مۇنداي مادەني ءىس-شارا وبلىستىق مادەنيەت, ارحيۆتەر جانە قۇجاتتاما باسقارماسىنىڭ قولداۋىمەن العاش رەت ءوتىپ وتىر. وبلىستىق دەڭگەيدە ۇيىمداستىرىلسا دا, 61 قاتىسۋشىدان ءوتىنىم تۇسكەن. ۇسىنىلعان اۋديوەرتەگىلەر اراسىندا قازاق, ورىس حالقىنىڭ ەرتەگىلەرى, سونداي-اق اۆتورلىق ەرتەگىلەر بار.
«كورۋ قابىلەتى بۇزىلعان بالالارعا ارنالعان «ەرتەگىلەر الەمى» اتتى وبلىستىق اۋديوەرتەگىلەر بايقاۋىندا قازىلىق ەتتىك. بايقاۋعا كەلىپ تۇسكەن ماتەريالداردىڭ بارلىعىن تىڭداپ, ۇيىمداستىرۋشىلار ۇسىنعان بايقاۋ ولشەمدەرىنە ساي باعالاپ شىقتىق. وسى جۇمىستى اتقارۋ بارىسىندا قاتىسۋشىلاردىڭ ەڭبەكقورلىعىنا, جاۋاپكەرشىلىگىنە, شەبەرلىكتەرىنە سۇيسىندىك. اۋديوەرتەگىنىڭ ماتىنىمەن قوسا داۋىستارىنان تىڭدارماندارعا دەگەن ىستىق ىقىلاس, اۋىز ادەبيەتىنە دەگەن زور سۇيىسپەنشىلىك بايقالىپ تۇردى. كورۋ قابىلەتى بۇزىلعان بالالاردىڭ ەرەكشەلىگىن ەسەپكە الا وتىرىپ, ەرتەگى وقۋعا قويىلاتىن تالاپتاردى ساقتاۋعا تىرىسقان. قاتىسۋشىلاردىڭ دەنى جالپى ءبىلىم بەرەتىن مەكتەپ مۇعالىمدەرى مەن كىتاپحاناشىلار بولدى. جەڭىمپازداردى ماراپاتتاۋ سالتاناتىنا كورەرمەن رەتىندە قاراعاندى وبلىستىق زاعيپ جانە ناشار كورەتىن ازاماتتارعا ارنالعان ارنايى كىتاپحانانىڭ تۇراقتى وقىرماندارى كەلدى. ولار بۇل بايقاۋدىڭ وزدەرىنىڭ اۋديتورياسىنا لايىقتاپ ۇيىمداستىرىلعانىنا ريزاشىلىقتارىن ءبىلدىردى», دەيدى قازاقستان جازۋشىلار وداعىنىڭ مۇشەسى, بوكەتوۆ اتىنداعى قاراعاندى زەرتتەۋ ۋنيۆەرسيتەتىنىڭ اعا وقىتۋشىسى, قازىلار القاسىنىڭ توراعاسى سالتانات كەڭەسبەكوۆا.
بۇل وبلىستىق بايقاۋعا قاراعاندى, تەمىرتاۋ, شاحتينسك, ساران, اباي, بالقاش, پريوزەرسك قالالارى مەن بۇقار جىراۋ, شەت, وساكاروۆ, اقتوعاي, نۇرا اۋداندارىنان كوپ جۇمىس تۇسكەن. قاتىسۋشىلاردىڭ دەنى اقتوعاي مەن نۇرا وڭىرىنەن. سونىمەن, «ونەردىڭ كۇشى» اتتى قازاق حالىق ەرتەگىسىن اۋديوعا شەبەر تاسپالاعان نۇرالىق كىتاپحاناشى گ ۇلىماي احمەتبەكوۆا ءبىرىنشى ورىن الدى.
«بايقاۋعا ەرتەگى تاڭداعاندا كوپ ويلاندىق. كوپ وقىلا بەرمەيتىن, ەرەكشەسىن تاڭداۋدى ءجون سانادىق. سويتتىك تە, تاڭداۋىمىز «ونەردىڭ كۇشىنە» ءتۇستى. ۋاقىتىن دا ۇزارتىپ الماۋ كەرەك بولدى. اسىعىس تا وقىماۋ كەرەك. باستىسى, ەرتەگىنى تىڭداعان بالانىڭ جۇرەگىنە اسەر ەتۋ, ەرەكشە يىرىممەن جەتكىزۋدى كوزدەدىك. قازىلار القاسى ءبىزدىڭ جۇمىسىمىزدى ۇزدىك دەپ تانىعانىنا ءبىر قۋانىپ, بۇل ەرتەگىلەردىڭ اۋديوكىتاپقا جيناقتالاتىنىن ەستىپ ەكى قۋاندىق», دەيدى بايقاۋ جەڭىمپازى گ ۇلىماي احمەتبەكوۆا.
ال ەكىنشى ورىندى «ەرىنشەك ادام» اۋديوەرتەگىسىمەن اقتوعايلىق ءالي سەيدىعالي, ءۇشىنشى ورىندى قاراعاندى قالاسىنان «سكازكي دليا سوفي-ۆەسەننىي ۆەتەروك» («پريدۋمكي وت الينكي» سەرياسىنان) اۋديوەرتەگىسىمەن ناتاليا موروزوۆا يەلەندى.
مۇنىمەن قوسا, «ۇزدىك اۋديوقويىلىم» اتالىمىندا «التىن ساقا» شىعارماسى ءۇشىن جاننۇر الياسقاروۆا, «لۋچشي چتەتس» اتالىمىندا «باي-مۋزىكانت ي الدار-كوسە» ەرتەگىسى ءۇشىن رومان تەن ىنتالاندىرۋ سىيلىعىمەن ماراپاتتالدى. جۇلدەگەرلەرگە ديپلوم مەن قارجىلاي سىيلىق بەرىلدى.
مۇنداي يگىلىكتى ءىس-شارا ەندى داستۇرگە اينالماق. ءبىر قىزىعى, ۇيىمداستىرۋلار القاسى جۇمىستاردى قابىلداۋ كەزىندە بايقاۋعا باتىس قازاقستاننان ءوتىنىم تۇسكەنىن كەزىكتىرىپتى. مۇنى ەسكەرگەن ۇيىمداستىرۋشىلار كەلەر جىلى رەسپۋبليكالىق دەڭگەيدە وتكىزەمىز دەپ وتىر.
قاراعاندى وبلىسى
