مەملەكەت باسشىسى قاسىم-جومارت توقاەۆ ءبىر سوزىندە: «قازاقستان – دارىندى جاستار مەكەنى. ەرتەڭ ەلىمىزدىڭ ابىرويىن اسىراتىن دا – وسى تالانتتى ۇل-قىزدار. ءبىز ولاردىڭ ءورىسىن اشىپ, قارىم-قابىلەتىن شىڭداۋ ءۇشىن بار مۇمكىندىكتى جاساۋعا ءتيىسپىز», دەگەن ەدى.
بۇگىندە ەل پرەزيدەنتىنىڭ دارىندى جاستاردى قولداۋ باعىتىنداعى باياندى باستامالارى جۇيەلى جۇزەگە اسىپ جاتىر. بۇل كونتسەرت سونىڭ ناقتى دالەلى دەسە دە بولادى.
كوللەدجدەگى «تەاتر دەكوراتسياسى ونەرى» ماماندىعىنىڭ ستۋدەنتتەرى ساحنانى بەزەندىرۋ ىسىنە اتسالىسىپ, كورمە ۇيىمداستىردى. «اكتەر ونەرى» ماماندىعى مەن وسى «تەاتر دەكوراتسياسى ونەرى» ماماندىعىنىڭ شاكىرتتەرى جانە جەتەكشىلەرى ءاردايىم تىعىز جۇمىس ىستەيدى. ديپلومدىق جۇمىس كەزىندە ارتىستەر كيەتىن كوستيۋمنىڭ ديزاينىن ازىرلەپ, ساحنانىڭ بەزەندىرۋ ىسىنە كوپ كۇش سالادى.
وسىلايشا, كونتسەرتتىك باعدارلاما فولكلورلىق مۋزىكا ىرعاعىمەن ارنايى ازىرلەنگەن پرولوگتان باستالدى. ساحنا تۇرىلگەن ساتتەن-اق ءار شاكىرتتىڭ ونەر دەپ سوققان جۇرەك ءلۇپىلى, ىستىق ىقىلاسى كوزگە وتتاي باسىلدى. كونتسەرت رەجيسسەرى بايلانىستىرۋشى كەيىپكەر رەتىندە ءار ءساتتى ساباقتاستىرىپ, ستۋدەنتتەردىڭ جۇيەلى ونەر كورسەتۋىنە باسا ءمان بەردى. كوللەدجدەگى وقىتۋشى-پروفەسسورلىق قۇرامنىڭ وسى ۋاقىتقا دەيىنگى ەسەلى ەڭبەگى اقتالىپ, سانالى ۇرپاقتىڭ بويىنا سىڭىرگەن ساپالى ءبىلىمى انىق اڭعارىلدى.
تەاتر ونەرى جانە ونەرتانۋ فاكۋلتەتىنىڭ دەكانى, قازاقستاننىڭ ەڭبەك سىڭىرگەن قايراتكەرى اقىش وماردىڭ ايتۋىنشا, مۇنداي ءىس-شارا تالانتتى جاستاردىڭ تالابىن ۇشتاپ, جەمىستى جەتىستىكتەرگە جەتەلەيدى.
«تەوريالىق تۇرعىدا بەرىلگەن ءبىلىمدى ءاردايىم تاجىريبەمەن ۇشتاستىرىپ وتىرۋ قاجەت. مۇنداي ءىس-شارالاردا شاكىرتتەرىمىز ەڭ الدىمەن ۇلكەن ساحنادا, كوزىقاراقتى كورەرمەن الدىندا ءوزىن ەركىن ۇستاۋدى, بارىنشا اشىلىپ, شىنايى ونەر كورسەتۋدى ۇيرەنەدى. كوللەدجدە العان ءبىلىمىنىڭ ناقتى ناتيجەسىن كورەدى. قاناتىن قومداپ, ونەر ايدىنىنا اسىققان جالىندى جاستارعا ءدال وسىنداي كونتسەرتتىك باعدارلامالار اۋاداي قاجەت», دەدى ول.
ءىس-شارا بارىسىندا كوللەدج شاكىرتتەرى ءار كۋرستىڭ باعدارلاماسىنا ساي ونەر كورسەتتى. ماسەلەن, 1-كۋرستا ءتالىم الاتىن جاستار ءتۇرلى تاقىرىپ بويىنشا «ساحنا ءتىلى» پانىنەن ترەنينگ-جاتتىعۋلاردى, «اكتەرلىك شەبەرلىك» ءپانى اياسىندا جان-جانۋارلاردى باقىلاۋ الەمى ەتيۋدتەرىن ۇسىندى.
ال 2-كۋرستا ءبىلىم الاتىن ستۋدەنتتەر ادەبي-مۋزىكالىق كومپوزيتسيا مەن جان-جانۋارلاردى باقىلاۋ الەمى ەتيۋدتەرىن ساحنالادى. سونداي-اق «سۋرەتتەردى ءتىرىلتۋ» تاقىرىبىندا ءوز ونەرلەرىن ورتاعا سالدى.
بۇل رەتتە, 3-كۋرس ستۋدەنتتەرى «ساحنا ءتىلى» پانىنەن مونولوگ وقىپ, «اكتەرلىك شەبەرلىك» ءپانى بويىنشا پەسالاردان ءۇزىندى كەلتىردى. ءوز كەزەگىندە, 4-كۋرس ستۋدەنتتەرى پروزادان ۇزىندىلەر وقىپ, «اكتەرلىك شەبەرلىك» ءپانى بويىنشا ەتيۋدتەر ۇسىندى.
ايتا كەتەيىك, «اكتەر ونەرى» – اتالعان كوللەدجدەگى جاڭا اشىلعان ماماندىقتاردىڭ ءبىرى. العاشقى تۇلەكتەرىن 2021 جىلى ۇشىرسا دا, ەل جاستارى اراسىندا وعان دەگەن قىزىعۋشىلىق دەڭگەيى وتە جوعارى. تالاپكەرلەر ءدال وسى ماماندىقتى تاڭداپ, وقۋعا تۇسكىسى كەلەدى.
دۋمان اكىم,
تەاتر ءپانىنىڭ وقىتۋشىسى
