شەتەلدىك ارىپتەستەرگە پرەزيدەنت تەلەراديوكەشەنى رەسۋرستارىنىڭ شىعارماشىلىق جانە تەحنيكالىق مۇمكىندىكتەرى كورسەتىلدى. اتاپ ايتقاندا, «Jibek joly», «Silk Way» جانە «Silk Way Cinema» تەلەارنالارى, «Kazinform» حاا, دەرەكتى كينو ورتالىعى تانىستىرىلدى.
كەزدەسۋگە قاتىسۋشىلار قر پرەزيدەنتى ترك جانە Al Jazeera Media Network ۇيىمداستىرعان MNU حالىقارالىق جۋرناليستيكا مەكتەبىندەگى «Al Jazeera اپتالىعى» تۋرالى پىكىر الماستى.
Al Jazeera تەلەكومپانياسىنىڭ باسشىسى, دوكتور موستەفا سۋاگ بۇل ءىس-شارانىڭ ماڭىزدىلىعىن اتاپ ءوتتى. شارا بارىسىندا قاتار تەلەارناسىنىڭ ماماندارى قازاقستاندىق ستۋدەنتتەر مەن جۋرناليستەرگە زاماناۋي مەديانىڭ وزەكتى ماسەلەلەرى بويىنشا ءبىر اپتالىق ترەنينگ وتكىزەدى.
– استانادا وتكىزىلگەن كۇندەر ماڭىزدى وقيعالارعا تولى جانە جەمىستى بولدى دەپ ەسەپتەيمىن. ترەنينگ جوعارى دەڭگەيدە ۇيىمداستىرىلعان, قاتىسۋشىلار بەلسەندىلىكتەرىمەن جانە ءبىزدىڭ تەلەكومپانيانىڭ ستاندارتتارى مەن ستيلىنە دەگەن قىزىعۋشىلىقتارىمەن تاڭ قالدىردى. سىزدەردە دە جۋرناليستيكا مەكتەبىنىڭ ءداستۇرى بەرىك, الەمدىك ۇردىستەرگە ىلەسىپ جاتقانىن كورىپ وتىرمىز. بۇل رەتتە مەن ەلدەرىڭىزدىڭ سۇلۋلىعىن جانە ونىڭ تۋريزم سالاسىنداعى زور الەۋەتىن اتاپ وتكىم كەلەدى, - دەدى موستەفا سۋاگ.
ەسكە سالساق, قازاقستان پرەزيدەنتى قاسىم-جومارت توقاەۆتىڭ بيىل اقپاندا قاتارعا مەملەكەتتىك ساپارى اياسىندا پرەزيدەنت تەلەراديوكەشەنى مەن Al Jazeera اراسىندا ىنتىماقتاستىق تۋرالى مەموراندۋمعا قول قويىلعان بولاتىن.
- تەلەراديوكەشەنىمىزدىڭ قاتارلىق ارىپتەستەرمەن بىرلەسكەن جوبالارى ءبىلىم بەرۋ جانە اقپارات سالاسىنداعى ىنتىماقتاستىقتى دامىتۋعا باعىتتالعان. بۇل ءبىزدىڭ ەلدەرىمىزدىڭ اۋديتورياسىنا ايماقتىق جاڭالىقتاردى كوبىرەك بىلۋگە, سونداي-اق جۋرناليستەردىڭ مەديا سالاسى ترەندتەرى مەن تەندەنتسيالارىنا سايكەس دايىندالۋىن قامتاماسىز ەتۋگە مۇمكىندىك بەرەدى. «Al Jazeera-مەن ءبىر اپتا» اتتى العاشقى بىرلەسكەن جوبامىزدىڭ ناتيجەسى شابىتتاندىرماي قويمايدى. ىنتىماقتاستىعىمىزدىڭ كەلەسى كەزەڭى كونتەنتتى بىرلەسىپ جاساۋ جانە الماسۋ باعىتىنداعى دا جوبالار بولماق, - دەپ اتاپ ءوتتى پرەزيدەنت ترك ديرەكتورى راۋشان قاجىباەۆا.
«Al Jazeera اپتالىعى» قاتىسۋشىلارىنا «جاڭالىقتار رەپورتاجى», «دەرەكتەر جۋرناليستيكاسى», ء«موبيلدى جۋرناليستيكا», «تسيفرلىق ستوريتەللينگ» جانە «جاڭالىقتار جۇرگىزۋشىلەرىنىڭ كۋرستارى» سياقتى تاقىرىپتاردا 100 ساعاتتان استام تەوريالىق جانە پراكتيكالىق ساباقتار بەرىلدى.
مۇنداي وقىتۋ قازاقستاندا عانا ەمەس, ورتالىق ازيا ايماعىندا دا جۇرگىزىلىپ جاتىر. ءدارىس كۋرسىنىڭ سوڭىندا ستۋدەنتتەر وقۋ باعىتتارىنىڭ ارقايسىسى بويىنشا كۋرستىق جوبالاردى قورعايدى, سونداي-اق Al Jazeera Media Institute سەرتيفيكاتتارىن الادى.
ايتا كەتسەك, قر پرەزيدەنتىنىڭ تەلەراديوكەشەنى قازاقستانداعى ءىرى مەديا-كومپانيالاردىڭ ءبىرى, ونىڭ قۇرامىنا Jibek Joly, Silk Way, Silk Way Cinema تەلەارنالارى, «Kazinform» حالىقارالىق اقپاراتتىق اگەنتتىگى, دەرەكتى فيلمدەر ورتالىعى كىرەدى.
Al Jazeera تەلەكومپانياسى 1996 جىلى قاتار ءامىرىنىڭ بۇيرىعىمەن قۇرىلعان. تەلەكومپانيا الەمنىڭ كوپتەگەن ەلىندە اراب جانە اعىلشىن تىلدەرىندە حابار تاراتادى جانە 50-دەن استام شەتەلدىك بيۋروسى بار. دەرەكتى فيلمدەرى Al Jazeera Documentary ارناسىندا كورسەتىلەدى.
بۇعان دەيىن Maqsut Narikbayev ۋنيۆەرسيتەتىنىڭ حالىقارالىق جۋرناليستيكا مەكتەبىندە «Al Jazeera Week» - «Al Jazeera اپتالىعى» سالتاناتتى تۇردە اشىلعان بولاتىن.
