فوتو: instagram.com/muratsavelie
4 ءساۋىر كۇنى جانىبەك الەۋمەتتىك جەلىدەگى پاراقشاسىندا اسىراپ العان اناسى ۆالەري مايوركاعا كەلۋدى جوسپارلاپ وتىرعانىن, وسى ساپار بارىسىندا ءوزىن جانە قازاق حالقىن تولعاندىرىپ وتىرعان بىرنەشە ساۋالعا تىكەلەي جاۋاپ الۋ مۇمكىندىگى تۋعانىن حابارلاپ, سۇراق قويۋدى وتىنگەن ەدى.
جانىبەكتىڭ اسىراپ العان اناسىمەن 6 مينۋتتى قۇراعان سۇحباتى بارىسىندا بۇعان دەيىن كوپشىلىككە بەيمالىم بولعان دەرەكتەردىڭ بەتى اشىلدى.
ۆالەري قازاقستاننان بالا اسىراپ الۋ تۋرالى اقاپارتتى العاش رەت بەلگياداعى تانىس ايەلى ارقىلى ەستىگەن.
ول ارقالىقتاعى بالالار ۇيىنەن جانىبەك تۋرالى الدىن الا اقپارات الدىرىپ, ءبىلىپ بارعان ەكەن. الايدا مەجەلى ورىنعا جەتكەندە ەشتەڭەدەن حابارسىز كەيىپ تانىتقان. سول ۋاقىتتا ۆالەريدەن سولاي جاساۋى سۇرالعان.
سونداي-اق اراداعىلار جانىبەكتى اسىراپ العان انادان 12 مىڭ دوللار العان.
ۆالەري ارقالىققا بارۋىن, سول ۋاقىتتا كىمنىڭ ءۇيىن پانالاعانىن اشىق ايتىپ بەردى.
«مەن سەنى اسىراپ الۋ ءۇشىن 12 مىڭ دوللار تولەدىم. بالا اسىراپ الۋ ءۇشىن اقشا بەرۋ كەرەك ەكەنىن بەلگيادا ءبىلدىم. بىراق ونىڭ زاڭسىز ەكەنىن بىلمەدىم. ارقالىقتاعى بالالار ۇيىندە امەريكالىقتاردان 20 مىڭ دوللار قولما قول سۇراتقانىن دا ءبىلدىم», دەدى ۆالەري.
ول قازاقستاننان بالا اسىراۋ ءۇشىن ەكى اي بويى قۇجات دايىنداعان.
«قۇرمەتتى اكە-انالار, اعا-اپكەلەر. اسىراپ العان انام ۆالەريدىڭ اتىنان سۇراقتارىڭىز بەن تىلەكتەرىڭىزگە العىس ايتقىم كەلەدى. بۇل سۇحباتتا وتكەن وقيعالار تۋرالى ەگجەي-تەگجەيلى ايتىلدى, سونىمەن قاتار جاڭا اقپارات تا بار.
بۇل 6 مينۋتتىق سۇحباتتا كوپتەگەن سۇراققا جاۋاپ بەرىلدى دەپ ويلايمىن. ءبىز بۇرىن بىلمەگەن مالىمەتتەر دە شىقتى. ەموتسيونالدى ساتتەر دە بولدى. قۇرمەتتى دوستار, بۇل بىرنەشە ساۋالدىڭ جاۋابى. بىراق الداعى ۋاقىتتا ەڭ ماڭىزدى سۇراقتىڭ دا جاۋابىن تابامىن دەپ ۇمىتتەنەمىن. اناشىم, سەن قايداسىڭ؟», دەپ جازدى جانىبەك.
