اتىراۋ وبلىستىق توتەنشە جاعدايلار دەپارتامەنتى قوعاممەن بايلانىس توبىنىڭ مالىمەتىنە سۇيەنسەك, سۋ تاسقىنىنىڭ قاۋپىنەن قورعاۋ ءۇشىن جىلىوي اۋدانىنىڭ 36 738 تۇرعىنى ەۆاكۋاتسيالاندى. ونىڭ ىشىندە 8 382 بالا بار.
قۇلسارىدا سۋ استىندا قالعان تۇرعىن ءۇي مەن وزگە دە نىسانداردىڭ سانى 2 800-دەن استى. تۇرعىن ۇيلەرگە كىرگەن سۋ ءالى تارتىلا قويمادى. ماسەلەن, جىلىوي اۋدانىنداعى №2 جانە №9 مەملەكەتتىك ءورت ءسوندىرۋ بولىمىندە جۇمىس ىستەيتىن 8 قىزمەتكەردىڭ ءۇيى تاسقىن سۋ استىندا قالعان.
«تۇرعىنداردى قۇتقارۋ جۇمىستارىن جۇرگىزدىم. وقيعا ورنىنان كەتىپ قالۋعا بولمايدى. ءتىپتى سۋ باسقان ۇيىمە بارۋدى ويلامادىم. ويتكەنى وزىمە تاپسىرىلعان مىندەتتى ورىنداۋىم قاجەت بولدى. ارىپتەستەرىم مەنىڭ اتا-انامدى, بالالارىمدى سۋ باسقان ۇيدەن الىپ شىعىپ, ەۆاكۋاتسيالىق پۋنكتكە جەتكىزدى. قازىر وتباسىم ماڭعىستاۋ وبلىسىنىڭ بەينەۋ اۋدانىنا ۋاقىتشا تۇراقتادى», دەيدى ءورت ءسوندىرۋ كولىگىنىڭ جۇرگىزۋشىسى نۇربولات ورازوۆ.
قازىر قۇلسارى قالاسىندا تاسقىن سۋدى سورۋ, بوگەتتەردى نىعايتۋ جالعاسىپ جاتىر. بۇل جۇمىسقا 5 658 ادام, 187 تەحنيكا, 17 ءجۇزۋ قۇرالى, 21 موتوپومپا تارتىلعان. قۇلسارى قالاسىنان 14 ساۋىرگە دەيىن 250 مىڭنان اسا تەكشە مەتر سۋ سورىلعان.
جىلىوي اۋداندىق ەلەكتر جۇيەسى تورابىنىڭ باسشىسى مارات تاڭاتار ۇلىنىڭ ايتۋىنشا, 5 ساۋىردە قۇلسارى قالاسىنداعى 10 شاعىن اۋداندا جارىق وشىرىلگەن. ەندى سۋ باسپاعان 500 ۇيگە ەلەكتر جارىعى قايتا بەرىلدى. جاعدايدى جەدەل قالىپقا كەلتىرۋ ماقساتىندا ۋاقىتشا ترانسفورماتورلار ورناتىلدى. جارىقتى قالپىنا كەلتىرۋ جۇمىستارىن ۇيلەستىرۋ ءۇشىن قۇلسارى قالاسىندا 4 بريگادا ىسكە كىرىستى. بريگادالار قۇرامىنداعى ماماندار 8 ارنايى تەحنيكامەن تاۋلىك بويى جۇمىس ىستەپ ءجۇر.
اۋدان اكىمىنىڭ ورىنباسارى گۇلنافيس ايشۋاقوۆانىڭ ايتۋىنا قاراعاندا, ساۋدا ورىندارى قالىپتى جۇمىسىنا كىرىستى. ونىڭ ىشىندە 100 ازىق-ت ۇلىك دۇكەنى, 2 ءىرى سۋپەرماركەت, 3 ءىرى كوتەرمە ساۋدا بازارى بار. سونداي-اق 20-عا جۋىق ءدارىحانا قايتادان اشىلدى.
«قالاداعى قوعامدىق تاماقتانۋ ورىندارى دا جۇمىسىن باستادى. تاۋلىك بويى جۇمىس ىستەيتىندەرى بار. ساۋدا ورىندارىنىڭ يەلەرىنە ءتۇسىندىرۋ جۇمىسى جۇرگىزىلىپ, باعانى نەگىزسىز قىمباتتاتپاۋدى قاداعالاپ وتىرمىز», دەيدى گ.ايشۋاقوۆا.
ال «باتىس تەح ينۆەست» جشس باسشىسى اۋەز ابىلاكىمنىڭ مالىمەتىنە سۇيەنسەك, توتەنشە جاعداي جاريالانعانعا دەيىن قۇلسارى قالاسىندا 55 اۆتوبۋس 12 باعىتتا جولاۋشى تاسىمالداعان. بىراق سۋ تاسقىنىنان اۆتوبۋستار توقتاپ قالعان. قازىر قالادا 14 اۆتوبۋس 4 باعىتتا جولاۋشى تاسىمالدايدى. بۇعان قوسا قوسشاعىل, جاڭا قاراتون, مايكومگەن, جەم اۋىلدىق وكرۋگتەرىنە قاتىنايتىن اۆتوبۋستار رەيسكە شىقتى.
