«تاشەنوۆ ۋنيۆەرسيتەتىنىڭ قۇرىلتايشىسى وڭالباي اياشەۆتىڭ قولداۋىمەن شىمكەنتتەگى 5 جوعارى وقۋ ورنى تاسقىن سۋدان زارداپ شەككەن باتىس قازاقستان وبلىسىنا 5 جۇك كولىگىمەن گۋمانيتارلىق كومەك جىبەردى. ءبىز سول ايماقتاعى جوعارى وقۋ ورىندارىمەن تىكەلەي بايلانىس جاساپ, قاۋىپسىز جەرگە كوشىرىلگەن جانە اپات ايماعىندا تۇرىپ جاتقان وتانداستارىمىزعا قانداي كومەك قاجەت ەكەنىن ءبىلىپ, سول بويىنشا ماتەريالدىق جاردەمنىڭ ءتىزىمىن جاسادىق. نەگىزىنەن بۇگىنگى تاڭدا ول جاققا كۇرەكتەر, سۋسورعىلار, كورپە-توسەك, رەزەڭكە ەتىكتەر قاجەت ەكەن. ءبىز سولاردىڭ بارلىعىن الىپ, سالىپ جىبەردىك. ماسەلەن, قىزىل سۋ باسقان ايماقتان ەۆاكۋاتسيالانعان 600 تۇرعىنعا بۇگىنگى تاڭدا كورپە-توسەك جابدىقتارى, گيگيەنالىق زاتتار, سۇلگىلەر, كىشكەنتاي بالالارعا جايالىقتار كەرەك ەكەنىن انىقتادىق. سول قاجەتتىلىكتەردى جۇك كولىكتەرىمەن جونەلتتىك. ماتەريالدىق زاتتارمەن بىرگە تەز ب ۇلىنبەيتىن ماكارون, پىستە ماي سەكىلدى ازىق-ت ۇلىك ونىمدەرىن قوسا جىبەردىك. ءار جوعارى وقۋ ورنى قايىرىمدىلىققا شامامەن 5 ملن تەڭگەدەن جۇمسادى. سوندا مەگاپوليستىڭ 5 ۋنيۆەرسيتەتى 25 ملن تەڭگەگە گۋمانيتارلىق كومەك جىبەرىپ وتىر», دەدى ۋنيۆەرسيتەت پرورەكتورى.
سونىمەن بىرگە اتالعان وقۋ ورنىنىڭ باسشىلىعى ارقالىقتاعى ىبىراي التىنسارين اتىنداعى پەداگوگيكالىق ينستيتۋت اكىمشىلىگىمەن بايلانىسىپ, ۇيلەرى سۋعا كەتىپ, ەۆاكۋاتسيالىق ورتالىقتا قالعان 21 ستۋدەنتكە 300 مىڭ تەڭگەدەن جالپى سوماسى 6 ملن 300 مىڭ تەڭگە قاراجات اۋدارىپتى. وسى ورايدا مامان وسىنداي قيىن كەزەڭدە ەل باسىنا كۇن تۋعان شاقتا ءبىر-بىرىمىزگە قولۇشىن بەرىپ, بار قيىنشىلىقتى بىرلەسىپ ەڭسەرۋ قاجەتتىگىن ەسكە سالدى. گۋمانيتارلىق كومەكتى جىبەرۋدەگى باستى ماقسات تا سول بولاتىن.
ال ماتەريالدىق كومەك جىبەرگەن جوعارى وقۋ ورىندارىن اتاساق, ولار تاشەنوۆ ۋنيۆەرسيتەتى, وزبەكالى جانىبەكوۆ اتىنداعى وڭتۇستىك قازاقستان پەداگوگيكالىق ۋنيۆەرسيتەتى, شىمكەنت ۋنيۆەرسيتەتى, ورتا ازيالىق ۋنيۆەرسيتەت, سونداي-اق اكادەميك قۋاتبەكوۆ اتىنداعى حالىقتار دوستىعى ۋنيۆەرسيتەتى.
جالپى, پەداگوگيكالىق ۋنيۆەرسيتەت ۇستازدارى اپات ايماعىنداعى تۇرعىندارعا قولۇشىن سوزىپ, ءبىر كۇندىك جالاقىسىن اۋدارعان. ول 8,5 ملن تەڭگەنى قۇرايدى. سونىڭ 6,3 ملن تەڭگەسى ارقالىقتاعى ستۋدەنتتەرگە جىبەرىلسە, قالعان قاراجات كاسىپوداق قولداۋىمەن تولىقتىرىلىپ, جۇك كەرۋەنىن جاساقتاۋعا جاراتىلعان. سوندا جالپىلاي العاندا اتالعان ۋنيۆەرسيتەت 10 ملن تەڭگەگە كومەك كورسەتىپ وتىر. بۇل ۋنيۆەرسيتەت تاريحىنداعى ەڭ اۋقىمدى قايىرىمدىق ءىس-شاراسى دەسە دە بولادى. ءوز كەزەگىندە ۋنيۆەرسيتەتتە ىسمەرلىكپەن, ۇستالىقپەن ءتۇرلى كيىم تىگىپ, بۇيىمدار جاسايتىن ونەرلى ستۋدەنتتەردىڭ جارمەڭكە ارقىلى دۇنيەلەرىن ساۋداعا شىعارىپ, ودان تۇسكەن قارجىنى سولتۇستىك قازاقستان وبلىسىنداعى جاپا شەككەن تۇرعىندارعا جىبەرسەك دەگەن نيەتتەرى بار ەكەن. وسىعان بايلانىستى كەلەر اپتادا جوعارى وقۋ ورنى عيماراتىندا اۋقىمدى جارمەڭكە وتەدى.
