ءىس-شارا ەكى ەلدىڭ بىرقاتار ءبىلىم بەرۋ مەكەمەلەرى مەن ۇيىمدارى وكىلدەرىنىڭ باسىن قوستى. بۇل عىلىم مەن ءبىلىم سالاسىنداعى ءوزارا تۇسىنىستىك پەن ىنتىماقتاستىقتى نىعايتۋعا باعىتتالعان ماڭىزدى قادام. سەمينارعا SEPIE ديرەكتورى الفونسو حەنتيل, «بولاشاق» حبو باسقارما توراعاسىنىڭ ورىنباسارى ارمان اشكين جانە اباي ۋنيۆەرسيتەتىنىڭ باسشىلىعى قاتىستى.
قازاقستان مەن يسپانيا اراسىنداعى عىلىم جانە جوعارى ءبىلىم سالاسىنداعى ىنتىماقتاستىقتىڭ نەگىزگى اسپەكتىلەرىن تالقىلاۋدى ماقسات ەتكەن سەميناردا اباي ۋنيۆەرسيتەتىنىڭ اكادەميالىق قىزمەت جونىندەگى پرورەكتورى بانۋ ناربەكوۆا ەلىمىزدەگى جوعارى ءبىلىم بەرۋ جۇيەسى مەن ۇلتتىق باسىمدىقتارعا شولۋ جاساپ, ەكى ەل ىنتىماقتاستىعىنىڭ ماڭىزدىلىعىن اتاپ ءوتتى.
SEPIA ديرەكتورى الفونسو حەنتيل ءوز كەزەگىندە جوعارى ءبىلىم بەرۋ كونتەكستى مەن يسپانيانىڭ باسىمدىقتارى تۋرالى ەگجەي-تەگجەيلى ايتىپ بەردى. سەمينار ەكى مەملەكەتتىڭ ءبىلىم بەرۋ جۇيەلەرىنىڭ ەرەكشەلىكتەرىن جاقسى تۇسىنۋگە مۇمكىندىك بەرگەن جيىن بولدى. وسى ورايدا قاتىسۋشىلار ەكى ەل اراسىندا تاجىريبە مەن ءبىلىم الماسۋدىڭ بىرەگەي مۇمكىندىكتەرىن اشاتىنىن اتاپ ءوتتى. مۇنداي كەزدەسۋلەر ءوزارا ءتيىمدى ىنتىماقتاستىقتى نىعايتىپ قانا قويماي, يننوۆاتسيالىق زەرتتەۋلەردى ىنتالاندىرۋ جانە اكادەميالىق بايلانىستاردى كەڭەيتۋ ارقىلى جوعارى ءبىلىم مەن عىلىمنىڭ دامۋىنا ىقپال ەتەدى.
سەمينار ناتيجەسىندە «بولاشاق» ورتالىعى مەن SEPIE اراسىندا ىنتىماقتاستىق تۋرالى مەموراندۋمعا قول قويىلدى. بۇل قادام قازاقستان مەن يسپانيا اراسىنداعى ءبىلىم مەن تاجىريبە الماسۋعا جانە ءبىلىم سالاسىنداعى ساپالى وزگەرىستەرگە ىقپال ەتەدى. ەكى ەل اراسىنداعى ىنتىماقتاستىق ستۋدەنتتەرگە, عالىمدار مەن زەرتتەۋشىلەرگە جوبالار مەن باستامالاردى بىرلەسىپ جۇزەگە اسىرۋ ءۇشىن جاڭا مۇمكىندىكتەرگە جول اشىپ, ەكى ەلدىڭ دوستىق قارىم-قاتىناسىن جانە ءبىلىم بەرۋدى دامىتۋدى نىعايتادى.
