قىسىلتاياڭدا ەلدىڭ بەلسەندى, جاناشىر, قالتالى ازاماتتارى ءۇي-جايى سۋ استىندا قالعان اعايىنعا كومەككە اسىقتى. ەرىكتىلەر قۇتقارۋشىلارعا ىلەسىپ, تاسقىننىڭ الدىن الۋ جۇمىستارىنا ارالاستى. قالا, اۋدان, اۋىلداردان جىلۋ جونەلتىلدى. ءساۋىردىڭ باسىندا قىرعىزستان مينيسترلەر كابينەتىنىڭ باسشىسى اقىلبەك جاپاروۆ قىرعىزستان توتەنشە جاعدايلار مينيسترلىگىنىڭ بۇگىن-ەرتەڭ قازاقستانعا گۋمانيتارلىق كومەك جونەلتەتىنىن حابارلاعان. ايتسا ايتقانداي-اق كوپ ۇزاماي قىرعىزستاننىڭ توتەنشە جاعداي مينيسترلىگى جونەلتكەن 15 جۇك كولىگى مەن جول تالعامايتىن ءبىر كولىك ەل شەكاراسىنان ءوتتى. 300 تونناعا جەتاعابىل جۇكتە سۋ, كۇرىش, قاراقۇمىق جارماسى, شاي, قانت, تاعىسىن-تاعى ازىق-ت ۇلىك قورى بولعان.
جىلىتقىش, كەرەۋەت, شاتىر جانە باسقا دا كەرەك-جاراق تيەلگەن. وسى مەزگىلدە پرەزيدەنت قاسىم-جومارت توقاەۆ قىرعىزستان حالقىنا كورسەتكەن كومەگى ءۇشىن العىس ايتىپ, تۇركيا, تاجىكستاننىڭ مەملەكەت باسشىلارىمەن تەلەفون ارقىلى سويلەستى.
سۋ تاسقىنى سالدارىنان قالىپتاسقان كۇردەلى احۋالعا بايلانىستى قولداۋ كورسەتكەنى ءۇشىن العىس ايتتى. باۋىرلاس ەلدەر سۋ تاسقىنىنا بايلانىستى قاجەتىنشە كومەك كورسەتۋگە دايىن ەكەنىن دە مالىمدەدى. ازەربايجان سىرتقى ىستەر مينيسترلىگى باۋىرلاس ەلدەگى جاعدايعا الاڭداۋلى ەكەنىن حابارلادى. باۋىرلاس ەلدەر قيىن-قىستاۋ كۇندەردە قازاقستاندىقتارمەن نيەتتەس ەكەنىن بايقاتتى.
ال جاقىن بەرىدە تاجىكستاننان سۋ باسقان ايماق تۇرعىندارىنا 56 ۆاگون جانە 15 جۇك كولىگىمەن گۋمانيتارلىق كومەك جەتتى. ۆاگوندا ازىق-ت ۇلىك پەن كۇندەلىكتى تۇتىناتىن تاۋارلار, قۇرىلىس ماتەريالدارى بار. تاۋاردىڭ جالپى كولەمى 3 500 توننادان اسادى. تاجىكستان دەلەگاتسياسىن باستاپ كەلگەن قوناقتاردى تۇركىستان وبلىسىنىڭ جۇرتشىلىعى «سارىاعاش» تەمىرجول ستانساسىنان كۇتىپ الىپ, تاجىك حالقىنا العىس ايتتى. تاجىكستان تاراپى قازاقستانداعى احۋالعا بەيجاي قاراماي, كومەك كەرۋەنىن جونەلتۋگە اسىعىپتى. سودان قۇرىلىس ماتەريالدارى مەن ازىق-ت ۇلىك تيەلگەن گۋمانيتارلىق كەرۋەن ءارى قاراي سۋ باسقان ايماقتارعا جونەلتىلدى.
وسىعان دەيىن وزبەكستاننان ەلگە 15 جۇك كولىگىمەن گۋمانيتارلىق كومەك جەتتى. تۇركىستان وبلىسىنداعى قونىسباەۆ كەدەن بەكەتىنەن وتكەن كومەك كەرۋەنىن باستاپ كەلگەن دەلەگاتسيانى وبلىس باسشىلىعى كۇتىپ الىپ, كورشى ەلدىڭ ءىلتيپاتىنا العىس ايتتى. جۇك كولىكتەرىنە تۇرمىسقا قاجەتتى زاتتار مەن قۇرىلىس ماتەريالدارى, توسەكتەر, كيىم-كەشەك سەكىلدى باسقا دا زاتتار تيەلگەن. وزبەكستاننان كەلگەن دەلەگاتسيانىڭ قاتارىنداعى شەرزودحون قۋديراتحودجا باۋىرلاس ەلدەردىڭ ىنتىماق-بىرلىگى اجىراماسىن دەپ قازاق حالقىنا تىلەكتەس ەكەنىن ءبىلدىردى.
– قازىر قازاق باۋىرلارىمىز تابيعي اپاتتان زارداپ شەگىپ جاتقاندا ءبىز قالاي كومەك كورسەتە الامىز, باسقا تۇسكەن اۋىرتپالىقتى قالاي جەڭىلدەتەمىز دەپ ءوزارا اقىلداستىق. قازىر 300 توننادان اسا ەڭ كەرەكتى زاتتاردى جيناپ اكەلدىك. مۇندا ازىق-ت ۇلىكتەن باستاپ اسا قاجەتتى قۇرال-جابدىقتار بار. باۋىرلاس ەلدەردىڭ ىنتىماق-بىرلىگى اجىراماسىن. اپاتتاردان امان بولايىق. ءبىز سىزدەرمەن قاشاندا بىرگەمىز, – دەپ ىزگى تىلەگىن جەتكىزدى دەلەگاتسيا وكىلى.
وسىدان سوڭ مەملەكەت باسشىسى قاسىم-جومارت توقاەۆ وزبەكستان پرەزيدەنتى شاۆكات ميرزيوەۆپەن تەلەفون ارقىلى سويلەسىپ, ەلدەگى تابيعي اپاتتا تىلەۋلەستىك تانىتىپ, كومەك كورسەتكەنى ءۇشىن پرەزيدەنتتىڭ وزىنە جانە باۋىرلاس وزبەكستان حالقىنا العىس ايتتى.
قىسىلتاياڭ ۋاقىتتا ىزگى نيەتتى, قامقور جاندار سۋ باسقان ولكەلەرگە قولدان كەلگەن كومەگىن ايانىپ قالمادى. قالتالى ازاماتتار ءبىر جاعىنا شىعىسىپ, قولداۋ كورسەتتى. كورشى ەلدەردەن دە توننالاپ كومەك كەرۋەنى جەتتى. ارينە, اپات ايماقتارىنا مەملەكەت كولەمىندە كومەك كورسەتىلىپ جاتقان سوڭ, ءۇي-كۇيسىز قالعان ازاماتتار تاسادا قالمايتىنى تۇسىنىكتى عوي. دەگەنمەن قازاق حالقىمەن ىقىلاس-نيەتى ءبىر, دوستىق قارىم-قاتىناسى بەرىك ەلدەردىڭ كورسەتكەن قولداۋىنىڭ ءجونى بولەك بولادى ەكەن. ەلدەگى احۋالعا الاڭداپ, كومەك كورسەتۋگە اسىققان مەملەكەتتەرگە قازاقستان حالقىنىڭ العىسى زور.
