كەيىنگى تاۋلىكتە توتەنشەلىكتەر وبلىس بويىنشا 9 ادامدى ەۆاكۋاتسيالاعان ەكەن. بۇل – نەگىزىنەن سۋ باسقان ساياجاي اۋماعىنان كەتپەي جۇرگەندەر. ال جايىق بويىنداعى چاپاەۆ, كەڭسۋات اۋىلدارىندا جايىقتىڭ جايىلعان سۋى قولدان سوققان بوگەتكە تىرەلىپ توقتاعان.
«باتىس قازاقستان وبلىسىندا سۋ تاسقىنىنا قاتىستى جاعداي تۇراقتالىپ كەلەدى. جەدەل قابىلدانعان شارالاردىڭ ناتيجەسىندە كوپتەگەن ەلدى مەكەن مەن ورال قالاسى سۋ تاسقىنىنان امان قالدى. ەندىگى كەزەكتە جايىق وزەنىنىڭ تومەنگى جاعىندا ورنالاسقان اقجايىق اۋدانىنداعى جاعدايدى قاتاڭ باقىلاۋدا ۇستاۋ قاجەت» دەگەن باتىس قازاقستان وبلىسىنىڭ اكىمى ناريمان تورەعاليەۆ اقجايىق اۋدانىنىڭ بازارتوبە, قاراۋىلتوبە, ەسەنساي جانە تايپاق اۋىلدارىنا بارىپ, وزەن جاعاسىن نىعايتۋ جۇمىستارىن ءوزى قاداعالاپ شىقتى.
ءوڭىر باسشىسى «سۋ تاسقىنىنا بايلانىستى قاۋىپ ءالى سەيىلگەن جوق. سوندىقتان تاسقىن سۋدىڭ الدىن الۋ جۇمىسىن جالعاستىرامىز. اۋداندارداعى جۇمىستى باقىلاۋدا ۇستايمىز. قوسىمشا ماتەريالدار قاجەت بولسا جەتكىزەمىز», دەدى.
ايتا كەتەيىك, وسى اقجايىق اۋدانىنىڭ وزىندە سۋ تاسقىنىنىڭ الدىن الۋ ءۇشىن كەيىنگى ءبىر ايدا 31,4 كم بوگەت تۇرعىزىلعان ەكەن. بۇل ىسكە 823 ادام, 158 تەحنيكا جۇمىلعان.
وبلىستا توتەنشە جاعداي جاريالانعان ءساۋىر ايىنىڭ باسىنان بەرى قازاقستاننىڭ 14 وڭىرىنەن قوسىمشا كۇش كەلگەن ەدى. بۇگىندە ولاردىڭ جارتىسى اتىراۋ وبلىسىنا اۋىسسا, قالعانى وزدەرى ورنالاسقان ايماققا كەتتى. ولارعا جەرگىلىكتى حالىق ءدان ريزا. مىسالى, قر قارۋلى كۇشتەردىڭ دەسانتتىق-شابۋىلداۋ اسكەرلەرى بايتەرەك اۋدانىندا 12 كۇن ىشىندە 13 شاقىرىمنان اسا بوگەت تۇرعىزعان ەدى. كەشە ءوز بولىمىنە اتتانعان اسكەريلەرگە بايتەرەك اۋدانىنىڭ اكىمى مارات توعجانوۆ العىس ايتىپ, ماراپات تابىستادى. وسىنداي جيىن ورال قالاسىنداعى باس الاڭدا دا ءوتتى.
«توتەنشە جاعداي كەزىندە باتىس قازاقستان وبلىسىنداعى سۋ تاسقىنىنا قارسى ءىس-شارالارعا كومەكتەسۋ ءۇشىن ۇلتتىق ۇلاننىڭ «وڭتۇستىك» وڭىرلىك قولباسشىلىعىنا قاراستى اسكەري بولىمدەردەن 500-دەن اسا اسكەري قىزمەتكەر كەلدى. قىزىلوردا جانە شىمكەنت قالالارىنان كەلگەن ۇلاندىقتار ەلدى مەكەندەر ماڭىنا بوگەت تۇرعىزىپ, تۇرعىنداردى ەۆاكۋاتسيالاۋ جانە ول ايماقتاعى قوعامدىق قاۋىپسىزدىكتى قامتاماسىز ەتۋمەن اينالىستى. ءبىز بۇگىن وسى ساربازدارعا راحمەتىمىزدى ايتىپ, ماقتاۋ قاعازدارى مەن باعالى سىيلىقتار تابىستادىق», دەيدى ۇلتتىق ۇلاننىڭ «باتىس» وڭىرلىك قولباسشىلىعى قولباسشىسى پولكوۆنيك بەكايدار قازكەەۆ.
ماماندار قازىر باتىس قازاقستان وبلىسىنا سۋ تاسقىنىنان تونگەن قاۋىپ بەتى قايتتى دەپ وتىر. وسى كەزگە دەيىن قاۋىپتى ايماقتاردان 13 989 ادام كوشىرىلدى. وبلىس اۋماعىنداعى 12 ەۆاكۋاتسيالىق بەكەتتى ءالى دە 2 مىڭنان اسا ادام پانالاپ وتىر.
تابيعات اپاتىنان زارداپ شەككەن حالىققا مەملەكەت تاراپىنان كەشەندى كومەك كورسەتىلىپ جاتىر. سونىمەن بىرگە وزگە وڭىرلەردەن دە گۋمانيتارلىق جاردەم جەتۋدە. سوڭعى ەسەپ بويىنشا ءوز ەلىمىزدىڭ وبلىستارىنان جانە باسقا شەت مەملەكەتتەردەن – قىرعىزستان, تاجىكستان رەسپۋبليكالارىنان, رەسەيدىڭ داعىستان ولكەسىنەن بارلىعى 341 ملن تەڭگە كولەمىندە 849 توننا گۋمانيتارلىق كومەك كەلگەن.
باتىس قازاقستان وبلىسى
