كورسەتىلىمنىڭ العاشقى قۇتتىقتاۋ ءسوزىن مادەنيەت جانە اقپارات مينيسترلىگى مادەنيەت كوميتەتىنىڭ توراعاسى كۇمىس سەيىتوۆا جەتكىزدى. بۇعان قوسا, مەملەكەت تاراپىنان الداعى ەلۋدەن اسا ءىرى مادەني جوبالاردى ىسكە اسىرۋ جوسپارلانىپ وتىرعانىن ايتتى. «قانىش» تاريحي ءفيلمى دە وسى اۋقىمدى ءىس-شارالاردىڭ – ءبىرى.
فيلم رەجيسسەرى ەرلان نۇرمۇحامەدوۆتىڭ ايتۋىنشا, باستى ءرولدى وينايتىن اكتەردى تاڭداۋ وڭايعا سوقپاعان. «قانىش سان قىرلى تۇلعا. ونىڭ عالىمدىعىمەن قاتار شەشەندىگى, انشىلىگى دە – ءبىر توبە. ال تاريحي, ادەبي مۇرامىزعا قوسقان ۇلەسى وراسان. سوندىقتان ءبىز دە ساتباەۆ ساۋلەلەرىن جان-جاقتى كورسەتەتىن اكتەردى ىزدەدىك. اسەت ەسجان – ءبىزدىڭ ەڭ ءساتتى تاڭداۋىمىز», دەدى ول.
«قانىشتى سومداۋ – ماعان جاۋاپكەرشىلىك جۇكتەدى. الىپ تۇلعانى مەملەكەتتىك قايراتكەر, كورنەكتى عالىم دەپ تانىعانىمەن, ونى ەڭ اۋەلى ۇلتىن شەكسىز سۇيگەن قازاقتىڭ پەرزەنتى ەتىپ كورسەتكىم كەلدى. وسى ورايدا قانىش تۋرالى قيساپسىز ەڭبەك قالدىرعان جازۋشى مەدەۋ سارسەكە اعامىزدىڭ رۋحىنا تاعزىم ەتەمىز», دەيدى اسەت ەسجان.
فيلم پروديۋسسەرى ايگۇل بايبەك كوركەم تۋىندىنىڭ جاس بۋىنعا يگى اسەرىن ايتا كەلىپ, قوعامنىڭ جاقسىلىققا بەت بۇرىسىنا ىقپال ەتەتىنىن جەتكىزدى. بۇعان قوسا تاريحي ءفيلمدى قارجىلاي قولداعان دەمەۋشىلەرگە ريزاشىلىعىن ءبىلدىردى. ايتا كەتەيىك, سەريال مەن ءفيلمدى جاساۋعا «Eurasian Resources Group» پەن «قازاقمىس» حولدينگى قارجىلىق قولداۋ كورسەتكەن بولاتىن.
بۇعان دەيىن كوركەم تۋىندى بىرنەشە حالىقارالىق بايقاۋدا جەڭىمپاز اتانعان. اتاپ ايتساق, 2022 جىلى ارگەنتينانىڭ بۋەنوس-ايرەس قالاسىندا وتكەن فەستيۆالدا «ۇزدىك فيلم» جۇلدەسىن جەڭىپ السا, بىلتىر «ۇزدىك ازيالىق كوركەم فيلم», «ۇزدىك كونتسەپتسيا», «قورشاعان ورتا تۋرالى ۇزدىك كوركەم فيلم» سىندى ءۇش بىردەي اتالىممەن ماراپاتتالدى.
