فوتو: ماكسيم زولوتۋحين
اتالعان ناۋقاننىڭ ءۇشىنشى اپتاسى ء«بىزدىڭ قالا – ءبىزدىڭ تاۋلار, وزەندەر مەن كولدەر» ۇرانى اياسىندا ءوتىپ جاتقانىن ايتا كەتۋ كەرەك. اپتا ىشىندە جاعالاۋلار مەن سۋ ايدىندارى, ساياباقتار, سكۆەرلەر مەن تاۋ بوكتەرى تازارتىلادى.
قارعالى جوباسىنىڭ ماقساتى - ايماقتىڭ ەكوجۇيەسىن ساقتاي وتىرىپ, قالا تۇرعىندارىنىڭ دەمالۋى ءۇشىن نەعۇرلىم ىڭعايلى ءارى تارتىمدى ورتا جاساۋ.
مۇندا وزەن ارناسىن تازارتىپ, سەرۋەندەۋ ايماعىن قۇرۋ جوسپارلانىپ وتىر, 3 مىڭعا جۋىق اعاش وتىرعىزىلادى. سونداي-اق كوپجىلدىق گۇلدەر مەن شوپتەردىڭ گۇلزارى, قىلقان جاپىراقتى جانە جاپىراقتى اعاشتار مەن بۇتالار ەگىلەدى. جالپى ۇزىندىعى 2,7 شاقىرىمعا جەتەتىن سۋارمالى سۋ قۇبىرى تارتىلادى.
ودان بولەك, ۇزىندىعى 4,3 شاقىرىم بولاتىن 196 جارىق باعاناسى ورناتىلادى. كەلۋشىلەردىڭ جايلىلىعى ءۇشىن 135 ورىندىق پەن قوقىس جاشىگىن قويۋ جوسپاردا بار.
«جوبانىڭ ماڭىزدى بولىگى - بالالار مەن سپورت الاڭدارىن, جاياۋ ءجۇرۋ جولدارى مەن وزەن جاعاسىندا دەمالۋ مۇمكىندىگى بار جاڭا قوعامدىق كەڭىستىك قۇرۋ. اتكەنشەك, سىرعاناق جانە ورمەلەۋ سياقتى اشىق ويىن ەلەمەنتتەرى بالالاردىڭ موتوريكاسى مەن فيزيكالىق بەلسەندىلىگىن ارتتىرادى. بالالارعا ارنالعان قۇمسالعىشتار مەن سۋ ايماقتارىن, سونداي-اق اتا-انالارعا ارنالعان ورىندىقتارى مەن ۇستەلدەرى بار دەمالىس ايماعىن قۇرۋ جوسپارلانىپ وتىر. ءتۇرلى ەرەكشەلىگى بار بالالار ءۇشىن دە ويىن الاڭدارىندا ينكليۋزيۆتى ەلەمەنتتەر قويىلاتىنىن اتاپ وتكەن ءجون», دەلىنگەن اكىمدىك حابارلاماسىندا.
قالا اكىمدىگى حابارلاعانداي, قۇرىلىس جۇمىستارى 2024 جىلدىڭ قاراشا ايىنا دەيىن اياقتالادى.
