جارىستى ەركىن كۇرەس شەبەرلەرى باستادى. بۇل باسەكەدە بەس جەرلەسىمىزدىڭ تەك ەكەۋىنىڭ عانا باعى جاندى. 97 كگ سالماق دارەجەسىندەگى الىشەر ەرعالي تۇساۋكەسەر كەزدەسۋىندە قىرعىزستاندىق اندرەي ارونوۆتىڭ اياعىن كوكتەن كەلتىرسە, جارتىلاي فينالدا ءابۋسايمان حابيلامەن ءبىراز تىرەستى. قىتايدىڭ نامىسىن قورعايتىن قانداسىمىز دا وسال ەمەس-ءتى. ول – ازيا ويىندارى مەن قۇرلىق چەمپيوناتىنىڭ جۇلدەگەرى. دەسەك تە وتە ساۋاتتى تاكتيكا ۇستانعان الىشەر پاريج وليمپياداسىنا باق سىناۋ قۇرمەتىنە يە بولدى. 125 كگ سالماقتاعى يۋسۋپ باتىرمۇرزاەۆقا ءوز جوسپارىن جۇزەگە اسىرۋ ءۇشىن بوزكىلەمگە ءۇش مارتە شىعۋىنا تۋرا كەلدى. ول پاكستاندىق ءانۋار زامان, قىرعىز ايال لازارەۆ جانە باحرەيندىك ءشامىل ماگومەدوۆتەن باسىم ءتۇستى.
74 كگ سالماقتاعى نۇرقوجا قايپانوۆتىڭ دا جولداما الۋعا جاقسى مۇمكىندىگى بولدى. الەم چەمپيوناتىنىڭ ءفيناليسى العاشقى ەكى قارسىلاسىن ويسىراتا ۇتقانىمەن, يراننىڭ اتاقتى بالۋانى يۋنەس ەماميدىڭ الدىندا دارمەنسىزدىك تانىتى. سول سەكىلدى ەراسىل مۇحتار ۇلى (57 كگ) مەن مايىس اليەۆ تە (65 كگ) ارتىلعان سەنىمدى اقتامادى. ەراسىل ۇندىلىك امان اماننىڭ قارقىنىنا شىداماسا, مايىس شاۋوحۋا يۋاننىڭ تەگەۋرىنىنە توتەپ بەرە العان جوق.
قازىرگى كەزدە ەركىن كۇرەستەن قازاقستان ۇلتتىق قۇراماسىنىڭ قورجىنىندا ءۇش جولداما بار. جوعارىدا ەسىمدەرى اتالعان بالۋاندارعا قوسا, ازامات داۋلەتبەكوۆ تە (86 كگ) بيىل وليمپيا ويىندارىندا ونەر كورسەتەدى. ساقا سپورتشىمىز ونداي قۇرمەتكە بىلتىر بەلگرادتا وتكەن الەمدىك دودادا بولەنگەن ەدى.
ايەلدەر كۇرەسىنەن وتكەن جارىستا التى بۇرىمدىمىز باق سىنادى. ولار – لاۋرا عانيكىزى (50 كگ), جۇلدىز ەشىموۆا (53 كگ), ەمما تيسينا (57 كگ), يرينا كۋزنەتسوۆا (62 كگ), ەلەنا شالىگينا (68 كگ) جانە ءجاميلا باقبەرگەنوۆا (76 كگ). بىراق بۇل قىزداردىڭ ەشقايسىنان قايىر بولمادى. باستى ءۇمىتىمىز باقبەرگەنوۆا ءبىراز جەرگە دەيىن باردى. وزبەكستاندىق سۆەتلانا وقنازاروۆا مەن تايپەيلىك حۋ تزە چانگتىڭ تاس-تالقانىن شىعارعاندا, ەندى ونى ەشكىم توقتاتا المايتىنداي كورىنگەن ەدى. بىراق تالاي ءدۇبىرلى دودادا دارالانعان جاميلاعا شەشۋشى تۇستا يۋان ۆان جەر سيپاتىپ كەتتى.
