بۇگىندە ارنايى قۇرىلعان وڭىرلىك كوميسسيالارعا اقمولا, اقتوبە, اتىراۋ, باتىس قازاقستان, قاراعاندى, قوستاناي, پاۆلودار, سولتۇستىك قازاقستان, اباي جانە ۇلىتاۋ وبلىستارىنىڭ تۇرعىندارىنان 13 577 ءوتىنىش كەلىپ تۇسكەن.
5 803 وتباسى 100 اەك نەمەسە 369 200 تەڭگە كولەمىندە جالپى سوماسى 2 ملرد تەڭگەدەن استام بىرجولعى تولەم الدى. 877 وتباسىعا كەلتىرىلگەن ماتەريالدىق شىعىن ءۇشىن جالپى سوماسى 380 ملن تەڭگە وتەماقى تولەندى. مال شىعىنى ءۇشىن بەرىلگەن وتەماقىنىڭ جالپى سوماسى 38,9 ملن تەڭگەگە جەتتى.
اعىمداعى جىلدىڭ 18 ساۋىرىندەگى جاعداي بويىنشا, زارداپ شەككەن وڭىرلەردە 2 602 تۇرعىن ءۇي تەكسەرىلىپ, ولاردىڭ 1 499-ىنا باعالاۋ جۇرگىزىلدى. ناتيجەسىندە, 794 ءۇي جوندەۋگە كەلەتىنى, 701 باسپانانىڭ قالپىنا كەلتىرۋگە جارامسىز ەكەنى انىقتالدى. قازىرگى ۋاقىتتا 197 وتباسىعا باسپانالارىن جوندەۋ ءۇشىن جالپى سوماسى 218,6 ملن تەڭگە وتەماقى تولەندى. 33 وتباسىعا قيراعان ءۇيدىڭ ورنىنا جاڭا باسپانا جانە پاتەرلەر بەرىلدى.
پاۆلودار, قاراعاندى جانە اقتوبە وبلىستارىندا تۇرعىن ۇيلەردىڭ قۇرىلىسى باستالدى.
باعالاۋ جانە زالالدى وتەۋ بويىنشا ءتيىستى جۇمىستار جالعاسۋدا. قازاقستان پرەزيدەنتى اتاپ وتكەندەي, بارلىق زارداپ شەككەن ازاماتتارعا مەملەكەت تاراپىنان جان-جاقتى قولداۋ كورسەتىلەدى.
«ۇكىمەت زارداپ شەككەن ازاماتتاردىڭ بارلىعىنا قولداۋ كورسەتەدى. ءبىز سۋ تاسقىنى سالدارىنان بولعان بارلىق شىعىندى وتەيمىز. ءاربىر ازامات, ءاربىر وتباسى مەملەكەتتىڭ قامقورلىعىندا بولادى. بۇل – مەن ءۇشىن باستى مىندەت», دەدى قاسىم-جومارت توقاەۆ سولتۇستىك قازاقستان وبلىسىنىڭ ەۆاكۋاتسيالانعان تۇرعىندارىمەن كەزدەسۋىندە.
ەسكە سالا كەتەيىك, بۇعان دەيىن سۋ تاسقىنى سالدارىنان كەلگەن زالالعا وتەماقى الۋ ءۇشىن ءىس-قيمىل الگوريتمى جاريالانعان بولاتىن.