«قازاۆتوجول» ۇلتتىق كومپانياسى اتىراۋ وبلىستىق فيليالىنىڭ ديرەكتورى مۇرات مىقتىباەۆتىڭ مالىمەتىنشە, 4 ساۋىردە جەم وزەنىنىڭ سۋى «دوسسور – قۇلسارى» تاسجولىنىڭ 101-شاقىرىمىن شايعان. سودان بەرى بۇل جولمەن كولىك قوزعالىسى توقتاتىلدى. وسىنىڭ سالدارىنان 470 جۇك كولىگى ماڭعىستاۋ ءوڭىرى مەن وزبەكستانعا جەتە المادى. جۇك كولىكتەرى دوسسور كەنتىنىڭ ماڭىندا ءبىر اپتادان اسا تۇرىپ قالدى. ولاردىڭ اراسىندا تۇرىكمەنستان مەن وزبەكستاننىڭ, ۋكراينا مەن مولدوۆانىڭ, رۋمىنيانىڭ, ەلىمىزدىڭ وزگە وڭىرلەرىندە تۇراتىن جۇرگىزۋشىلەر بار. اۋستريا ەلىنىڭ ەكى جۇرگىزۋشىسىنىڭ تۇرعانىنا ءبىراز بولعان. ماسەلەن, تۇرىكمەنستاندىق مەحبان امانگەلديەۆ رەسەيدەن كەلە جاتىر. ول مۇندا 5 ساۋىردەن بەرى تۇر. ال وزبەكستان ازاماتى شوحير راببيەۆ تۇركيادان جولعا شىققان.
«قازاۆتوجول» كومپانياسى 13 ساۋىردە تراسسانىڭ سۋ شايعان بولىگىن قالپىنا كەلتىرۋگە كىرىستى. ب ۇلىنگەن جول ۋچاسكەسىن جوندەۋگە 45 ادام, 28 تەحنيكا جۇمىلدىرىلدى. جول بولىگىنە سۋ وتكىزۋگە ارنالعان 12 قۇبىر سالىندى. ونىڭ ۇستىنە ينەرتتى ماتەريالدار توسەلدى.
وبلىستىق پوليتسيا دەپارتامەنتى پاترۋلدىك پوليتسيا روتاسىنىڭ كومانديرى ادىلبەك شاحمەتوۆتىڭ ايتۋىنشا, جولدىڭ جوندەلگەن بولىگى ۇزدىكسىز باقىلاۋعا الىنادى. ويتكەنى جولدىڭ بۇل بولىگىندە كولىكتەردىڭ ءبىر باعىتپەن عانا قوزعالۋىنا رۇقسات بەرىلدى. سول سەبەپتەن پوليتسيا قىزمەتكەرلەرى كولىكتەردىڭ كەزەكپەن ءجۇرۋىن رەتتەيدى.
بيىلعى سۋ تاسقىنىنىڭ زاردابى از بولمايىن دەپ تۇر. وكىنىشتىسى, ادام شىعىنى دا, مال شىعىنى دا بار. سۋ استىندا قالعان م ۇلىكتىڭ ەسەبىن ءازىر ەشكىم بىلمەيدى. ءتورت ادام تاسقىن سۋدىڭ قۇربانى بولدى. انە-مىنە 50 جاسقا تولعالى جۇرگەن جىگىتتىڭ تراكتورى اۋدارىلدى. ول دوسىمەن بىرگە سۋعا باتتى. بۇدان سوڭ اكەسى مەن بالاسى تاسقىن سۋدان شىعا الماي قالدى.
ۆەتەرينارلىق باقىلاۋ جانە قاداعالاۋ كوميتەتى جىلىوي اۋداندىق اۋماقتىق ينسپەكتسياسىنىڭ باسشىسى جانىبەك سابىروۆتىڭ ايتۋىنشا, سۋ تاسقىنىنىڭ سالدارىنان ولگەن مال, يت پەن مىسىق ولەكسەسى جينالىپ جاتىر. ولەكسەلەر ءالى دە تابىلۋى مۇمكىن. سول سەبەپتەن ولەكسەلەردى جيناۋ, جويۋ جۇمىسى ءالى دە جالعاسادى.
«جىلىوي اۋداندىق ۆەتەريناريا ستانساسى قىزمەتكەرلەرى قۇلسارى قالاسىندا سۋ تاسقىنى كەزىندە ولگەن ءتورت ت ۇلىك پەن قۇستاردىڭ ولەكسەسىن جيناۋدى باستادى. قازىر ءتولىن قوسا العاندا 60 قوي-ەشكى, 8 ءۇي قۇسى, ءبىر يت پەن ءبىر مىسىقتىڭ ولەكسەسى جينالدى. ولەكسەلەردى مال قورىمدارىندا جانە ارنايى بەلگىلەنگەن شۇڭقىرلاردا ورتەۋ جولىمەن جويۋ جۇمىستارى جۇرگىزىلىپ جاتىر», دەدى ج.سابىروۆ.
اتىراۋ وبلىسى