جاسى ءالى 20-عا دا كەلمەگەن لاۋرانىڭ قىرعىزستانداعى ونەرى جاقسى اسەر قالدىردى. ونىڭ وزىنە دەگەن سەنىمدىلىگى مەن جانكەشتىلىگى ۇنادى. جىلدام قيمىلداپ, شۇعىل شەشىم قابىلداي بىلەدى. تاۋەكەلگە بارۋدان تارتىنبايدى. تەحنيكالىق ارسەنالى دا مول. ءدال وسى قاسيەتتەرى ارقىلى لاۋرا تاجىكستاندىق ۆاتانسۇلتان شاكارشوەۆا مەن فيليپپيندىك جياح پينگوتتىڭ ابدەن سىلىكپەسىن شىعاردى. دەسەك تە جارتىلاي فينالدا تاجىريبەنىڭ ازدىعى سىر بەردى. الەم چەمپيوناتىنىڭ ەكى دۇركىن قولا جۇلدەگەرى, ازيا ويىندارىنىڭ جەڭىمپازى, ۇندىستاندىق ۆانەش پحوگات قازاق قىزىن ەش قينالماي ۇتتى.
ەلىشىلىك جارىستاردا قارسىلاس شاق كەلتىرمەي جۇرگەن تاجىريبەلى تيسينا مەن كۋزنەتسوۆانىڭ بىشكەكتەگى باسەكەگە تىم ناشار دايىندىقپەن كەلگەنى بىردەن بايقالدى. ال ۇلتتىق قۇراما باپكەرلەرىنىڭ 36 جاستاعى ەشىموۆا مەن 37 جاستاعى شالىگينانى نە ماقساتپەن وسى تۋرنيرگە اكەلگەنىن مۇلدەم تۇسىنە المادىق. ءيا, ولاردىڭ ەل چەمپيوناتىندا توپ جارعانى راس. بىراق شاۋ تارتىپ قالعان سپورتشىلار جولداما العان جاعدايدىڭ وزىندە تورتجىلدىقتىڭ باستى دوداسىندا نە بىتىرە الار ەدى؟ جيىرمانىڭ بەل ورتاسىنداعى جالىندى جاستار جۇلدىز بەن ەلەنانى ء«تۇتىپ جەيتىنى» ايدان انىق. الدە ولار پاريجگە جاي تۋريست رەتىندە بارىپ قايتۋدى كوزدەدى مە؟ تىپتەن, ول جوسپار دا جۇزەگە اسپادى. قوس ارداگەردىڭ ورنىنا جاستار اپارعانىمىز الدەقايدا ءتيىمدى ەدى. كەلەسى ايدا ىستانبۇلدا وتەتىن سوڭعى ليتسەنزيالىق تۋرنيردە وسى جاعى ەسكەرىلسە دەيمىز.
گرەك-ريم كۇرەسىنەن بەس سايىپقىرانعا سەنىم ارتىلدى. ولجاس سىرلىباي (97 كگ) «شۋ» دەگەندە ءسۇرىندى. قانداسىمىز ورتاڭقول جاپون بالۋانى يۋري ناكازاتوعا جول بەردى. ولجاستىڭ بويىنان جەڭىسكە دەگەن قۇلشىنىس بايقالمادى. قالعان ءتورت جىگىت جارتىلاي فينالعا دەيىن جەتتى. بۇل رەتتە ايدوس سۇلتانعالي (60 كگ), دەمەۋ جادىراەۆ (77 كگ) جانە ءالىمحان سىزدىقوۆتىڭ (130 كگ) قارسىلاستارى اسا ازۋلى بولماعانىن ايتا كەتسەك, ەش ايىبى جوق دەپ ويلايمىز. ال مەيىرجان شەرماحانبەت (67 كگ) ەكىنشى كەزەڭدە ابرور اتاباەۆپەن ايقاستى. 21 جاستاعى وزبەكتىڭ جاس پەرىسىنىڭ ازيا چەمپيونى, جاستار اراسىنداعى الەم جانە قۇرلىق بىرىنشىلىگىنىڭ جەڭىمپازى دەگەن اتاقتارى بار. ءتۇرلى تۋرنيرلەردە ابروردىڭ المات كەبىسباەۆ, يسحار قۇرباەۆ جانە سۇلتان اسەت ۇلى سەكىلدى ساڭلاقتاردى سۇرىندىرگەنى دە ەسىمىزدە. بىراق بىشكەكتە مەيىرجان قارسىلاسىنا ەش مۇمكىندىك بەرمەدى. بىراق جارتىلاي فينالدا جانكۇيەرلەر قازاقتىڭ مارقاسقا ۇلىن مۇلدە تانىماي قالدى. بولمايتىن جەردە قاتەلىك جىبەرىپ, ءوز مۇمكىندىكتەرىن ۇتىمدى پايدالانا الماعان شەرماحانبەت جاپوندىق كيوتارو سوگابەگە ەسە جىبەردى.
