قالانىڭ سەيسميكالىق جاعدايىن ەسكەرە وتىرىپ, ءتۇرلى جاعدايلاردىڭ الدىن الۋ ماقساتىندا ق.ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنىڭ ستۋدەنتتەرى مەن عالىمدارى ءموبيلدى جەر سىلكىنىسى سيمۋلياتورىن قۇراستىردى. سالماعى شامامەن 1,5 توننانى قۇرايتىن قۇرىلعى 7-9 باللعا دەيىنگى كولدەنەڭ جانە تىك جەر سىلكىنىسىنە لايىقتالىپ جاسالعان.
ق.ساتباەۆ اتىنداعى قازۇتزۋ ەنەرگەتيكا جانە ماشيناتانۋ ينستيتۋتى ديرەكتورىنىڭ ورىنباسارى, جوبا جەتەكشىسى, تەحنيكا عىلىمدارىنىڭ ماگيسترى ماقسات مىرزاقۇلوۆتىڭ ايتۋىنشا, الماتى جەر سىلكىنىسى ءجيى بولاتىن اۋماققا جاتاتىندىقتان, بۇل پلاتفورما جۇرتشىلىقتى ۇرەيگە بەرىلمەۋگە, جەر سىلكىنىسى بولا قالعان جاعدايدا ءوزىن دۇرىس ۇستاۋعا بەيىمدەۋگە, وڭتايلى شەشىم قابىلداۋعا ىقپال ەتەدى.
ء«موبيلدى ترەناجەر ۋنيۆەرسيتەتتىڭ ستۋدەنتتەر مەن ماگيسترانتتار جۇمىس ىستەيتىن تەحنيكالىق-كونسترۋكتورلىق بيۋروسىندا قۇرىستىرىلدى. وسىدان ءبىر جىل بۇرىن باستالعان قۇراستىرۋ جۇمىستارىن قالادا بولعان بىرنەشە جەر دۇمپۋىنەن كەيىن جىلدام اياقتاۋعا تۋرا كەلدى. ۋنيۆەرسيتەتتىڭ قارجىلاندىرۋىمەن جاسالعان ءموبيلدى پلاتفورمانى قۇراستىرۋ توبىنا 10-نان استام ستۋدەنت قاتىستى. وقىتۋشىلاردىڭ جەتەكشىلىگىمەن ازىرلەنگەن ءموبيلدى پلاتفورماداعى سيمۋلياتور جەر سىلكىنىسىنىڭ كولدەنەڭ جانە تىك بولىپ كەلەتىن تولقىندارىن كورسەتەدى. قۇرىلعىنى پايدالانۋ بارىسىندا ەڭ جوعارى رەجيم - 9 باللعا جەتكىزۋگە بولادى», دەيدى م.مىرزاقۇلوۆ.
جاقىندا ءموبيلدى پلاتفورمانى ۋنيۆەرسيتەت عالىمدارى الماتى قالاسى توتەنشە جاعدايلار دەپارتامەنتىنە تەگىن پايدالانۋعا بەردى. ەندىگى كەزەكتە تجد ماماندارى وسى ترەناجەر ارقىلى جەر تەربەلىسىن سەزدىرىپ, قالا تۇرعىندارىن ۇرەيسىز, ناقتى ءارى دۇرىس ءىس-ارەكەت ەتۋدى ۇيرەتەدى.
عالىمىڭ ايتۋىنشا, ەگەر ءموبيلدى پلاتفورما ەل قالالارىندا, ورتالىقتارىندا قولدانىلاتىن بولسا, تۇرعىندار جەر سىلكىنىسىنە مەيلىنشە دايىن بولار ەدى. مۇنداي قۇرىلعىلار شەتەلدىك تاجىريبەدە دە قولدانىلادى. ونىڭ نارىقتاعى قۇنى شامامەن 10-15 ملن تەڭگە تۇراتىن بولسا, ۋنيۆەرسيتەت عالىمدارى قۇراستىرعان ءموبيلدى پلاتفورمانىڭ وزىندىك قۇنى – 2 ملن تەڭگە.
الماتى
