پرەزيدەنت اۆتويندۋستريانى دامىتۋ قازاقستاننىڭ ونەركاسىپ ساياساتىنىڭ نەگىزگى باعىتتارىنىڭ ءبىرى سانالاتىنىن اتاپ ءوتتى.
حو-سۋنگ سونگ قاسىم-جومارت توقاەۆقا قوستانايداعى اۆتوموبيل شىعاراتىن تولىق تسيكلدى زاۋىت قۇرىلىسىنىڭ بارىسى تۋرالى مالىمەت بەردى. زاۋىت جىل سوڭىنا دەيىن پايدالانۋعا بەرىلمەك.
جوبانى جۇزەگە اسىرۋ ءۇشىن 90 ميلليارد تەڭگەدەن استام ينۆەستيتسيا تارتىلعان. 1,5 مىڭ تۇراقتى جۇمىس ورنىن اشۋ جوسپارلانىپ وتىر.
زاۋىتتىڭ جوبالىق قۋاتى جىلىنا 70 مىڭ اۆتوموبيل شىعارۋعا ەسەپتەلگەن. ونىڭ ىشىندە 50 مىڭ اۆتوموبيل ۇساق بولشەكتەردەن قۇراستىرۋ ادىسىمەن وندىرىلەدى, ياعني جەرگىلىكتى ءونىم ۇلەسى بارىنشا جوعارى بولادى.
سونىمەن قاتار حو-سۋنگ سونگ ءاۆتوموبيلدىڭ قوسالقى بولشەكتەرىن جاھاندىق دەڭگەيدە وندىرۋشىلەردى قازاقستانعا تارتۋ جۇمىستارى جۇرگىزىلىپ جاتقانىن جەتكىزدى.
اتاپ ايتقاندا, ەلىمىزدە اۆتوكولىكتىڭ قوسالقى بولشەكتەرىن شىعاراتىن زاۋىت سالۋ جونىندە كورەيالىق Seyong EHWA (KIA كولىكتەرىنە ارنالعان اۆتوبولشەكتەر ءوندىرۋشى) كومپانياسىمەن كەلىسىمگە قول قويىلدى.
مەملەكەت باسشىسى KIA كورپوراتسياسىنىڭ قازاقستاندا اۆتوبولشەكتەردىڭ جەرگىلىكتى ءوندىرىسىن جولعا قويۋ تۋرالى شەشىمىن قۇپتادى. سونداي-اق اتالعان سالانى دامىتۋ ءۇشىن بىلىكتى وتاندىق ماماندار دايارلاۋ قاجەت ەكەنىن ايتتى.
