تاسقىن سۋىن ۇتىمدى پايدالانۋ جولدارى قانداي؟

اتىراۋ وبلىسى بويىنشا «قازسۋشار» فيليالى جايىق وزەنىنەن كاسپي تەڭىزىنە تاسقىن سۋدى قايتا باعىتتاۋ ءۇشىن 14,5 شاقىرىم قوسىمشا ارنالار قازىپ جاتىر. بۇل سونداي-اق اتىراۋ قالاسى ارقىلى وتەتىن سۋدىڭ كولەمىن ازايتۋعا مۇمكىندىك بەرەدى.

باتىس قازاقستان وبلىسى بويىنشا «قازسۋشار» فيليالى ورال-كوشىم سۋلاندىرۋ جۇيەسىنەن قامىس-سامار كولدەرىنە سۋ اعىزۋعا كىرىستى. بۇل كولدەرگە سوڭعى 20 جىلدا سۋ تۇسپەگەن ەكەن.

2000 جىلدان كەيىن وسى جىلى عانا توبىل وزەنىندە سۋ مولايدى. توبىل وزەنى كاسكادىنىڭ ءىرى سۋ قويمالارى تاسقىن سۋلاردى قاۋىپسىز وتكىزۋدى قامتاماسىز ەتتى جانە 92 پايىزعا تولدى. وسىنىڭ ارقاسىندا سۋ قويمالارى ءوڭىر تۇرعىندارىن ۇزاق مەرزىمگە قاجەتتى كولەمدە سۋمەن قامتاماسىز ەتۋگە قابىلەتتى.

استانا سۋ قويماسىن تولتىرۋ ەلوردا تۇرعىندارىن جىل بويى اۋىزسۋمەن قامتاماسىز ەتۋگە مۇمكىندىك بەرەدى. استانا سۋ قويماسىنداعى وتكەن جىلعى سۋ كولەمى قالانى اۋىزسۋمەن تولىق كولەمدە قامتاماسىز ەتۋگە مۇمكىندىك بەرمەگەن, سونىڭ سالدارىنان ق.ساتپاەۆ اتىنداعى كانال ارقىلى سۋ قويماسىن قورەكتەندىرۋگە تۋرا كەلگەن. اتالعان ۇدەرىس شىعىنعا باتىپ, 2 ميلليارد تەڭگەدەن اسقان.

اقمولا وبلىسىندا «الۆا» جانە «كەڭبيدايىق» ليماندى سۋارۋ جۇيەلەرى 100 پايىزعا تولدى. سونداي-اق تسەلينوگراد اۋدانىنىڭ قوزىكوش, مۇقىر, قاراسۋ وزەندەرىنىڭ ارنالارى تولىقتى. قورعالجىن قورىعىنىڭ تەڭىز كولىنە 1,5 ميلليارد تەكشە مەتر سۋ جىبەرىلدى.

باتىس قازاقستان وبلىسىندا جايىق وزەنىنەن ءبىر تەكشە شاقىرىمعا جۋىق سۋدى قابىلداۋعا قابىلەتتى جايىق-كوشىم ليماندى سۋارۋ جۇيەسىنە سۋ جىبەرۋ مۇمكىندىگى پايدا بولدى.

قاراعاندى وبلىسىنىڭ سۋ قويمالارى دا 100 پايىزعا تولى. ولاردا جينالعان سۋ جىل بويى ءوڭىر ەكونوميكاسىنىڭ قاجەتتىلىگىن تولىق قاناعاتتاندىرۋعا مۇمكىندىك بەرەدى.

« ۇلىتاۋ وبلىسىنداعى كەڭگىر سۋ قويماسىنان اعىزىلعان سۋ العاش رەت سارىسۋ وزەنى ارقىلى قىزىلوردا وبلىسىنىڭ كولدەرىنە قۇيىلدى. قىزىلوردا وبلىسىنىڭ تەليكول كولدەر جۇيەسىنىڭ بەلسەندى تولتىرىلۋى بايقالادى, بۇل ءوڭىردىڭ اۋىل شارۋاشىلىعىنا قولايلى اسەر ەتۋى ءتيىس», دەپ اتاپ ءوتتى مينيسترلىك.

ەكولوگيالىق ماقساتتا جامبىل وبلىسىنىڭ تاسوتكەل سۋ قويماسىنان سۋ شۋ وزەنى ارقىلى اعىزىلادى. ءساۋىردىڭ باسىندا بۇل سۋ تۇركىستان وبلىسى سوزاق اۋدانىنىڭ شەكاراسىن كەسىپ ءوتتى. تاسوتكەل سۋ قويماسىنان سۋ جىبەرۋ 1 مامىرعا دەيىن جالعاسادى, وسى ۋاقىت ىشىندە شۋ وزەنى ارقىلى سوزاق اۋدانىنا ميلليون تەكشە مەترگە جۋىق سۋ قۇيىلۋى ءتيىس.

10 ساۋىردەن باستاپ ەرتىس وزەنى سۋ قويمالارىنىڭ كاسكادىنان تابيعاتتى قورعاۋ ماقساتىندا سۋ جىبەرۋ جۇزەگە اسىرىلادى. بۇل پاۆلودار وبلىسىنىڭ اۋىل شارۋاشىلىعىن قاجەتتى ازىقتىق بازامەن قامتاماسىز ەتۋگە مۇمكىندىك بەرەدى.

جالپى سۋ قويمالارىنان 6,3 ميلليارد تەكشە مەتر سۋ اعىزۋ جوسپارلانىپ وتىر.