بۇل رەتتە پرەزيدەنت قاسىم-جومارت توقاەۆتىڭ ۇلتتىق قۇرىلتايدىڭ اتىراۋدا بولعان ءۇشىنشى وتىرىسىنداعى: «مەن مەملەكەت باسشىسى رەتىندە ادىلەتتى قازاقستاندى قۇرۋدى ءوزىمنىڭ باستى مىندەتىم دەپ سانايمىن. پرەزيدەنت بولىپ سايلانعان العاشقى كۇندەردەن باستاپ ادىلدىك قاعيداسىن قاتاڭ ۇستانىپ كەلەمىن. بۇل يدەيا 2022 جىلى قىركۇيەكتە جاريالانعان جولداۋىمدا تولىققاندى تۇجىرىمداما رەتىندە كورىنىس تاپتى. وسى ورايدا «ادىلدىك» ۇعىمىنىڭ ساياسي ريتوريكادا جانە تاجىريبەدە قولدانىلۋى بەلگىلى ءبىر سىن-قاتەرلەر تۋىنداتىپ, ازاماتتاردى شامادان تىس ۇمىتتەندىرىپ, ولاردىڭ بيلىككە تالابىن كۇشەيتە ءتۇسۋى مۇمكىن دەگەن پىكىر بار. مەنىڭشە, بۇل ادىلدىك ۇعىمىنىڭ اياسىن تارىلتادى, جۇرت ونى يگىلىكتەر مەن رەسۋرستاردى تەڭ ءبولۋ دەپ قانا قابىلدايدى. شىن مانىندە, ادىلدىك – ەڭ الدىمەن, جۇرتتىڭ بارىنە بىردەي قۇقىق بەرۋ جانە جاۋاپكەرشىلىكتى بارشاعا تەڭ جۇكتەۋ دەگەن ءسوز. ادىلدىك پەن جاۋاپكەرشىلىك – تىعىز بايلانىستى ۇعىمدار. باسقاشا ايتساق, جاۋاپكەرشىلىك بولماسا, ادىلدىك تە بولمايدى. اركىم ءوز ىسىنە, مىندەتىنە جاۋاپكەرشىلىكپەن قاراسا, جەكە ازامات تا, بۇكىل ەل دە تابىسقا جەتەدى. ادىلدىكتىڭ قۋاتى وسىندا», دەگەن ءسوزى ويعا ورالادى.
وكىنىشكە قاراي, وتانداستارىمىزدىڭ ءبىرازىنىڭ بويىندا ناق وسى قاسيەت – جاۋاپكەرشىلىك جەتىسپەيتىنىن كۇندەلىكتى ومىردە كوزىمىزبەن كورىپ, كوڭىلىمىز ءتۇسىپ ءجۇر. جاۋاپسىزدىق – بيىلعى الاپات سۋ تاسقىنىنا جول بەرگەن جوعارى لاۋازىمدى شەنەۋنىكتەردەن باستاپ, قاراپايىم ازاماتتارعا دەيىن كەسەل بولىپ جابىسقان كەلەڭسىز قۇبىلىس.
