سۋرەتتەردى تۇسىرگەن – اۆتور
مايدانگەر سۋرەتشىنىڭ تۋعانىنا بيىل 100 جىل تولىپ وتىر. وسىعان وراي مەملەكەتتىك ورتالىق مۋزەي تورىندە «ساعىنىش» دەپ اتالعان كورمە اشىلدى. 80-نەن استام كوركەم تۋىندى قويىلعان كورمەگە قاڭتارباەۆتىڭ قولتاڭباسىنان شىققان بىرەگەي شىعارمالار مەن ءىزباسار شاكىرتتەرىنىڭ ىزدەنىستەرى قويىلعان.
قىرعىزباي قاڭتارباەۆ قازىرگى اباي اتىنداعى قازاق ۇلتتىق پەداگوگيكالىق ۋنيۆەرسيتەتىن بىتىرگەن. ۇزاق جىلدار بويى ۇستازدىق قىزمەتپەن جانە قولدانبالى ونەر بۇيىمدارىن جاساۋمەن اينالىسقان ول, ۇلتتىق ونەرىمىزدىڭ دامۋىنا زور ۇلەس قوستى. شەبەردىڭ تۋىندىلارى قازاقستان مەن رەسەيدىڭ تانىمال مۋزەيلەرىنىڭ كوللەكتسياسىنا ەنگەن.
كورمە قازاقتىڭ ۇلتتىق مادەنيەتىن, تاريحى مەن داستۇرلەرىن پاش ەتەدى. قاڭتارباەۆ جاساپ شىققان اباي, جامبىل, ش.ءۋاليحانوۆ, ب.مومىش ۇلى مۇسىندەرى – مۋزەيدەگى ماڭىزدى جادىگەرلەردىڭ ءبىرى. ونەر يەسى ءمۇسىن جانرىندا تابىستى ەڭبەك ەتە ءجۇرىپ, قازاق تاريحىنداعى باسقا دا كورنەكتى تۇلعالاردىڭ بەينەلەرىن جاسادى.
ءار وتباسىنىڭ ۇرپاقتان-ۇرپاققا جالعاساتىن وزىندىك سالتى مەن ءداستۇرى بار. ونەر ساباقتاستىعى قاڭتارباەۆتار وتباسىندا دا جالعاسىن تاپتى. ونىڭ بالالارى مەن نەمەرەلەرى دە ونەردەن ءورىس تاپقان. كورمەدەگى قاڭتارباەۆتار وتباسىنىڭ ساندىك-قولدانبالى ونەر بۇيىمدارى, مۋزىكالىق اسپاپتارى, مۇسىندەرى, كەسكىندەمەلەرى دە كوپشىلىكتىڭ قىزىعۋشىلىعىن تۋدىردى.
– مايدانگەر سۋرەتشى قازاق بەينەلەۋ ونەرىندە ءوز ورنەگىن قالدىردى. ونىڭ قولىنان شىققان مۇسىندەر, تاۋ تۇلعالارىمىزدىڭ بەينەسىن اسقاقتاتتى. ونەر يەسى تىرشىلىگىندە ءوزىنىڭ قوبىزىن مۋزەيگە سىيعا تارتقان. وسىناۋ ايرىقشا بۇيىم مۋزەيىمىزدەگى قۇندى جادىگەرلەردىڭ ءبىرى. اتالارىنىڭ بەكزات ونەرىن جالعاعان بالالارى مەن نەمەرەلەرى دە بۇگىنگى تاڭدا ۇلت مادەنيەتىنە ەڭبەك ەتىپ ءجۇر, – دەيدى مەملەكەتتىك ورتالىق مۋزەي ديرەكتورىنىڭ ورىنباسارى عاليا تەمىرتون.
مەرەيتويلىق كورمەنىڭ ماڭىزدى بولىگى مايدانگەر سۋرەتشىنىڭ شاكىرتتەرى مەن ءىزباسارلارىنا ارنالدى. ولار, قازاقستاننىڭ تانىمال سۋرەتشىلەرى — ومىربەك جۇبانيازوۆ, ەرلان قوجاباەۆ, جاميليا تاكەن, داستان ورازحان, نۇرلان ساتاەۆ, قايىرباي زاكىروۆ, ورازبەك ەسەنباەۆ, جانۇزاق ءمۇساپىر, توققوجا قوجاعۇلوۆ, قاناعات كودەكوۆ, اسقار بەيشەكەەۆ, سەرگەي پوجارسكي, ميرلان قۇلدىباەۆ, مارلان نىسانباەۆ, بەيسەبەك اقاناەۆ, نۇردانا قىرعىزباەۆا, ديانا مۇحاممەد, بولات قۇسايىنوۆ, دياس قانتارباەۆ, مارات تۇرعىنباي, كاميل مامۋكادزە, نەللي بۋبە, ليديا دروزدوۆا, يگور گۋششين, جانىبەك سۇيىنبەكوۆ, يرينا مەلامەنت, گريگوري گولوۆكوۆ, جانات سەيىتحامزا, ماقسات قاڭتارباەۆ دەپ جالعاسا بەرەدى. سۋرەتشىلەردىڭ وزىندىك قولتاڭباسى, ەرەكشە ءستيلى, ورىنداۋ ءتاسىلى, سەزىمدەرى جانە قورشاعان الەمدى قابىلداۋى سان الۋان. ەڭ عاجابى, جوعارىدا اتى اتالعان بەلگىلى سۋرەتشىلەردىڭ بىرقاتارى وزدەرىنىڭ باعالى كارتينالارىن مۋزەي قورىنا سىيعا تارتتى.
الماتى
