فوتو: polisia.kz
كيبەرقىلمىسقا قارسى ءىس-قيمىل شەڭبەرىندە ءىىم قىزمەتكەرلەرى جەدەل-ىزدەستىرۋ ءىس-شارالارىن جۇرگىزىپ, ينتەرنەت-الاياقتىققا شەتەلدىك ازاماتتاردىڭ قاتىسى بار ەكەنىن انىقتادى.
«مينيسترلىك قىزمەتكەرلەرى قىزمەتتىك ءىسساپار بارىسىندا ۋكراينا ۇلتتىق پوليتسياسىمەن جانە چەحيا پوليتسياسىمەن بىرلەسىپ, ينتەرنەت-الاياقتاردىڭ ەكى ترانسۇلتتىق قىلمىستىق توبىنىڭ ارەكەتىنە توسقاۋىل قويدى», دەدى دەپارتامەنت باستىعى - ءىىم رەسمي وكىلى شىڭعىس الەكەشەۆ.
دالىرەك ايتساق, زاپوروجە قالاسىندا الاياقتاردىڭ ەكى call-ورتالىعى جويىلدى. كيبەرقىلمىسكەرلەر وزدەرىن بانكتەر مەن قۇقىق قورعاۋ ورگاندارىنىڭ قىزمەتكەرلەرى رەتىندە تانىستىرىپ, قازاقستان ازاماتتارىنا قوڭىراۋ شالىپ, ولاردىڭ شوتتارىنىڭ دەرەكتەرىن الۋعا تىرىسقان.
«ناتيجەسىندە 9 ادام ۇستالدى. 17 كومپيۋتەر, 62 ءموبيلدى قۇرىلعى, سونداي-اق 35 گرامم «مەتادون» پرەپاراتى تاركىلەندى. ودەسسا قالاسىندا ءۇش الاياقتىق call-ورتالىق تاراتىلدى. قاسكويلەر جالعان ينۆەستيتسيالىق كومپانيالارعا قارجى سالۋ سىلتاۋىمەن ينتەرنەت-الاياقتىق جاساعان. مۇندا 23 ادام ۇستالدى. 9 كۇدىكتى ۋاقىتشا ۇستاۋ يزولياتورىنا قامالدى. 8 اۆتوكولىك, 58 نوۋتبۋك, 52 سمارتفون, 100-دەن استام sim-كارتا, سونداي-اق 200 مىڭ اقش دوللارىنان استام سوماعا تسيفرلىق اكتيۆتەر تاركىلەندى. قازىرگى ۋاقىتتا تەرگەۋ جانە جەدەل-ىزدەستىرۋ امالدارى جۇرگىزىلىپ جاتىر», دەدى ىىم رەسمي وكىلى.