جۋىردا ءبىر شارۋامەن ەلوردادان كوكشەتاۋ قالاسىنا بارىپ-قايتۋعا تۋرا كەلدى. سول ءۇشىن «يندرايۆەر» قوسىمشاسى ارقىلى ق. دەگەن تاكسي جۇرگىزۋشىسىمەن الدىن الا كەلىسىپ, ەرتەڭگى ساعات 9.00-دە جولعا شىعاتىن بولدىق. الايدا ق. ۋادەلى ۋاقىتتا كەلمەگەن سوڭ, وعان ەكى رەت تەلەفون سوقتىم. بىراق ول قوڭىراۋ بارىپ تۇرسا دا, جاۋاپ بەرمەدى. ارادا ءبىر ساعاتقا جۋىق ۋاقىت وتكەندە ءوزى تەلەفون شالدى. «كەشە كەشكە سىزدەن باسقا, ۋاعدالاسقان جولاۋشىلارىم ساپارعا شىعۋدان باس تارتقان سوڭ, بۇگىن كوكشەتاۋعا بارمايتىن بولدىم», دەدى ۇيقىلى-وياۋ كۇيدە. بۇل جايلى ماعان نەگە ۋاقتىلى حابارلاماعان سەبەبىن ايتىپ, كەشىرىم سۇراۋ ويىنا دا كىرمەگەن ءتارىزدى. سول ساتتە كەشە كەشكە مەنىڭ «يندرايۆەرگە» كىرىپ, تاپسىرىس جاساعانىمدى كورگەن تالاي تاكسي جۇرگىزۋشىسى حابارلاسىپ, الدەقايدا قولايلى ۇسىنىس جاساسا دا: «ق. دەگەن تاكسيشىگە ۋادە بەرىپ قويدىم. ۋادە – قۇداي ءسوزى», دەگەن ءۋاج ايتىپ, بارىنەن باس تارتقانىما بارماعىمدى تىستەدىم. ويلاپ كورسەم, ق.-عا دا, وزگە تاكسيشىلەرگە دە: «قايسىسىڭىز ەرتەڭ ءدال ساعات 9.00-دە ءۇيىمنىڭ الدىنا كەلىپ تۇراسىز – سونىڭ كولىگىنە مىنەمىن», دەپ ايتۋىم كەرەك بولعان ەكەن...
سودان «يندرايۆەر» ارقىلى تاعى كولىك ىزدەۋگە كىرىستىم. ىلە ە. دەگەن تاكسي جۇرگىزۋشىسى جاپ-جاڭا شەتەلدىك اۆتوموبيلىمەن جەتىپ كەلدى. كوكشەتاۋداعى باراتىن ورنىما ساعات 14.00-گە دەيىن جەتكىزۋگە ۋادە بەردى. الايدا جول بويى قاسىنا وتىرعىزىپ العان 12-13 جاسار نەمەرەسىمەن قالجىڭداسۋمەن جانە ۇيالى تەلەفونىمەن الدەكىمدەرمەن سويلەسۋمەن بولىپ, ءجۇرىسى ونە قويمادى. ششۋچينسك قالاسىنا كىرەبەرىستەگى اقىلى جولمەن جۇرگەنى ءۇشىن اقى الۋ پۋنكتىنە كەلگەندە بۇگىندە كولىك جۇرگىزۋشىلەرىنىڭ كوبى پايدالانىپ جۇرگەن قولايلى مۇمكىندىكتى قولدانىپ, ارناۋلى شوتقا الدىن الا اقشا اۋدارىپ قويماعاندىقتان, «كاspi.kz» قوسىمشاسى ارقىلى تولەم جاسايىن دەسە, ينتەرنەت جەلىسى ىستەمەي قالىپ, ال قولما-قول اقشامەن ەسەپ ايىرىسايىن دەسە, قالتاسىنداعى تيىن-تەبەنى جەتپەي, ساسقالاقتاپ, نە ىستەرىن بىلمەي ەداۋىر داعداردى. سودان سوڭ بىزگە, كابيناداعى جولاۋشىلارعا بۇرىلىپ, قولما-قول اقشامىز بولسا, بەرۋدى سۇرادى. ونداي اقشا مەنەن عانا تابىلىپ, 2 مىڭ تەڭگەلىكتى قولىنا ۇستاتتىم. ءسويتىپ, اقى الۋ پۋنكتىندە 5 مينۋتتاي بوگەلدىك. سونىڭ سالدارىنان ە. ماعان بەرگەن ۋادەسىن ورىنداي الماي, كوكشەتاۋعا ساعات 14.10-دا ارەڭ جەتكىزدى. مەن قاتىساتىن ءىس-شارا ءدال ۋاقىتىندا باستالىپ كەتكەن ەكەن, ۇياتتان قىسىلا-قىمتىرىلا كىرىپ, كوپشىلىكتەن كەشىرىم سۇراۋىما تۋرا كەلدى.
«يندرايۆەرمەن» يتشىلەگەن سول ساپاردى ءسىرا دا ۇمىتا قويماسپىن.
