فوتو: kz.oqu.news
تۋراگەنت 2021 جىلدىڭ ورتاسىنان باستاپ ءوزىنىڭ جەكە كاسىبى ارقىلى كەلىسىمشارتتىق قارىم-قاتىناستا جۇمىس ىستەگەن تۋروپەراتورلاردىڭ تۋرپاكەتتەرىن ساتۋمەن اينالىسقان.
«2022 جىلدىڭ ماۋسىمىنان 2023 جىلدىڭ ماۋسىمىنا دەيىن ول تۋراگەنتتىڭ اتىن جامىلىپ, ازاماتتارعا تۋريستىك پاكەتتەر ۇسىنعان. ءىس جۇزىندە ول جاپونيا, ءباا, تۇركيا, دۋباي, ەگيپەت, تايلاند, ۆەتنام جانە باسقا ەلدەرگە بارۋ ءۇشىن تولەنگەن اقشانى جىمقىرعان», دەلىنگەن جوعارعى سوتتىڭ حابارلاماسىندا.
جابىرلەنۋشىلەر تۋريستىك ساپارلاردىڭ قۇنىن الدىن الا تولىق تولەگەن.
ايەل ادام ازاماتتاردان جىمقىرعان قاراجاتتى تولىعىمەن قالتاسىنا باسقانى انىقتالدى. ال جابىرلەنۋشىلەر ءىس جۇزىندە ەشقايدا ساياحاتتاي المايتىنىن, اقشاسىنان قاعىلعاندارىن تەك اۋەجايدا بىلگەن.
«الاياق تەرگەۋ امالدارى جۇرگىزىلىپ جاتقان كەزدە تاعى ەكى ازاماتتى الداپ ۇلگەرگەن, ونىڭ ءبىرى - سىنىپتاسى», دەلىنگەن حابارلامادا.
ونىڭ قىلمىستىق ارەكەتى سالدارىنان 70-كە جۋىق جابىرلەنۋشىگە 78 ميلليون تەڭگەدەن استام ءىرى كولەمدەگى ماتەريالدىق شىعىن كەلتىرىلگەن.
تۋراگەنتتىڭ كىناسى جابىرلەنۋشىلەردىڭ, كۋالاردىڭ ايعاقتارىمەن, بانك شوتىنان ءۇزىندى كوشىرمەلەرمەن, سونداي-اق باسقا دا ءىس ماتەريالدارىمەن دالەلدەندى.
جالعان تۋراگەنت ءوز كىناسىن تولىق مويىنداپ, زارداپ شەككەندەرگە وتەماقى تولەۋگە ۋادە بەردى.
«سوت ايىپتالۋشىنى تۋريزم سالاسىنداعى قىزمەتپەن 6 جىلعا اينالىسۋ قۇقىعىنان ايىرا وتىرىپ, 4 جىلعا باس بوستاندىعىنان ايىرۋ تۋرالى ۇكىم شىعاردى», دەلىنگەن حابارلامادا.
ۇكىم زاڭدى كۇشىنە ەنگەن جوق.
