فوتو: stan.kz
ء«بىزدىڭ كوك پاسپورتىمىزعا ەلىمىزدىڭ تۇعىرى سانالاتىن باستى قۇندىلىقتاردىڭ ءبارى سىيىپ تۇر. ونى بۇكىل الەم زاماناۋي وزىق مەملەكەتتىڭ قۇجاتى رەتىندە تانيدى. قازاقستان ازاماتتارى ونداعان مەملەكەتكە ۆيزاسىز بارا الادى جانە ءبىزدىڭ تاباندى جۇمىسىمىزدىڭ ارقاسىندا مۇنداي ەلدەردىڭ قاتارى كوبەيىپ كەلەدى. قازىر قازاقستان الەم تولقۇجاتتارى يندەكسىندە 66-ورىندا تۇر. بۇل – جامان كورسەتكىش ەمەس. بۇدان بولەك, سوڭعى جىلدارى قازاقستان ازاماتتىعىنان باس تارتقان ادامداردىڭ سانى ايتارلىقتاي ازايدى. وسىنىڭ ءبارى ەلىمىزدىڭ تۇراقتى دامىپ كەلە جاتقانىن, ءبىزدىڭ ەلگە قىزىعۋشىلىقتىڭ ارتا تۇسكەنىن جانە مەملەكەتىمىزدىڭ حالىقارالىق بەدەلى جوعارى ەكەنىن كورسەتەدى», دەدى پرەزيدەنت.
مەملەكەت باسشىسىنىڭ ايتۋىنشا, اسسامبلەيا جاستاردىڭ يدەولوگيالىق تاربيەسىن ايرىقشا نازاردا ۇستايدى.
«اسسامبلەيا ەتنوسارالىق كوممۋنيكاتسيا ورتالىقتارىن دامىتۋمەن جانە وسىنداي جاڭا ورتالىقتار اشۋمەن اينالىسادى. سونداي-اق الەۋمەتتىك ماڭىزى بار جوبالاردى قولداپ, ەرىكتىلەردى جانە جەرگىلىكتى بىرلەستىكتەردى ىنتالاندىرۋمەن شۇعىلدانادى. مەن ۇلتتىق قۇرىلتايدا قازىر ەلگە قاۋىپ ءتوندىرىپ تۇرعان بەس كەسەلگە توقتالدىم. اسسامبلەيا ناشاقورلىق, قۇمارپازدىق (لۋدومانيا), تۇرمىستىق زورلىق-زومبىلىق, ۆانداليزم جانە ىسىراپشىلدىق سياقتى الەۋمەتتىك كەسەلدەرمەن كۇرەسۋ ىسىندە ماڭىزدى ءرول اتقارادى. قاۋىپسىز ءومىر ءسۇرۋ ءۇشىن وسىنداي قاتەرلى قۇبىلىستاردان ءبىرجولا ارىلۋىمىز كەرەك. بۇل – اسىرەسە, ۇرپاقتىڭ بولاشاعى ءۇشىن ايرىقشا ماڭىزدى. ءبىز بالالار مەن جاستاردى بارىنشا قورعاپ, دۇرىس تاربيەلەۋىمىز قاجەت. قوعامدىق كەسەلدەردى تۇبىرىمەن جويامىز دەسەك, ورتاق ىسكە بۇكىل ەل بولىپ جۇمىلعان ءجون. ۇلتىنا, دىنىنە, الەۋمەتتىك جاعدايىنا قاراماستان, وعان بارلىعى اتسالىسۋى كەرەك», دەدى ەل پرەزيدەنتى.
« ۇلى ىستەر شاعىن ارەكەتتەردەن باستالادى». سول سياقتى كىشىگىرىم ارەكەتتەر اۋقىمدى وزگەرىستەرگە جول اشادى.
ء«ار ادامنىڭ وي-ساناسى جانە مىنەز-قۇلقى جاقسارسا, تۇتاس قوعام جاقسارادى. ماقسات-مۇراتى بيىك بولسا, ەلدىڭ رۋحى دا بيىك بولادى. «ادال ازامات» بولۋ اسا ماڭىزدى. ءبىر سوزبەن ايتساق, كەلەڭسىز ۇردىستەردەن جاي عانا جيرەنۋ جەتكىلىكسىز. ونى جويۋعا دا بەلسەنە اتسالىسۋ كەرەك», دەدى مەملەكەت باسشىسى.
