ەرلەر اراسىنداعى دۇنيەجۇزىلىك دودا 10-24 مامىر ارالىعىندا چەحيادا وتەدى. جەرلەستەرىمىز ۆ توبىنا ءتۇستى. قارسىلاستارىمىز – اقش (2 دۇركىن وليمپيادا چەمپيونى, 8 دۇركىن كۇمىس جانە 1 دۇركىن قولا جۇلدەگەرى, 2 دۇركىن الەم چەمپيونى, 4 دۇركىن كۇمىس جانە 9 دۇركىن قولا جۇلدەگەرى), شۆەتسيا (2 دۇركىن وليمپيادا چەمپيونى, 3 دۇركىن كۇمىس جانە 4 دۇركىن قولا جۇلدەگەرى, 11 دۇركىن الەم چەمپيونى, 17 دۇركىن كۇمىس جانە 16 دۇركىن قولا جۇلدەگەرى), سلوۆاكيا (الەم چەمپيونى جانە سول جارىستىڭ ءۇش دۇركىن جۇلدەگەرى), لاتۆيا (الەم چەمپيوناتىنىڭ قولا جۇلدەگەرى), گەرمانيا (وليمپيادانىڭ 3 جانە الەمنىڭ 5 دۇركىن چەمپيونى), فرانتسيا (ەۋروپا چەمپيونى) جانە پولشا (ەۋروپا چەمپيوناتىنىڭ كۇمىس جۇلدەگەرى) قۇرامالارى.
وزدەرىڭىز بايقاعانداي, قارسىلاستاردىڭ بارلىعى دا ازۋلى. قازاقستاننىڭ حوككەيشىلەرىندە ونداي اتاقتىڭ ءبىرى دە جوق. دەسەك تە كوپتەن قالماي, قالىڭ توپتىڭ اراسىندا جۇرگەن جايىمىز بار. سوعان دا شۇكىر دەيمىز. وسى سپورت ءتۇرىن سەرىك ەتكەن جەرلەستەرىمىز وليمپيا ويىندارىنا ەكى رەت قاتىستى. 1998 جىلى ناگانودادا سەگىزىنشى ورىن الساق, 2006 جىلى تۋريندە توعىزىنشى ساتىعا تابان تىرەدىك. الەم چەمپيوناتتارىندا 11 مارتە بوي كورسەتتىك. ەڭ ۇزدىك كورسەتكىشكە 2021 جىلى قول جەتكىزدىك. بالتىق جاعالاۋىندا وتكەن سول جارىستا پلەي-وففقا جولداما الۋعا شاق قالىپ, 10-ورىندى قاناعات تۇتتىق. بۇعان قوسا ازيا ويىندارىندا – 4 التىن (1996, 1999, 2011, 2017 جىلدارى) مەن 2 قولا (2003, 2007), دۇنيەجۇزىلىك ۋنيۆەرسيادادا – 1 التىن (1995), 4 كۇمىس (1993, 2013, 2015, 2017) جانە 2 قولانى (2007, 2023) ەنشىلەدىك.
چەحيادا جالاۋى جەلبىرەيتىن جارىستا ا توبىندا كانادا, فينليانديا, شۆەيتساريا, چەحيا, دانيا, نورۆەگيا, اۋستريا جانە ۇلىبريتانيا قۇرامالارى ونەر كورسەتەدى. ولار پراگادا كۇش سىناسسا, ۆ توبىنداعىلار وستراۆادا وينايدى.
سوڭعى الەم چەمپيوناتى بىلتىر فينليانديا مەن لاتۆيادا وتكەن ەدى. بۇل جارىستىڭ باس جۇلدەسى كانادا قۇراماسىنا بۇيىردى. ۇيەڭكى جاپىراقتار ەلىنىڭ وكىلدەرى فينالدا گەرمانيانى 5:2 ەسەبىمەن ۇتتى. وسىلايشا, كانادالىقتار ءوز تاريحىندا 28 مارتە تورتكۇل دۇنيەنىڭ تەڭدەسسىزى دەپ تانىلدى. بۇل – رەكوردتىق كورسەتكىش. اقش پەن لاتۆيا اراسىنداعى قولا مەدال ءۇشىن تارتىس وۆەرتايمعا دەيىن ۇلاسىپ, ناتيجەسىندە 4:3 ەسەبىمەن بالتىق جاعالاۋىنىڭ ورەندەرى جەڭىستى تويلادى. بۇل – لاتۆيالىقتاردىڭ دۇنيەجۇزىلىك دوداداعى العاشقى جۇلدەسى. ال قازاقستاننىڭ حوككەيشىلەرى اتالعان جارىستا نورۆەگيا (4:3, بۋلليت), سلوۆاكيا (4:3, بۋلليت) جانە سلوۆەنياعا (4:3) سان سوقتىرعانىمەن, چەحيا (1:5), شۆەيتساريا (0:5), كانادا (1:5) جانە لاتۆياعا (0:7) ەسە جىبەردى. ناتيجەسىندە, 11-ورىنعا تۇراقتادىق.
