارقىندى باق تەحنولوگياسى بويىنشا بەلگىلى اراقاشىقتىقتا جەرگە قاداپ, ورنالاستىرادى. ونى باقتارعا عانا ەمەس, ەگىس القاپتارىن, جول جيەگىن قورشاۋعا دا پايدالانادى.
بەس جىلدان بەرى ىسكە قوسىلعان بىرەگەي ءوندىرىس وشاعىندا ەكى جەلى جۇمىس ىستەيدى. وندا تاۋلىگىنە 5 200 مەتر شپالەرلى باعانالار دايىندالادى.
ساپالى وتاندىق ءونىمنىڭ قولدانۋ اياسى دا كەڭي تۇسكەن. مىسالعا ايتار بولساق, ۇلكەن الماتى اينالما اقىلى جولىنىڭ 150 شاقىرىمىن قورشاپ شىعۋعا وسى كومپانيانىڭ ءونىمى قولدانىلعان ەكەن. سول سەبەپتى, ۇزىندىعى 250-270 ولشەمدەرمەن باعانالار ءوندىرۋ جولعا قويىلعان.
ء«بىزدىڭ باعانالاردىڭ كولدەنەڭ قيعانداعى ولشەمدەرى 70*80 مم, 90*90, 5 مم جانە 95*120 بولىپ ۇشكە بولىنەدى. ماتەريالعا (قۇيماتاسقا, ارماتۋراعا) الدىن الا كەرنەۋ ءۇردىسى قازىرگى زامانعى قۇرىلىستىڭ ءارتۇرلى تەمىر-قۇيماتاس قۇرىلىمى مەن بۇيىمىندا, سونداي-اق مەتالل قۇرىلىمدارىندا كەڭىنەن قولدانىلادى. ادەتتە تەمىر-قۇيماتاستى الدىن الا كەرنەلگەن قۇرىلىمداردا قۇيماتاس سىعىلادى دا, ارماتۋرا سوزىلادى. مۇنىڭ ناتيجەسىندە ارماتۋرالىق بولاتتار 70 پايىزعا دەيىن ۇنەمدەلىپ, قۇرىلىمنىڭ بەرىكتىگى ارتادى. تەمىر-قۇيماتاستى الدىنا الا كەرنەلگەن قۇرىلىمداردى ءۇي مەن ينجەنەرلىك قۇرىلىستاردا, كوبىنە كوپىرلەردە پايدالانۋ ءتيىمدى. باققا پايدالانۋدىڭ دا ماقساتى سول, جاۋىن-شاشىنعا قارسى ماتەريالدى وسى باعانالاردىڭ ۇستىنە تارتىپ قويادى, ونىڭ ۇستىنە سالماق تۇسكەن كەزدە بارىنە شىداس بەرىپ, كوتەرىپ تۇرادى. مايىسقاندا سىنىپ كەتپەس ءۇشىن الدىن الا كەرنەۋلىك قۇيىلادى», دەيدى ينجەنەر-تەحنولوگ د.قورازوۆ.
يتاليالىق تەحنولوگيانىڭ ىسكە قوسىلعانىنا بەس جىل بولعان. وسى ۋاقىت ارالىعىندا قالىپتاسقان 2 جەلىدە 30 شاقتى ادام تۇراقتى ەڭبەك ەتىپ جاتىر. ولاردىڭ بارلىعى دا جەرگىلىكتى اۋىل ازاماتتارى. وندىرىسكە قاجەت شيكىزات – قيىرشىق تاس, قۇم, تسەمەنت وتاندىق بولعانىمەن, مەتالل تاپشىلىعى بارىن جاسىرمادى. ونى كاسىپورىن رەسەيدەن الادى.
كومپانيا وسى كۇنى ەلىمىزدىڭ وڭتۇستىك وڭىرلەرى مەن الماتى قالاسىنان تۇراقتى تۇردە تاپسىرىستار قابىلداپ ءجۇر. سونىمەن قاتار وزبەكستان مەن قىرعىزستاننان دا سۇرانىس ارتىپ, تاۋارلار كىدىرىسسىز جونەلتىلىپ جاتىر.
الدىن الا كەرنەۋلى باعانا شىعارۋدىڭ شەبەرى بولعان كاسىپورىن كەلەشەكتە ءونىم كولەمىن ۇلعايتۋمەن قاتار, تەمىربەتون كونسترۋكتسيالاردىڭ ءتۇرىن كوبەيتىپ, كەڭەيتىلىپ جاتقان 3-جۇيەنى ىسكە قوسۋدى جوسپارلاپ وتىر.
الماتى وبلىسى
