فوتو: smartpress.by
مالىمدەمەدە: «يران ءوز قۇقىعىن قامتاماسىز ەتۋ جانە شابۋىلداۋشىنى جازالاۋ ماقساتىندا سيونيستىك لاڭكەستىك ارميانىڭ باسىپ العان جەرلەردەگى ماڭىزدى اسكەري نىساندارىنا شابۋىل جاساپ, ونىڭ ستراتەگيالىق بارلاۋ پۋنكتتەرىن, زىمىراندار مەن پيلوتسىز اۋە كولىكتەرىن جويدى», دەگەن جولدار بار.
توڭكەرىس ساربازدارى ارمياسى اقش نەمەسە يزرايل اتىنان كەز كەلگەن ەلدەن كەلەتىن قاۋىپ كوزىنە جاۋاپ قايتارىلاتىنىن, يراننىڭ زاڭدى مۇددەلەرىن ءتۇرلى شابۋىل جانە زاڭسىز كۇش قولدانىسىنا قارسى قورعايتىنىن اشىق ءبىلدىردى.
IRNA رەسمي اقپارات اگەنتتىگى توڭكەرىس ساربازدارى ارمياسىنىڭ يزرايلگە بالليستيكالىق زىمىرانمەن شابۋىل جاساعانىن مالىمدەگەن ەدى. ال يزرايلدىك لاۋازىم يەلەرى بولسا, يراننىڭ يزرايلگە بالليستيكالىق زىمىران ۇشىرعانىن بىلدىرەتىن ەشقانداي بەلگى جوق ەكەنىن ايتىپ وتىر. يزرايل ارمياسى ەلدىڭ وڭتۇستىگىندە اسكەري ءبىر بازاعا شاعىن زاقىم كەلگەنىن جانە ادام شىعىنى بولماعانىن حابارلادى. ارميا: «يراننان يزرايلگە 200-دەن استام ۇشقىشسىز اۋە كولىگى ۇشىرىلدى. قاۋىپتەردىڭ كوپشىلىگى ءيزرايلدىڭ اۋە كەڭىستىگىنەن تىس جەردە, سيريا جانە يوردانيا اۋماعىندا ۇستالدى», دەپ مالىمدەدى.
پرەمەر-مينيستر بەنيامين نەتانياحۋ باس بولىپ, تەل-اۆيۆكە شۇعىل جينالعان سوعىس كابينەتى يراننان جاسالعان ۇشقىشسىز اۋە كولىگى شابۋىلىنىڭ جاي-جاپسارىن تالقىلادى. ەلدىڭ قاۋىپسىزدىك كابينەتى يراننىڭ شابۋىلىنا تويتارىس بەرۋ ءۇشىن سوعىس كابينەتىنە جاۋاپكەرشىلىك جۇكتەدى.
يران-يزرايل قاقتىعىسى بۇكىل الەمدى الاڭداتىپ وتىر. ونسىز دا باسىلماي كەلە جاتقان يزرايل-پالەستينا داۋىنا قوسىمشا تاعى ءبىر سوعىس وشاعى پايدا بولا ما دەگەن قاۋىپ زور.
بۇعان دەيىن يران يزرايلگە قاراي ۇشقىشسىز ۇشاقتارىن ۇشىرىپ, تەگەران ۇستىندەگى اۋە كەڭىستىگىن جاۋىپ تاستاعان بولاتىن. يزرايل 1 ساۋىردە داماسكىدەگى يران كونسۋلدىعىنا جاساپ, سالدارىنان يران يسلام رەۆوليۋتسياسى ساقشىلار كورپۋسىنىڭ بىرنەشە قولباسشىسى, ونىڭ ىشىندە ەكى گەنەرال قازا تاپقان ەدى.
ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى جوزەپ بوررەل تاياۋ شىعىستاعى جاعدايعا قاتىستى قىسقاشا مالىمدەمە جاسادى. «ەۋروپالىق وداق يراننىڭ يزرايلگە قارسى شابۋىلىن قاتاڭ ايىپتايدى. بۇل – بۇرىن-سوڭدى بولماعان ەسكالاتسيا جانە ايماقتىق قاۋىپسىزدىككە ەلەۋلى قاتەر», دەپ جازدى ەۋروپالىق ديپلوماتيانىڭ باسشىسى.
ەۋروپالىق كەڭەس باسشىسى شارل ميشەل دە يراننىڭ يزرايلگە شابۋىلىن قاتاڭ ايىپتادى. «ايماقتىق شيەلەنىستىڭ ودان ءارى ورشۋىنە جول بەرمەۋ ءۇشىن بارلىعىن جاساۋ قاجەت. بۇدان ءارى قانتوگىسكە جول بەرمەۋىمىز كەرەك. ءبىز ارىپتەستەرىمىزبەن بىرگە جاعدايدى ءجىتى باقىلاۋدى جالعاستىرامىز», دەدى ش.ميشەل.
مۇنداي ايىپتاۋلاردى الەمنىڭ ۇلىبريتانيا, فرانتسيا سىندى بەدەلدى ەلدەرىنىڭ سىرتقى ىستەر ۆەدومستۆولارى دا ءبىلدىرىپ جاتىر. ازىرگە يزرايل, يران, يوردانيا, ليۆان جانە يراكتىڭ اۋە كەڭىستىگى ۋاقىتشا جابىلدى.
يران مەن يزرايل قاقتىعىسىنا وراي ەلىمىزدە «قازاقستاندىق بىتىمگەرلەرگە قاۋىپ بار ما؟» دەگەن سۇراق تۋىنداعان راس. وسىعان وراي قازاقستان رەسپۋبليكاسى قورعانىس مينيسترلىگى گولان جوتالارىنداعى قازاقستاندىق بىتىمگەرلەر تۋرالى رەسمي مالىمدەمە جاسادى. قورعانىس مينيسترلىگىنىڭ رەسمي وكىلى رۋسلان جانگۋليننىڭ مالىمدەۋىنشە, گولان جوتالارىندا بۇۇ بىتىمگەرلىك ميسسياسىن ورىنداپ جاتقان قازاقستاندىق كونتينگەنت قالىپتى رەجىمدە جۇمىسىن جالعاستىرىپ جاتىر. «جەكە قۇرامنىڭ ءومىرى مەن دەنساۋلىعىنا ەشقانداي قاۋىپ جوق», دەدى قورعانىس مينيسترلىگىنىڭ رەسمي وكىلى.