«عىلىم جانە جوعارى ءبىلىم مينيسترلىگى بۇگىنگى تاڭدا رەكتورلارمەن, پرورەكتورلارمەن كۇن سايىن جينالىس جاساپ وتىر. ءبىز ءوز تاراپىمىزدان جاپا شەككەن ايماقتاردىڭ تۇلەكتەرىنە ارنايى گرانت قاراستىرىپ, جاتاقحانامەن قامتاماسىز ەتۋ جاعىن قولعا الاتىمىز جونىندە مينيسترلىككە ۇسىنىسىمىزدى جولدادىق. ەڭ باستىسى ەل امان, جۇرت تىنىش بولسىن. ءوزىمىز الىستا بولساق تا, جۇرەگىمىزبەن وتانداستارىمىزبەن بىرگەمىز», دەيدى ب.يسابەك.
جالپى, شىمكەنت قالاسىندا قايىرىمدىلىق ءىس-شاراسىنان ەشكىم قالىس قالىپ جاتقان جوق. ءاربىر ۇجىم, ءاربىر مەكەمە حال-قادەرىنشە كومەك قولىن سوزۋعا تىرىسىپ جاتىر. ماسەلەن, قازاقستان مۇسىلماندارى ءدىني باسقارماسىنىڭ شىمكەنتتەگى فيليالى توسەنىشتەر, 3 موتورلى قايىق, قۇم سالاتىن قاپتار, كۇرەك-سايماندار جىبەرگەن. سونىمەن بىرگە مەگاپوليس مەشىتتەرى تاسقىننان زارداپ شەككەن قوستاناي جۇرتشىلىعىنا 10 ملن تەڭگە جيناپ بەرگەن.
بۇدان بولەك شاھاردان قارعىن سۋمەن الىسقان وتانداستارىمىزعا تەحنيكامەن جاردەم كورسەتۋ ءۇشىن ەكى جۇزدەي تەحنيكا دا جىبەرىلدى. ال «جۇرەكتەن – جۇرەككە!» قايىرىمدىلىق اكتسياسى اياسىندا قازاقستان حالقى اسسامبلەياسىنىڭ مۇشەلەرى, ءتۇرلى ەتنومادەني بىرلەستىك ۇيىمداسىپ, وسىمەن بىرنەشە رەت توننا-توننا ماتەريالدىق كومەك جىبەرۋدەن ايانىپ جاتقان جوق. ماسەلەن, جۋىردا سولتۇستىك قازاقستان وبلىسىنا مەگاپوليستىڭ ەتنومادەني بىرلەستىكتەرى 33 توننا گۋمانيتارلىق كومەك جونەلتتى. جالپى, وسى كەزگە دەيىن شىمكەنت قالالىق قازاقستان حالقى اسسامبلەياسى اتىراۋ, باتىس قازاقستان وبلىستارىنا ءۇش رەت گۋمانيتارلىق كومەك جىبەرگەن بولاتىن. ونىڭ جالپى كولەمى 60 توننا بولسا, قاراجات جاعىنان 40 ملن تەڭگەنى قۇرادى. شىمكەنت قالالىق قحا مەن ىسكەر ايەلدەر قاۋىمداستىعى جۋىردا كەزەكتى قايىرىمدىلىق ءىس-شاراسىن وتكىزدى. تاعى دا اپات ايماقتارىنا تۇرمىستىق زاتتار مەن ازىق-ت ۇلىكتەردى تيەگەن جۇك كولىكتەرى جولعا شىقتى.
تۇركىستان جانە شىمكەنت جانارماي قۇيۋ ستانسالارى ۇجىمىنىڭ باسشىسى پەردەباي مىرزاشۇكىروۆتىڭ ايتۋىنشا, اسسامبلەيا مۇشەلەرى قاۋىپسىز ايماققا كوشىرىلگەن ادامدارعا ۇرلەمەلى قايىق, سۋسورعىلار, ۇزىن رەزەڭكە ەتىكتەر, قۇتقارۋشى جەيدەلەر, شامشىراق, كۇرەك, قولعاپ, قۇبىرشەك سەكىلدى قاجەتتى كەرەك-جاراق زاتتارىن جونەلتكەن.
«بۇل – ءبىزدىڭ ەرىكتى تۇردە جاساپ جاتقان كومەگىمىز. بۇعان دەيىن ازىق-ت ۇلىك ونىمدەرى, ءتۇرلى تۇرمىستىق زاتپەن كومەكتەستىك. وعان قوسىمشا قارجىلاي دا قولداۋ كورسەتىپ جاتىرمىز. الداعى ۋاقىتتا ەل بولىپ وسى سىننان سۇرىنبەي وتەتىنىمىزگە سەنىمىم كامىل», دەدى ول.
شىمكەنتتىڭ ەرىكتىلەرى بۇگىندە تەك گۋمانيتارلىق كومەكتى جيناپ قانا قويماي, سۋ باسقان ايماقتاردا اپاتپەن كۇرەسىپ ءجۇر.
شىمكەنت
