وبلىس ورتالىعىن قاق جارىپ وتەتىن قىلشاقتى وزەنى جاعالاۋىنداعى ونداعان ءۇيدى سۋ شايىپ كەتكەن ەدى. ەسكى ۇيلەر تابيعاتتىڭ سىناعىنا توتەپ بەرە الماي, تۇرعىندارى العاشقى بەتتە ابدىراپ قالعانى دا راس. بۇگىن ولار ءۇشىن اق تۇيەنىڭ قارنى جارىلعان تاماشا وقيعا بولدى. 8 وتباسى پاتەر كىلتىن الدى. ءبىر ايتا كەتەرلىگى, زارداپ شەككەندەر باسپانالارىن قالانىڭ ءار اۋدانىنان وزدەرى تاڭدادى.
– ءبىز وسىنداي قىسىلتاياڭ كەزدە ماسەلەنى تەزدەتىپ شەشۋدەمىز. جەرگىلىكتى بيۋدجەتتىڭ ەسەبىنەن 11 وتباسىنا پاتەر بەرىلدى. اقكول, ارشالى, ەرەيمەنتاۋ, جاقسى, زەرەندى, تسەلينوگراد اۋداندارىنىڭ 74 وتباسىنا تۇرعىن ۇيلەرىن جوندەۋگە كومەك كورسەتىلەدى. بارلىق زارداپ شەگۋشىگە 100 ايلىق ەسەپتىك كورسەتكىش كولەمىندە قارجىلاي دەمەۋ جاسالادى. ادامداردىڭ كوڭىل كۇيىن جاقسى ءتۇسىنىپ وتىرمىز. اپات كەزىندە قاۋىپتىڭ بەتىن قايتارۋعا اتسالىسقان ادامدارعا العىسىمدى بىلدىرەمىن. ەڭ الدىمەن ەلدىڭ بىرلىگىن كوردىك. قالا تۇرعىندارى دا, ەرىكتىلەر دە كومەكتەستى, – دەدى وبلىس اكىمى مارات احمەتجانوۆ سالتاناتتى ءراسىم كەزىندە.
پاتەر كىلتىنە يە بولعانداردىڭ دا قۋانىشى كول-كوسىر. ولار ءبىراۋىزدان پرەزيدەنت قاسىم-جومارت توقاەۆقا, ۇكىمەت پەن وبلىس باسشىلارىنا العىستارىن جاۋدىردى.
– كونە بولسا دا وسى شاڭىراقتان ۇل-قىزىمىزدى ءوسىرىپ, قۇتتى مەكەنىمىزگە اينالعان بوساعامىز عوي. قىزىل سۋدىڭ قۇرساۋىندا قالىپ, قابىرعاسى قاقىراعاندا وكىندىك تە, يىعىمىزعا تۇسكەن جۇكتى بىرلەسە كوتەرىسكەن ەلىمنەن اينالايىن, – دەيدى قالا تۇرعىنى اسحات ءبىلالوۆ.
پاتەر كىلتىن العان ادامداردىڭ ەسكى ۇيلەرى بىردەن بۇزىلىپ, ورىندارى تازارتىلىپ جاتىر. الداعى ۋاقىتتا بوساعان جەر تەلىمدەرىنە كوپقاباتتى تۇرعىن ۇيلەر سالىنۋى مۇمكىن. ايتەۋىر, كادەگە اساتىنى انىق.
كوكشەتاۋ
