«جاسىل ايماق» اكتسياسى اياسىندا اقمولالىقتار كوشەت وتىرعىزىپ, ۇيىمشىلدىقپەن جۇمىس ىستەپ, سەنبىلىك ۇيىمداستىردى. ءىس-شاراعا بەلسەندى جاستارمەن قاتار, كوپتەگەن ءوڭىر تۇرعىنى اتسالىستى. كوپ كومەگىن ەكشەيتىن دەرەك كەلتىرەتىن بولساق, يگىلىكتى ىسكە 62 مىڭنان اسا ادام قاتىسقانىن ايتۋعا بولادى. جاسىل جەلەك جامىلعان كورىكتى كوكشە ءوڭىرىنىڭ ءسان-سالتاناتى بۇرىنعىدان دا اجارلانا تۇسەتىن بولدى.
كوپپەن بىرگە تاياۋدا عانا نارەستەلى بولعان جاس وتباسىلاردىڭ قولىنا كۇرەك ۇستاپ, ءۇمىتتى دۇنيەگە اتسالىسىپ جۇرگەنىن كورگەندە كوڭىلدى قۋانىش كەرنەيدى ەكەن. بالاپان اعاشتار اتا-انا قۇشاعىنداعى نارەستەلەرىمەن بىرگە ءوسىپ, جەتىلەتىنى قانداي ادەمى! ولار ء«سابي» اللەياسىنا 30 اتاۋلى اعاش وتىرعىزدى. بالاۋسا قاراعايلاردى كوپبالالى ءامىرحانوۆتار وتباسى دا وتىرعىزدى.
– ءبىزدىڭ وتباسىمىزدىڭ جادىندا قالادى. ءبىز بۇل اعاشتاردى وتىرعىزىپ قانا قويماي, ەكولوگيالىق تاربيەنىڭ ماڭىزدىلىعىن ۇلگى ەتىپ كورسەتكىمىز كەلەدى. ۇلكەن بالالارىمىز اللەياعا كەلىپ, كوشەتتەرگە سۋ قۇيىپ, كۇتىپ-باپتاۋدى ۇمىتپايدى, – دەدى اقتوتى ءامىرجانوۆا.
كوكشەتاۋ قالاسىندا 8 مىڭعا جۋىق ادام وسى اكتسياعا قاتىستى. ولاردىڭ كۇشىمەن 3 500 تەكشە مەتر قوقىس شىعارىلىپ, مىڭداعان اعاش كوشەتى وتىرعىزىلدى.
وبلىستىق جاستار-رەسۋرستىق ورتالىعىنىڭ ۇيىمداستىرۋىمەن وتكىزىلگەن ءىس-شارا شەڭبەرىندە اعاش كوشەتتەرىن وتىرعىزۋ جۇمىستارى جۇرگىزىلدى. ءىس-شارانىڭ نەگىزگى ماقساتى – قالا تۇرعىندارىنىڭ, اسىرەسە جاستاردىڭ ەكولوگيالىق مادەنيەتىن ارتتىرۋ, «ادال ادام – ادال ەڭبەك – ادال تابىس» تۇجىرىمداماسى نەگىزىندە پاتريوتيزم, تابيعاتقا, قورشاعان ورتاعا ۇقىپتى قاراۋ قۇندىلىقتارىن دارىپتەۋ.
– اكتسيانىڭ ءاربىر اپتاسى ارنايى تاقىرىپتارعا ارنالعان ەدى. مىنە, ءۇشىنشى اپتادا «جاسىل ايماق» اكتسياسى وتكىزىلىپ جاتىر. بۇل كۇندەرى اعاش كوشەتتەرىن وتىرعىزۋ, اينالانى اكتەۋ جۇمىستارى جۇرگىزىلۋگە ءتيىس. الداعى ۋاقىتتا «ونەگەلى ۇرپاق» اكتسيا اياسىندا ارداگەرلەردىڭ اۋلاسىن تازالاۋ, قارتتار ۇيلەرىندە اباتتاندىرۋ جۇمىستارىنا ۇلەس قوسۋ نەگىزگى ماقساتتاردىڭ ءبىرى بولماقشى. ودان سوڭ ء«مولدىر بۇلاق» اتاۋىمەن وتەتىن ايتۋلى ىستە وزەن-كولدەردىڭ ماڭايىن قوقىستان تازالاۋ ۇيىمداستىرىلادى, – دەيدى ورتالىق باسشىسى داستان ەرمەكوۆ.
اكتسيا بارىسىندا 15 گەكتار اۋماقتىڭ 2 گەكتارىنا 9 مىڭعا جۋىق اعاش كوشەتتەرى وتىرعىزىلدى. اعاش وتىرعىزۋ جۇمىستارى اقمولا وبلىسى ورمان شارۋاشىلىعى باسقارماسى جانە قالا ستۋدەنتتەرىمەن بىرلەسىپ, ودان ءارى جالعاسا بەرەدى.
كوكشەتاۋ
