قۇندى قولجازبا

مەكەمەنىڭ ەسەپكە الۋ, ساقتاۋ, كور­مە جانە وقۋ زالدارىنىڭ جۇمىسىن ۇيىم­داستىرۋ ءبولىمىنىڭ باسشىسى انار بايما­عامبەتوۆانىڭ ايتۋىنا قاراعاندا, بۇل جادىگەردى 2022 جىلى يسپانيا كورول­دىگىنىڭ قازاقستانداعى توتەنشە جانە وكىلەتتى ەلشىسى حورحە ۋربيولا ورتا­لىققا قوناققا كەلگەن ساتىندە سىي­لاعان ەكەن. كىتاپ وتە ۇلكەن, كولەمى – 36ح54 سم.

تۋىندى اۆتورى – حوسە سەلەستينو مۋتيس اتتى دارىگەر-بوتانيك. بۇل كىسى 1732 جىلى 6 ساۋىردە كاديس قالاسىندا دۇنيەگە كەلىپ, 1808 جىلى 76 جاسىندا وڭتۇستىك امەريكانىڭ بوگوتا شاھارىندا باقيلىق بولعان كورىنەدى. جارىقتىق كوزى تىرىسىندە دۇنيەنى شارلاپ, اسىرەسە گرانادا ايماعىنىڭ فلورا, فاۋناسىمەن تانىسۋدى ماقسات ەتكەن ەكەن.

جوعارىداعى ماقساتىنا قول جەتكىزۋ ءۇشىن 1763 جىلى يسپانيا كورولىنە حات جازىپ, اتالعان ايماققا ەكسپەديتسيا ۇيىمداستىرۋ يدەياسىن ۇسىنادى. بىراق بۇل ۇسىنىس ارادا 20 وتكەن سوڭ عانا شەشىمىن تابادى.

ءسويتىپ, دارىگەر-بوتانيك 1783-1816 جىلدار ارالىعىندا گرانادا ولكەسىنىڭ ۇلىستارى – ەكۆادور, پاناما, ۆەنەسۋەلا, پەرۋ, سولتۇستىك برازيليا قاتارلى مەملەكەتتەردىڭ تەرريتورياسىن 33 جىل بويى ءسۇزىپ شىعادى. ناتيجەسىندە, 8 مىڭ شاقىرىم جولدى باسىپ ءوتىپ, ولكەدە ءوسىپ-ءونىپ جاتقان 20 000 وسىمدىكتى گەرباريزاتسيالاپ, 7 000 جانۋارعا كلاسسيفيكاتسيا جاسايدى.

بۇل كىتاپ قازىرگى تاڭنىڭ وزىندە قۇن­دىلىعىن جويماعان وتە باعالى عىلىمي-ساراپتامالىق ەڭبەك رەتىندە تانىمال. ءارى دۇنيە ءجۇزى بوتانيكتەرى ەڭ كوپ پايدالاناتىن تۋىندى. مۇنداي قۇندى شىعارما قولجازبالار جانە سيرەك كىتاپتار ۇلتتىق ورتالىعىنىڭ قورىنان ورىن الۋى جاستاردىڭ ءبىلىم كوك­جيەگىن كەڭەيتۋىنە سەبەپ بولارى انىق.