الماتى وبلىسىنىڭ اكىمدىگىندە القالى جيىن ءوتىپ, وندا ءوزارا ءتيىمدى ىنتىماقتاستىق پەن ەكونوميكانىڭ ءتۇرلى سالاسىنداعى جوبالاردى بىرلەسىپ جۇزەگە اسىرۋدىڭ كەلەشەگى تالقىلاندى. وندا تۋريزم, اۋىل شارۋاشىلىعى جانە قۇرىلىس سالالارىنا ەرەكشە كوڭىل ءبولىندى. كەزدەسۋگە قاتىسۋشىلار سەرىكتەستىكتى كەڭەيتۋ جانە وسى سالالاردى دامىتۋعا باعىتتالعان ناقتى باستامالاردى جۇزەگە اسىرۋ مۇمكىندىكتەرىن ورتاعا سالدى.
شۇار ساۋدا-ونەركاسىپ پالاتاسى باسشىسىنىڭ ورىنباسارى تۇرسىنجان مۇحات ۇلى ءوز سوزىندە, الماتى وبلىسىنىڭ كاسىپكەرلەرى مەن قىتايدىڭ ىلە-قازاق اۆتونوميالىق ايماعى بيزنەس-قاۋىمداستىعى وكىلدەرى اراسىنداعى ىنتىماقتاستىقتىڭ كەلەشەگى زور ەكەنىنە سەنىم ءبىلدىردى. ول ءوڭىردىڭ ينۆەستيتسيالىق تارتىمدىلىعىنىڭ جوعارى دەڭگەيى ەكونوميكانىڭ ءتۇرلى سالاسىندا بىرلەسكەن جوبالاردى جۇزەگە اسىرۋعا قولايلى الاڭ تۋعىزاتىنىن باسا ايتتى. سونداي-اق وڭىردە تۋريزم, اۋىل شارۋاشىلىعى جانە قۇرىلىس سالاسىنىڭ بەلسەندى دامۋى, ينۆەستيتسيا مەن ءوزارا ءتيىمدى ىنتىماقتاستىققا كەڭ مۇمكىندىكتەر بەرەتىنىن دە اتاپ ءوتتى.
الماتى وبلىسى اكىمىنىڭ كەڭەسشىسى ايبار تەمەنوۆ قازاقستان مەن قىتاي اراسىنداعى ۇزاقمەرزىمدى قارىم-قاتىناستاردىڭ جوعارى دەڭگەيىن, تابىستى جۇزەگە اسىرىلعان جوبالاردىڭ سانىمەن راستالعانىن ايتتى.
«جىل سايىن ءوزارا ءتيىمدى بايلانىستار نىعايىپ جاتىر, بۇل ىنتىماقتاستىقتى ودان ءارى دامىتۋعا جانە ەكى ەلدىڭ بيزنەسى مەن ەكونوميكاسى ءۇشىن جاڭا پەرسپەكتيۆالىق مۇمكىندىكتەر جاساۋعا ىقپال ەتەدى. الماتى وبلىسى مەن قىتايدىڭ ىلە-قازاق اۆتونوميالىق وبلىسى اراسىنداعى ارىپتەستىكتى ءوزارا كەڭەيتۋ, ايماقتار اراسىنداعى ەكونوميكالىق بايلانىستى نىعايتۋعا سەپتىگىن تيگىزەتىنىنە سەنىمدىمىن», دەدى ايبار تەمەنوۆ.
الماتى وبلىسى
