فوتو: اقوردا ءباسپاسوز قىزمەتى
قاسىم-جومارت توقاەۆ ەرەۆانعا ساپارمەن كەلۋگە شاقىرعانى جانە قوناقجايلىق كورسەتكەنى ءۇشىن نيكول پاشينيانعا العىس ايتتى. سونداي-اق ول قازاقستان پرەزيدەنتى رەتىندە ارمەنياعا العاش رەت رەسمي ساپارمەن كەلگەنىن اتاپ ءوتتى.
«قازاق-ارميان ارىپتەستىگىن جاڭا دەڭگەيگە كوتەرۋگە قاتىستى باستاماڭىزدى تولىق قولدايمىن. ءبىز ارميان حالقىنىڭ تەرەڭ تاريحىنا, ەجەلگى مادەنيەتى مەن سالت-داستۇرىنە زور قۇرمەتپەن قارايمىز», دەدى مەملەكەت باسشىسى.
قازاقستان پرەزيدەنتى ءوزىنىڭ ارمەنياعا رەسمي ساپارى دوستىق پەن ىنتىماقتاستىق تۋرالى شارتقا قول قويىلعانىنا 25 جىل تولۋىنا وراي ءوتۋىنىڭ سيمۆولدىق ءمانى بار ەكەنىنە نازار اۋداردى. شيرەك عاسىر ىشىندە ەكىجاقتى قاتىناستاردىڭ بەرىك نەگىزى قالاندى. ساياسي ديالوگ بەلسەندى دامىپ, ۇكىمەتتەر مەن پارلامەنتتەر اراسىندا بايلانىس ورنادى.
سونىمەن قاتار مەملەكەت باسشىسى ءوزىنىڭ ەرەۆانعا ساپارى قازاقستان مەن ارمەنيا اراسىنداعى ىنتىماقتاستىققا تىڭ سەرپىن بەرەدى دەپ سانايدى.
قاسىم-جومارت توقاەۆ ەكىجاقتى ىقپالداستىقتى ودان ءارى دامىتۋدىڭ مەيلىنشە پەرسپەكتيۆتى باعىتتارىن ايقىنداپ بەردى. ونىڭ ايتۋىنشا, ەڭ وزەكتى مىندەت – ەكونوميكالىق قارىم-قاتىناستاردى ساپاسى مەن مازمۇنى جاعىنان بايىتا ءتۇسۋ. ءوزارا ساۋدا-ساتتىقتى ۇلعايتۋ ءۇشىن ازىق-ت ۇلىك سەكتورىندا, ينۆەستيتسيا, كولىك-لوگيستيكا, IT-يندۋستريا جانە قۇرىلىس سالالارىندا ايتارلىقتاي رەزەرۆ بار.
نيكول پاشينيان قازاقستان پرەزيدەنتىنىڭ ارمەنياعا العاشقى ساپارى مول مۇمكىندىكتەرگە جول اشاتىنىن اتاپ ءوتتى.
ء«سىزدىڭ بۇگىنگى ساپارىڭىزدىڭ ماڭىزى زور. كەلىسسوزدەر بارىسىندا كەڭ اۋقىمدى ماسەلەلەردى قاراستىردىق. سونىڭ ىشىندە ەكونوميكالىق جانە ساياسي ىنتىماقتاستىقتى تەرەڭدەتۋگە, وڭىرلىك ىقپالداستىقتى كەڭەيتۋگە باسا ءمان بەردىك. سونىمەن قاتار ءبىز مادەني-گۋمانيتارلىق سالانى دا نازاردان تىس قالدىرعان جوقپىز. بيىل قازاقستاندا ارمەنيانىڭ مادەنيەت كۇندەرى, ال كەلەسى جىلى ارمەنيادا قازاقستاننىڭ مادەنيەت كۇندەرى وتەدى. جالپى, بۇگىنگى قاراستىرىلاتىن ماسەلەلەر – اۋقىمدى جانە مازمۇندى. ءسىزدىڭ ساپارىڭىزدىڭ ناتيجەسىندە ەكى ەل اراسىنداعى ىنتىماقتاستىقتىڭ بارلىق باعىتىن دامىتۋدى كوزدەيتىن ناقتى شەشىمدەر قابىلدايتىنىمىزعا سەنىمدىمىن», دەدى ارمەنيا پرەمەر-ءمينيسترى.