ال قالعان ءۇش قانداسىمىز كوزدەگەن ماقساتتارىنا قول جەتكىزدى. اتاپ ايتساق, ايدوس سولتۇستىككورەيالىق سە ۋنگ ءريدىڭ ءارى دە, بەرى دە لاقتىرىپ, ايقىن باسىمدىقپەن ۇتتى. دەمەۋ وڭتۇستىك كورەيانىڭ وعىلانى داۆون ليدەن ۇتىلىپ جاتىپ, سوڭعى مينۋتتا سان سوقتىرىپ كەتتى. ءالىمجان مەن رومان كيم ۇزاق ۋاقىت بويى ارپالىستى. ەكەۋى دە قاتتى شارشاپ, ەكىنشى كەزەڭدە اياقتارىن ازەر الىپ ءجۇردى. كەزدەسۋ 7:7 ەسەبىمەن اياقتالدى. جيعان ۇپايلارىنىڭ ساپاسى جاعىنان قانداسىمىزدىڭ باعى جاندى. ءيا, سىزدىقوۆتىڭ جەڭىسكە جەتكەنىنە قۋانعانىمىز راس. بىراق باسەكە بەل ورتاعا جەتپەي جاتىپ قانداسىمىزدىڭ قاتتى شارشاپ قالعانى ۇنامادى. ءدال وسىنداي كۇرەسپەن ءالىمحاننىڭ الىسقا بارمايتىنى انىق. سوندىقتان دا قازاقتىڭ نار تۇلعالى بالۋانىنا دەرەۋ ارادا فۋنكتسيونالدىق دايىندىعىن دۇرىستاۋ كەرەك. ال 87 كگ سالماقتا جەرلەستەرىمىز بەلدەسكەن جوق. ويتكەنى نۇرسۇلتان تۇرسىنوۆ كوزدەگەن ماقساتىنا كۇنى بۇرىن قول جەتكىزگەن ەدى.
ءسويتىپ, بىشكەكتەگى جارىستا قازاقستاننىڭ 16 بالۋانى باق سىناپ, سولاردىڭ بەسەۋى عانا پاريج وليمپياداسىندا ونەر كورسەتەتىندەردىڭ تىزىمىنە قوسىلدى. ولاردىڭ ەكەۋى ەركىن كۇرەس شەبەرلەرىنە تيەسىلى بولسا, ۇشەۋىن «كلاسسيكتەر» يەلەندى. وعان الىشەر ەرعالي مەن نۇرسۇلتان تۇرسىنوۆتىڭ ليتسەنزياسىن قوسىڭىزدار. بارلىعى – 7 جولداما. ال قىزداردىڭ قورجىنى – بوس. ەڭ سوڭعى ليتسەنزيالىق تۋرنير ەندى 9-12 مامىر ارالىعىندا تۇركيانىڭ ىستانبۇل قالاسىندا وتەدى. انادولى ەلىندەن ءبىزدىڭ سپورتشىلار بارىن سالۋعا ءتيىس. ويتكەنى قازاقستان سەكىلدى كۇرەس ونەرىندە باي ءداستۇرى بار مەملەكەت ءۇشىن جەتى جولدامانىڭ ازدىق ەتەتىنى ءسوزسىز.
