پالاتا سپيكەرى قازاقستان عالىمدارىمەن بەلسەندى بايلانىس ورناتقانى ءۇشىن فارحان احمەد نيزاميگە العىس ءبىلدىرىپ, بۇل قازىرگى جاھاندىق ماسەلەلەردى شەشۋگە ەكى تاراپتىڭ عىلىمي قاۋىمداستىعىن جۇمىلدىرۋ جولىنداعى ماڭىزدى قادام ەكەنىن اتاپ ءوتتى.
سونىمەن قاتار ول قازاقستان «بىرلىك – ارالۋاندىقتا» قاعيداتىنا تابان تىرەيتىنىن ايتىپ, وكسفورد يسلام زەرتتەۋلەرى ورتالىعىمەن بايلانىستى ودان ءارى ارتتىرۋعا مۇددەلى ەكەنىن جەتكىزدى.
كەزدەسۋ بارىسىندا الەمدىك جانە ءداستۇرلى دىندەر كوشباسشىلارى سەزىنىڭ بەيبىتشىلىك, سەنىم جانە ديالوگ مادەنيەتىن دارىپتەۋدەگى ءرولى تۋرالى دا ءسوز بولدى. سونداي-اق سەزدىڭ الداعى 10 جىلعا ارنالعان دامۋ تۇجىرىمداماسىندا كوزدەلگەن مىندەتتەردى بىرلەسىپ ىسكە اسىرۋدىڭ ماڭىزدى ەكەنى ايتىلدى.
«قازاقستاندا وتكىزىلىپ كەلە جاتقان الەمدىك جانە ءداستۇرلى دىندەر كوشباسشىلارىنىڭ سەزى جيىرما جىل ىشىندە دىندەر, مادەنيەتتەر جانە وركەنيەتتەر اراسىنداعى ديالوگتى دارىپتەيتىن بەدەلدى ءارى مويىندالعان حالىقارالىق الاڭعا اينالدى. ءبىز بىلتىر سەزدى دامىتۋدىڭ الداعى ون جىلعا ارنالعان تۇجىرىمداماسىن قابىلدادىق. فورۋمنىڭ قىزمەتى كليماتتىڭ وزگەرۋى, تەڭسىزدىك, ەكسترەميزم, سوعىس سياقتى بۇگىندە الەم بەتپە-بەت كەلىپ وتىرعان سىن-قاتەرلەردى ەڭسەرۋگە جاردەمدەسۋ ءۇشىن ءدىن كوشباسشىلارى, ساياساتكەرلەر جانە حالىقارالىق ۇيىمدار اراسىنداعى ىنتىماقتاستىقتى نىعايتۋدى كوزدەيدى. بۇل رەتتە رۋحاني ديپلوماتيانىڭ الەۋەتى زور ەكەنى انىق. سوندىقتان ءبىز سىزدەردىڭ ورتالىقتارىڭىزبەن وسى باعىتتاعى بىرلەسكەن ءىس-قيمىلدى ودان ءارى نىعايتۋعا مۇددەلىمىز», – دەدى م. اشىمباەۆ.
ءوز كەزەگىندە فارحان احماد نيزامي كەزدەسۋ ءۇشىن م.اشىمباەۆقا العىس ءبىلدىرىپ, ەكى تاراپ اراسىنداعى بايلانىستاردى جانە عىلىمي-زەرتتەۋ باعىتىنداعى ىنتىماقتاستىقتى ارتتىرۋعا مۇددەلى ەكەنىن جەتكىزدى.
