فوتو: direct.farm/
س.سەيفۋللين اتىنداعى قازاق اگروتەحنيكالىق زەرتتەۋ ۋنيۆەرسيتەتىنىڭ عالىمدارى پروكاريوتتىق پرودۋتسەنتتىك شتاممدارمەن ەكسپرەسسيالانعان بىرىكتىرىلگەن رەكومبينانتتى Brucella spp اقۋىزدارىمەن سەنسيبيليزاتسيالانعان ەريتروتسيتتەردى پايدالانۋعا نەگىزدەلگەن برۋتسەللەزدى سەرولوگيالىق دياگنوستيكالاۋعا ارنالعان جاناما گەماگگليۋتيناتسيا رەاكتسياسى-جيناعىن ازىرلەدى.
«وتاندىق قۇرامداس بولىكتەردەن جاسالعان جاناما گەماگگليۋتيناتسيا رەاكتسياسى-جيناعىن دياگنوستيكالىق تاجىريبەگە ەنگىزۋ دياگنوستيكۋمنىڭ قاراپايىمدىلىعى مەن تومەن قۇنى ەسەبىنەن ۆەتەريناريالىق ءىس-شارالاردىڭ تيىمدىلىگىن ەداۋىر ارتتىرادى. ال الەمدىك ۆەتەريناريالىق تاجىريبەدە العاش رەت ەريتروتسيتتىك انتيگەن رەتىندە پايدالانىلاتىن رەكومبينانتتى اقۋىزدار كلاسسيكالىق سەرولوگيالىق رەاكتسيالارعا ءتان جالعان وڭ ناتيجەلەردى قوسپاعاندا, سەرولوگيالىق زەرتتەۋلەردىڭ ەرەكشەلىگىن ارتتىرۋعا مۇمكىندىك بەرەدى. دياگنوستيكۋمدى ادامداردا برۋتسەللەزدى دياگنوستيكالاۋعا دا قولدانۋعا بولادى. بۇل الەۋمەتتىك قاۋىپتى زوونوزدىق ينفەكتسيانى جويۋدا مۋلتيپليكاتيۆتى اسەر ەتەدى», دەيدى عىلىمي جوبانىڭ جەتەكشىسى, ۆەتەريناريا عىلىمدارىنىڭ دوكتورى, قازاتزۋ ميكروبيولوگيا جانە بيوتەحنولوگيا كافەدراسىنىڭ پروفەسسورى ايتباي بۋلاشەۆ.
برۋتسەللەزدىڭ دياگنوستيكاسى جانۋارلاردىڭ باسقا دا اسا قاۋىپتى اۋرۋلارىنىڭ دياگنوستيكاسى سەكىلدى مەملەكەتتىك مونوپولياعا جاتقىزىلعان. سوندىقتان جاناما گەماگگليۋتيناتسيا رەاكتسياسى-جيناعىنىڭ نەگىزگى تۇتىنۋشىلارى - رەسپۋبليكالىق ۆەتەريناريالىق زەرتحانا, ونىڭ وبلىستىق جانە اۋداندىق بولىمشەلەرى, سونداي-اق قر اشم ۆەتەريناريالىق باقىلاۋ جانە قاداعالاۋ كوميتەتىنىڭ ۆەتەريناريا جونىندەگى ۇلتتىق رەفەرەنتتىك ورتالىعى.
جوبا ناتيجەسىندە ەريتروتسيتتەردىڭ (قاتتى فازانىڭ) سىرتقى مەمبرانانىڭ جالعىز رەكومبينانتتى اقۋىزدارىمەن (Omp19, Omp25, Omp31) جانە Brucella تەكتەس باكتەريالاردىڭ پەريپلازمالىق كەڭىستىگىمەن (SOD جانە BP26), سونداي-اق حيمەريكالىق اقۋىزدارمەن (omp19+25; Omp25+31; Omp19+31) سەنسيبيليزاتسياسى ءۇشىن وڭتايلى جاعدايلار جاسالدى. جەكە اقۋىزداردان ەريتروتسيتتىك انتيگەن دايىندالىپ, ولاردىڭ جاناما گەماگگليۋتيناتسيا رەاكتسياسى-جيناعىنداعى گومولوگيالىق جانە گەتەرولوگيالىق سارىسۋلارداعى انتيگەندەرى زەرتتەلدى. اتالعان رەكومبينانتتى برۋتسەللا اقۋىزدارىنىڭ E.coli-پرودۋتسەنتتەرى شتاممدارىنىڭ باكتەريالىق ماسساسى ازىرلەندى جانە نىسانالى ءونىمدى تازارتۋ جۇرگىزىلدى.
